ސަރުކާރުތަކަށް މަސައްކަތް ކުރެވިއްޖެ، ދެން ބޭނުންވަނީ އައްޑޫ މީހުންގެ ހިއްސާ: މޭޔަރު

އައްޑޫގައި ޓޫރިޒަމް ފުޅާކުރުމަށް ކޮންމެ ސަރުކާރަކުން ވެސް ބޮޑު ހޭދައެއް ކޮށްފައިވާ ކަމަށާއި މިހާރު ބޭނުންވަނީ އައްޑޫ މީހުންގެ ހިއްސާ ކަމަށް އައްޑޫ މޭޔަރު އަލީ ނިޒާރު ރޭ ވިދާޅުވެއްޖެ އެވެ.

އޭނާ އެހެން ވިދާޅުވީ، ރާއްޖޭގެ އެންމެ ދެކުނުގައި އޮތް އަތޮޅު އަދި މާލެ ފިޔަވައި އެންމެ އާބާދީ ބޮޑު އަތޮޅުގައި ޓޫރިޒަމް ފުޅާކުރުމަށް އައްޑޫ ސިޓީ ކައުންސިލުން އިސްނަގައިގެން ހާއްސަ މަސައްކަތްތަކެއް ފެށުމަށް އައްޑޫގެ ޓޫރިޒަމް އިޝްތިހާރު ކުރުމުގެ ބްރޭންޑް އިފުތިތާހު ކުރުމުގެ ޖަލްސާގަ އެވެ.

އައްޑޫގެ ޓޫރިޒަމް ޕްރޮމޯޓް ކުރުމުގެ ބްރޭންޑް ނަމަކީ "އައްޑޫ- ބިއޯންޑް ދަ އީކުއޭޓާ" އެވެ.

ކެނަރީފް ރިސޯޓުގައި ރޭ ބޭއްވި ޖަލްސާގައި ވާހަކަ ދައްކަވަމުން މޭޔަރު ވިދާޅުވީ، އައްޑުއަކީ ޓޫރިޒަމްގެ މަންޒިލެއްގެ ގޮތުގައި މުޅި ދުނިޔެއަށް "ވިއްކަން" އެ ސިޓީގެ މީހުންގެ ހިއްސާ މިހާރަށް ވުރެ ބޮޑުވާން ޖެހޭ ކަމަށެވެ. އަދި އެހެން ރަށްރަށުން އޭގެ މިސާލުތައް ނެގުމަށް އެދިވަޑައިގަތެވެ.

ގެސްޓް ހައުސް ވިޔަފާރީގައި މިހާރު އެންމެ ކުރީގައި އުޅޭ އެއް ރަށް، ތޮއްޑޫގެ ނަން ފާހަގަކުރައްވަމުން ނިޒާރު ވިދާޅުވި ގޮތުގައި އެއީ ސަރުކާރުގެ މަސައްކަތުން އައި ކުރިއެރުމެއް ނޫނެވެ.

"އެ އިންޑަސްޓްރީ އަށް މަސައްކަތްކުރާ ހިތުން ތިއްބެވި ބޭފުުޅުން ޑޮލަރު ހޯދަން ކުރި ކަންކަމުގެ ނަތީޖާ. ހިންމަފުށި، މާފުއްޓަށް އައިސްފައި އޮތް ބަދަލު ނިކަން ބައްލަވާ،" ތޮއްޑޫ ކައުންސިލްގެ ރައީސް ކަރަމް ވެސް އިންނެވި ޖަލްސާގައި އައްޑޫގެ މޭޔަރު ވިދާޅުވި އެވެ.

އޭނާ ވިދާޅުވީ، އައްޑޫގެ އެންމެ ގާތް އެކުވެރިޔާ ފުވައްމުލަކަށް ޓޫރިޒަމް ގެނެވިދާނެ ކަމަށް ގަބޫލުކުރި އެއްވެސް އެކްސްޕާޓަކު ނެތް ކަމަށާއި އެކަމަކު އެ ސިޓީގައި ވެސް އެ ވިޔަފާރި ފުޅާކޮށް މިހާރު އެބަ ހިންގާ ކަމަށެވެ.

ނިޒާރު ވިދާޅުވި ގޮތުގައި، އެއީ ޓޫރިޒަމް ސިނާއަތުގައި މަސައްކަތްކުރަން ބޭނުންވާ ޒުވާނުންނާއި އެކަމަށް ހަރަދު ކުރަން ޝައުގުވެރިވާ މީހުން ރިސްކު ނަގައިގެން ކުރި ކަންތައްތަކުގެ ނަތީޖާ އެވެ.

"އަޅުގަނޑުމެންނަށް މަސަައްކަތް ކުރެވިއްޖެ. ވަރުބައްޔެއް ނުވޭ. އަދިވެސް މަސައްކަތް ކުރާ ގޮތަށް މިތިބީ. އަދި އަޅުގަނޑުމެންގެ ފަހަތުން އަންނަ ކައުންސިލުން ވެސް މި މަސައްކަތް ކުރާނެ. އެހެނަސް މިއީގައި އަޅުގަނޑުމެން އައްޑޫ ސިޓީގެ ރައްޔިތުންގެ ހިއްސާ އިތުރަށް ބޮޑުކުރަން އެބަޖެހޭ،" ނިޒާރު ވިދާޅުވި އެވެ.

