ކަމަލާ މެޑިކަލް ރިޕޯޓް ހާމަކޮށް ޓްރަމްޕަށް ޗެލެންޖުކޮށްފި

ޑިމޮކްރެޓިކް ޕާޓީގެ ރިޔާސީ ކެންޑިޑޭޓް ނައިބު ރައީސް ކަމަލާ ހެރިސްގެ ސިއްހީ ހާލަތު ވަރަށް ރަނގަޅު ކަމަށާއި، ރައީސްކަމުގެ މަގާމަށް އެކަށީގެންވާ ކަމަށް ވައިޓް ހައުސްއިން ޝާއިއުކުރި މެޑިކަލް ރިޕޯޓެއްގައި ބުނެފި އެވެ.

މިއީ އުމުރުން 20 އަހަރު ދޮށީ އޭނާގެ ވާދަވެރިޔާ ޑޮނަލްޑް ޓްރަމްޕްގެ ސިއްހީ މައުލޫމާތު ހާމަކުރުމަށް ޕްރެޝަރު ކުރުމުގެ ގޮތުން ކަމަލާ ކުރެއްވި ކަމެކެވެ.

ޓްރަމްޕްގެ ކެމްޕޭނުން މިކަމުގައި އަވަހަށް ރައްދުދީ ބުނެފައިވަނީ ޓްރަމްޕު ވެސް ހުރީ "ރަނގަޅު އަދި ފުރިހަމަ ސިއްހަތެއްގައި" ކަމަށެވެ. އަދި ކަމަލާގެ ކިބައިގައި ގައުމު ހިންގެވުމަށް ބޭނުންވާ ބާރު ނެތް ކަމަށް ތުހުމަތުކޮށްފައިވެ އެވެ.

"ނައިބު ރައީސް ހެރިސް ހުންނެވީ ވަރަށް ރަނގަޅު ސިއްހަތެއްގައި،" އޭނާގެ ޑޮކްޓަރު ޖޮޝުއާ ސިމަންސް މި ރިޕޯޓުގައި ބުނެފައިވެ އެވެ.

އޭގައި ބުނެފައިވަނީ "ރައީސްކަމުގެ ވާޖިބުތައް ކާމިޔާބުކަމާ އެކު އަދާކުރުމަށް ބޭނުންވާ ޖިސްމާނީ އަދި ނަފްސާނީ ސާބިތުކަން އޭނާގެ ކިބައިގައި ހުރި" ކަމަށެވެ.

ތަފްސީލީ ރިޕޯޓެއްގައި، ސިމަންސް ވިދާޅުވެފައިވަނީ ކަމަލާއަށް މޫސުމީ އެލާޖީތަކާއި ބަލިތައް ޖެހޭ ކަމަށާއި، މިކަން ބޭހުން ކޮންޓްރޯލްކުރެވޭ ކަމަށެވެ. މީގެ އިތުރުން، ކަމަލާ އަކީ ކައިރި ފެނުމުގެ މައްސަލަ ކުޑަކޮށް ހުރި ބޭފުޅެއް ކަމަށާއި އެހެންވެ ކޮންޓެކްޓް ލެންސް ބޭނުންކުރައްވާ ކަމަށް ވެސް ރިޕޯޓުގައި ބުނެފައިވެ އެވެ.

އުމުރުން 78 އަހަރުގެ ކުރީގެ ރައީސް ޓްރަމްޕްގެ ޖިސްމާނީ ސިއްހަތާއި ސިކުނޑީގެ ހާލަތު ސަމާލުކަމަށް ގެންނަން އުމުރުން 59 އަހަރުގެ ނައިބު ރައީސްގެ ޓީމުން ދަނީ މަސައްކަތްކުރަމުންނެވެ. ޓްރަމްޕް ވަނީ ތަފްސީލީ މެޑިކަލް މައުލޫމާތެއް ހާމަކުރުމަށް އިންކާރު ކުރައްވައިފަ އެވެ.

ކަމަލާގެ ކެމްޕޭނުން ސަމާލުކަން ގެނެސްފައިވަނީ ނިއު ޔޯކް ޓައިމްސްގައި މި ފަހުން ޝާއިއުކުރު ލިޔުންތަކަކަށެވެ. މި ލިޔުންތަކުގައި ޓްރަމްޕް އޭނާގެ ސިއްހަތާ ގުޅޭ އަސާސީ މައުލޫމާތު ހާމަނުކުރާތީ ކަންބޮޑުވުން ފާޅުކޮށްފައިވެ އެވެ.

ޓްރަމްޕަކީ އެމެރިކާގެ ތާރީހުގައި އެންމެ ދޮށީ އުމުރުގެ ރިޔާސީ ކެންޑިޑޭޓެވެ. އެއީ 81 އަހަރުގެ ރައީސް ޖޯ ބައިޑެން ޖުލައި މަހު ރިޔާސީ ރޭހުން ވަކިވެވަޑައިގަތުމާ އެކުގަ އެވެ.

ޓްރަމްޕް ވިދާޅުވާ ގޮތުގައި އޭނާގެ ސިއްހަތު ރަނގަޅެވެ. ނަމަވެސް، އޭނާގެ ކެމްޕޭނުގައި އެއްވެސް ފުރިހަމަ މެޑިކަލް ރިޕޯޓެއް އަދި މިހާތަނަށް ޝާއިއުކޮށްފައެއް ނެތެވެ. ޓްރަމްޕްގެ ކެމްޕޭނުން ޝާއިއުކޮށްފައިވަނީ ޓްރަމްޕް ވެރިކަމުގައި ހުންނެވި އިރު ވައިޓް ހައުސް ޑޮކްޓަރުން ދީފައިވާ ބަޔާންތަކެވެ. މި ބަޔާންތަކުގައި ޓްރަމްޕްގެ ސިއްހަތު ރަނގަޅު ކަމަށް ބުނެފައިވާއިރު، އިތުރު ތަފްސީލެއް ނުދެ އެވެ. -- އޭއެފްޕީ