ގައްޒާގެ ރެފިއުޖީ ކޭމްޕަކަށް ދިން ހަމަލާ ދިވެހި ސަރުކާރުން ކުށްވެރިކޮށްފި

ގައްޒާގެ ގިނަ ބަޔަކު ދިރިއުޅެމުން އަންނަ ޖަބަލިއްޔާ ރެފިއުޖީ ކޭމްޕަށް އިޒުރޭލަށް ރޭގައި ދިން ހަމަލާ ދިވެހި ސަރުކާރުން މިއަދު ކުށްވެރިކޮށްފި އެވެ.

ފޮރިން މިނިސްޓްރީން ނެރުނު ނޫސްބަޔާނެއްގައި ބުނީ ޖަބަލިއްޔާ ރެފިއުޖީ ކޭމްޕަށް ދިން އެ ހަމަލާގައި ފަލަސްތީނުގެ ގިނަ އަދަދެއްގެ ބަޔަކު ޝަހީދުވެ، އެތައް ބަޔަކު ޒަހަމްވެފައިވާ ކަމަށެވެ. އަދި އޭގެ ތެރޭގައި ގިނަ އަދަދަކަށް ކުޑަކުދިން ހިމެނޭ ކަމަށް ވެސް މިނިސްޓްރީން ބުންޏެވެ.

"އާންމު ރައްޔިޔުންނާ ދެކޮޅަށް އިޒުރޭލުން ދެމުން ގެންދާ ހަމަލާތަކާއި ކުރަމުން ގެންދާ ލާއިންސާނީ އަމަލުތަކަކީ ބައިނަލްއަގުވާމީ އިންސާނީ ހައްގުތަކުގެ ގާނޫނުތަކާ ހިލާފު އަމަލުތަކެއް ކަމަށް ދިވެހި ސަރުކާރުން ދެކެމެވެ،" އިޒުރޭލުގެ އަމަލުތައް ކުށްވެރިކޮށް ނެރުނު ބަޔާނުގައި ބުންޏެވެ.

އެ ބަޔާނުގައި ބުނީ ފަލަސްތީނުގެ ކުށެއް ނެތް މީހުންނަށް ދޭ ހަމަލާތަށް ހުއްޓުވުމަށާއި އދ. ގެ އާންމު މަޖިލީހުން މިދިޔަ ހޯމަ ދުވަހު ފާސްކޮށްފައިވާ ގަރާރާ އެއްގޮތަށް ކުރެވެން ހުރި ހުރިހާ މަސައްކަތެއް ކުރުމަށް ބައިނަލްއަގުވާމީ މުޖުތަމު އަށް ރާއްޖެއިން ގޮވާލާ ގޮވާލުން ތަކުރާރުކުރާ ކަމަށެވެ.

ފަލަސްތީނަށް އިންސާނީ އެހީތެރިކަން ފޯރުކޮށްދިނުމަށް ކުރާ މަސައްކަތް އިތުރަށް ވަރުގަދަ ކުރަން ވެސް ދިވެހި ސަރުކާރުން ގޮވާލި އެވެ.

ސަރުކާރުން ވަނީ މީގެ ކުރިން ވެސް އިޒުރޭލުގެ އަމަލުތައް ކުށްވެރިކޮށް ބަޔާންތައް ނެރެފަ އެވެ. އަދި އދ. ގައި ވެސް އިޒުރޭލާ ދެކޮޅަށް އަޑުއުފުލާފައިވެ އެވެ.

މި މަހު ހަތެއްގައި ހަމާސް ޖަމާއަތުން އިޒުރޭލަށް ދިން ހަމަލާގެ ބަދަލުގައި އިޒުރޭލުން އަންނަނީ ފަލަސްތީނަށް ވަރުގަދަ ހަމަލާތަކެއް ދެމުންނެވެ. އިޒުރޭލުގެ ލާއިންސާނީ އަނިޔާގައި ފަލަސްތީނުގެ 8،000 ވުރެ ގިނަ މީހުން މަރުވެ، އެތައް ލައްކަ ބަޔަކު ވަނީ ހާލުގައި ޖެހިފަ އެވެ.