ޓްރަމްޕް ވިދާޅުވަނީ މިއީ ފޭކް ފޮޓޯއެއް ކަމަށް

އެމެރިކާގެ ރިޔާސީ އިންތިހާބުގައި ވާދަކުރައްވާ ނައިބު ރައީސް ކަމަލާ ހެރިސް މިދިޔަ ހަފްތާގައި މިޝިގަންއަށް ވަޑައިގަތް އިރު މަރުހަބާ ކިޔުމަށް ގިނަ ބަޔަކު އެއްވެފައިވާ މަންޒަރު ފެންނަ ފޮޓޯ އަކީ ފޭކެއް ކަމަށާއި އެތަނަށް އެކަކު ވެސް ނުދާ ކަމަށް އިދިކޮޅު ކެންޑިޑޭޓް ޑޮނަލްޑް ޓްރަމްޕް ވިދާޅުވެ ދޮގު ތުހުމަތެއް ކުރައްވައިފި އެވެ.

ކުރީގެ ރައީސް ޓްރަމްޕް އޭނާގެ ސޯޝަލް މީޑިއާ ވެބްސައިޓް "ޓްރޫތު" ގައި ވިދާޅުވެފައިވަނީ ކަމަލާ ދަތުރުކުރެއްވި މަތިންދާބޯޓު ޑެޓްރޮއިޓްގައި ޖެއްސި އިރު އެތަނަށް ގިނަ ބަޔަކު އެއްވެފައި ތިބި ކަމަށް ބުނެ އާންމުކުރީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަދާފައިވާ ފޮޓޯއެއް ކަމަށެވެ.

ޓްރަމްޕު ވިދާޅުވީ އެތަނަށް ދިޔައީ އެއާޕޯޓުގެ މެއިންޓެނަންސް މަސައްކަތުގައި އުޅުނު މީހެއް ކަމަށެވެ. އެހެންވެ ކަމަލާގެ ކެމްޕެއިނުން އެކަން ފޮރުވަން އޭއައި ފޮޓޯއެއް ހެދީ ކަމަށް ވިދާޅުވި އެވެ.

ޓްރަމްޕް އެހެން ވިދާޅުވި ނަމަވެސް ބޮޑެތި އެތައް މީޑިއާއަކުން އެ އިވެންޓުގެ ފޮޓޯ އާއި ވީޑިއޯ ނަގާފައިވެ އެވެ. އަދި އެ އަދަދަށް މީހުން ޖަމާވެފައި ވާތީ ވެސް ފެނެ އެވެ.

އޭއައި ފޮޓޯއެއް ކަމަށް ޓްރަމްޕް ވިދާޅުވާ ފޮޓޯގެ އަސްލު ކަމަލާގެ ކެމްޕެއިން ޓީމުން ބީބީސީއާ ހިއްސާކުރުމުން ބެލި އިރު އައިފޯން 12 ޕްރޯ މެކްސް އަކުން މިޝިގަން އަށް، މި މަހުގެ ހަތް ވަނަ ދުވަހުގެ ހަވީރު 6:28 ގައި ނަގާފައިވާ ފޮޓޯއެއްކަން މެޓަޑާޓާއިން އެނގެ އެވެ. އަދި މި ނޫނަސް ހަމަ އެ ފޯނުން އެތަނުން ނަގާފައިވާ އެހެން ފޮޓޯތައް ވެސް ވަނީ ހިއްސާކޮށްފަ އެވެ.

އެމެރިކާގައި ނޮވެމްބަރު މަހު އޮންނަ ރިޔާސީ އިންތިހާބުގެ ކެމްޕެއިން ތެރޭ އޭއައި ފޮޓޯ އާއި ވީޑިއޯތައް ހަދައިގެން ކެންޑިޑޭޓުންނާ ދެކޮޅަށް ބޭނުންކުރުމުގެ މައްސަލަ ބޮޑުވެ އާންމުންނަށް ހަގީގަތް އޮޅޭ ހިސާބަށް ކަންކަން ގޮސްފައިވާ ކަމަށް، ކެމްޕެއިން ދިރާސާކުރާ ފަރާތްތަކުން ބުނެ އެވެ. ފޭކް ފޮޓޯ އާއި ވީޑިއޯ އަދި ސައްހަ ނޫން މައުލޫމާތު ފެތުރުމުގައި، ސޯޝަލް މީޑިއާގައި ނުފޫޒު ގަދަ މީހުން ވެސް ބައިވެރިވަމުން ދާތީ އެ ކަންބޮޑުވުން ވެސް ވަނީ ފާޅުކޮށްފަ އެވެ.