ފަލަސްތީނަށް އެހީވާން އެެއްކުރި ފައިސާ ފޮނުވައިފި

"ފަލަސްތީނާ އެކު ދިވެހިން" ގެ ނަމުގައި އެ ގައުމުގެ ރައްޔިތުންނަށް އެހީވުމަށް ޕީއެސްއެމުން ބޭއްވި ޓެލެތޯނަށް ލިބުނު 1.25 މިލިއަން ޑޮލަރު ޔުނައިޓެޑް ނޭޝަންސް ރިލީފް އެންޑް ވޯކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވައިފި އެވެ.

ފޮރިން މިނިސްޓްރީން ރޭ ނެރުނު ބަޔާނެއްގައި ބުނީ އެ ފައިސާ މިދިޔަ އޮގަސްޓް މަހުގެ 20 ގައި ރާއްޖޭގެ މަރުކަޒީ ބޭންކް، އެމްއެމްއޭ މެދުވެރިކޮށް އަންރުވާ އަށް ފޮނުވާފައިވާ ކަމަށެވެ.

މިނިސްޓްރީން ބުނިގޮތުގައި އެ ފައިސާ ޖަމާކުރި ކަމުގެ "ޑެބިޓް އެޑްވައިޒް" ގެ ކޮޕީ އާއި "އަންރުވަ ފޯ ފަލަސްތީން" އެކައުންޓަށް އެ ފައިސާ ލިބިފައިވާކަން ވެސް ވަނީ ކަށަވަރު ކޮށްދީފަ އެވެ.

އެ ބަޔާނާ އެކު މިނިސްޓްރީން ވަނީ ޖޭޕީ މޯގަން ބޭންކުން އިޝޫކޮށްފައިވާ ޓްރާންސެކްޝަން ތަފްސީލު ވެސް ހިއްސާކޮށްފަ އެވެ.

ރައީސް ޑރ. މުހައްމަދު މުއިއްޒުގެ އިސްނެންގެވުމަކަށް، ގައުމީ ފެންވަރުގައި ކުރިއަށް ގެންދިޔަ އެ ޓެލެތޯން ބާއްވާފައި ވަނީ މިދިޔަ ޖޫން މަހުގެ 12 ގަ އެވެ އެ ޓެލެތޯނުން ލިބުނު ފައިސާގެ ޖުމްލަ އަދަދަކީ 1,248,826.56 ޑޮލަރެވެ. އެ އަދަދު، ވަނީ އޮޑިޓު ފާމެއް ކަމަށްވާ "ކްރޯ މޯލްޑިވްސް އެލްއެލްޕީ އިން ކަށަވަރު ކޮށްދީފައި ކަމަށް ވެސް ބަޔާނުގައި ބުންޏެވެ.

އެ ފައިސާ ހަރަދުކުރާނެ ގޮތުގެ ޕްރޮގްރާމުތަކާއި ޕްރޮޖެކްޓްތަކާ ގުޅޭގޮތުން ވެސް އަންރުއާ އެކު މަޝްވަރާކުރި ކަމަށް ފޮރިން މިނިސްޓްރީން ބުންޏެވެ.

އެ މިނިސްޓްރީން ބުނިގޮތުގައި އެހާ ބޮޑު އަދަދެއް ފަލަސްތީނުގެ ރައްޔިތުންނަށް ދިވެހިން ހަދިޔާކުރުމަކީ ފަލަސްތީނުގެ މިނިވަންކަމަށް ރާއްޖެ އިން ކުރާ ތާއީދު ދައްކުވައިދޭ ކަމެކެވެ. މިފަދަ އުނދަގޫ ދަނޑިވަޅެއްގައި އެ ގައުމުގެ ރައްޔިތުންނާ އެކު ސާބިތުކަމާ އެކު ތިބި ކަމުގެ ހެއްކެއް ކަމަށް ވެސް ދިވެހި ސަރުކާރުން ބުންޏެވެ.

ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ނަސްލު ނައްތާލުމުގެ އަމަލުތަކާއި ބައިނަލްއަގްވާމީ ގާނޫނާއި އިންޓަނޭޝަނަލް ހިއުމެނިޓޭރިއަން ލޯ އާ ހިލާފަށް ދެމުން ގެންދާ އަމަލުތަކެއް ކަމަށް މިނިސްޓްރީން ބުންޏެވެ.

ގައުމީ ފެންވަރުގައި ފަަލަސްތީނުގެ ރައްޔިތުންނަށް އެހީވާން މި ޓެލެތޯން ބޭއްވީ މި އަހަރުގެ ޖޫން 12 ވަނަ ދުވަހުގެ ހެނދުނު 8:00 އިން އިން ދަންވަރު 12:00 އާ ހަމައަށެވެ. ދައުލަތުގެ އެކި މުއައްސަސާތަކާއި ސްކޫލުތަކާއި އަމިއްލަ ފަރުދުންނާއި ކުންފުނިތަކުން އެހީތެރިކަން ފޯރުކޮށްދިން މި ޓެލެތޯނުގެ ފުރަތަމަ ހަ ގަޑިއިރުގެ ތެރޭގައި ވެސް 1.8 މިލިއަން ރުފިޔާ ލިބުނެވެ.

ފަލަސްތީނަށް އެހީވުމަށް މާލޭގެ 13 ސަރަަހައްދެއްގައި ފަންޑު ފޮށި ބެހެއްޓި އެވެ.