ހުޅުމާލެ 2 އިން މާލޭ މީހުންނަށް ދޭ ހުރިހާ ގޯއްޗެއް ހަވާލުކޮށްފި

ބިންވެރިޔާ ސްކީމްގެ ދަށުން މާލޭ މީހުންނަށް ހުޅުމާލެ 2 އިން ލިބިފައިވާ ހުރިހާ ގޯއްޗެއް ހަވާލުކޮށް މިއަދު ނިންމައިފި އެވެ.

ހުޅުމާލެ 2 އިން މާލޭ މީހުންނަށް ލިބުނު ގޯތިތައް މި މަހުގެ ނިޔަލަށް ހަވާލުކޮށް ނިންމާނެ ކަމަށް ރައީސް ޑރ. މުހައްމަދު މުއިއްޒު ވަނީ ކުރިން ވިދާޅުވެފަ އެވެ.

ހައުސިން މިނިސްޓްރީން މިރޭ އެކްސްގައި ކުރި ޕޯސްޓެއްގައި ބުނީ ރައީސްގެ ވައުދާ އެއްގޮތަށް، ހުޅުމާލެ 2 އިން ދޫކުރި ހުރިހާ ގޯއްޗެއް އެ ތަންތަނުގެ ވެރިފަރާތާ ހަވާލުކޮށް މިހާރު ނިމިފައިވާ ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހިންގި ބިންވެރިޔާ ސްކީމްގެ ދަށުން ހުޅުމާލެ 2 އިން ވަނީ މާލޭ މީހުންނަށް 1،408 ގޯތި ދޫކޮށްފަ އެވެ. އޭގެ ތެރެއިން ވަރަށް ގިނަ ގޯތީގައި، އެޗްޑީސީން މިހާރު ވަނީ ކަންމުޑި ވެސް ޖަހައި ދީފަ އެވެ.

ހުޅުމާލެ 3 އިން 699 ގޯތި ދޭން ވެސް ކުރީގެ ސަރުކާރުން ވަނީ ނިންމައިފަ އެވެ. އެ ގޯތިތައް ދިނުމަށް ބޭނުންވާ ބިން ހިއްކުމުގެ މަސައްކަތް އަދި ނުނިމެ އެވެ.

ބިންވެރިޔާ ސްކީމްގެ ދަށުން ހުޅުމާލެ އާއި ގުޅިފަޅު އަދި ގިރާވަރުފަޅުން މާލޭ މީހުންނަށް 9،000 އަށް ވުރެ ގިނަ ގޯތި ދޭން ވަނީ ނިންމައިފަ އެވެ. ހުޅުމާލެ 3 އާއި ގުޅިފަޅާއި ގިރާވަރުފަޅުން ގޯތި ދިނުމަށް ބޭނުންވާ ބިން ހިއްކާ އަދިވެސް ނުނިމެ އެވެ. އަދި މި ސަރުކާރު އައިފަހުން ވަނީ ހުޅުމާލެ 3 އާއި ގުޅިފަޅުގެ ލޭންޑް ޔޫސް ޕްލޭނަށް ވެސް ބޮޑެތި ބަދަލުތަކެއް ގެނެސްފަ އެވެ.

ކުރީގެ ސަރުކާރުން ގުޅިފަޅުން ދޭން ނިންމި ގޯތިތަކާއި މި ސަރުކާރު އައިފަހުން ގިރާވަރުފަޅުން ގުޅިފަޅަށް ބަދަލުކުރި ގޯތިތަކާ އަދި ގުޅިފަޅުގެ ލޭންޑް ޔޫސް ޕްލޭނަށް ބަދަލު ގެނެސްފައި ވާތީ، އެތަނުން ގޯތި ލިބުނު މީހުންގެ މެދުގައި އަލުން ގުރުއަތުލާން ވެސް ވަނީ ނިންމައިފަ އެވެ. ގުޅިފަޅުން ގޯތި ލިބުނު މާލޭ މީހުންގެ މެދުގައި ގުރުއަތުލުން ބާއްވަނީ މާދަމާ އެވެ.

ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން ޖުމްލަ 3،520 ގޯތި ދޫކުރަން ވަނީ ނިންމައިފަ އެވެ.