އޭނާ ވިދާޅުވީ، ރާއްޖޭގެ އެހެން ރަށްރަށުގައި ނެތް އެތައް ކަމެއް އައްޑޫގައި އެބައޮތްކަން ރޭގެ އިވެންޓުން ވެސް ފާހަގަވި ކަމަށެވެ. ޓޫރިސްޓަކު އައްޑު އަށް ގެންގޮސް ހަފުތާއެއް ނުވަތަ ދެ ހަފުތާ ވަންދެން އެ ޓޫރިސްޓު މީހާ ކޮންމެވެސް ކަމެއްގައި ޝާމިލް ކުރެވޭނެކަން އެނގޭ ކަމަށް ވިދާޅުވި އެވެ.

"މި ކަންކަމާ އެކު، އައްޑޫގައި އިންވެސްޓް ކުރަން ޖެހިލުން ވުމުގެ އެއްވެސް ސަބަބެއް އަޅުގަނޑަކަށް ނުވިސްނޭ. އައްޑޫގައި ވަރަށް ހީވާގި ކަމާއެކު މި މަސައްކަތް ކުރައްވާ ބޭފުޅުން އެބަތިއްބަވާ. ޖެހިލުން ކުޑަކޮށް މި އިންވެސްޓް ކުރައްވާ ބޭފުޅުން އެބަތިއްބެވި. އަދި އެ ރިސްކު ނަންގަވައިގެން މަސައްކަތްކުރާ، ގެއްލުމުގައި ވެސް މަސައްކަތް ކުރައްވާ ބޭފުޅުން އެބަތިއްބަވާ،" މޭޔަރު ވިދާޅުވި އެވެ.

މިވަގުތު އައްޑޫގެ ޓޫރިޒަމްގެ ހާލަތަށް ބައްލަވައިލައްވަމުން އޭނާ ވިދާޅުވީ، ކެނަރީފްގައި މިހާރު ވެސް 400 އާ ގާތްކުރާ އަދަދަކަށް ޓޫރިސްޓުން އެބަތިބި ކަމަށެވެ. ސައުތު ޕާމްގެ މިވަގުތުގެ އޮކިއުޕަންސީ މޭޔަރު ވިދާޅުވިގޮތުގައި 60 ޕަސެންޓަށް ވުރެ މައްޗެވެ.

"އީކުއޭޓަ ވިލެޖު ބަންދެއް ނުކުރޭ ކޮވިޑް ތެރޭގައި ވެސް. ކޮވިޑްގައި ވެސް ހުޅުވިފައި ހުރި ހަމައެކަނި ސިޓީ ހޮޓާތަކުގެ ތެރޭގައި އީކުއޭޓަ ވިލެޖު ހިމެނޭ. އަދި ކާމިޔާބުކަމާ އެކު، ބައިވެރިވާ ހުރިހާ ތަނަކުން އެވޯޑް އެބަގެންނަވާ. ގެސްޓް ހައުސްތަކުގައި ވެސް ގެސްޓުން ގެންނަން ބޭނުންވާ ބޭބޭފުޅުން ގެސްޓުން އެބަ ގެނޭ،" ނިޒާރު ވިދާޅުވި އެވެ.

"ރާއްޖޭގައި މި އަށް ވުރެ ވަކި ކަނޑުގެ އަޑީގެ ރީތި ތަނެއް ނެތް ކަމަށް ޑައިވް ކުރައްވާ ބޭފުޅުން އެބަ ވިދާޅުވޭ. ރާއްޖޭގައި އޮތް އެންމެ ބޮޑު ރަށް މިތާނގައި އެބައޮތް. ބްރިޓިޝް ރޯޔަލިޓީ އެބައޮތް މިތާނގައި. އެ ވާހަކަ ދައްކާ މީހުން މަދު މި އިޝްތިހާރު ކުރަން."

މޭޔަރު ވިދާޅުވިގޮތުގައި ފުވައްމުލައް ހިމެނޭ ސަރަހައްދުގައި އުޅޭ އަދަދަށް އައްޑޫ ކަނޑުގައި ވެސް މިޔަރުތައް އުޅެ އެވެ. އެކަމަކު، އައްޑޫ ކަނޑުގައި އުޅޭ މިޔަރުތައް މާ ބޮޑެއްޗެވެ.

"އިޝްތިހާރު ކޮށްގެން މިކަން ކުރަން ބޭނުންވަނީ. މި ހީވާގި ކަމާއެކު މަސައްކަތް ކުރާނެ ބަޔަކު ބޭނުންވަނީ. މިކަން ކުރެވިއްޖެ ނަމަ އައްޑޫ ވެސް ޔުނީކް ޑެސްޓިނޭޝަނެއްގެ ގޮތުގައި ތަފާތު މަންޒިލެއްގެ ގޮތުގައި އައްޑޫ ކުރިއަށް ގެންދވިދާނެ ކަމާ ދޭތެރޭ ޝައްކެއް ނެތް އެއިރަކު ވެސް މިހާރަކު ވެސް މާދަމާއަކު ވެސް،" އޭނާ ވިދާޅުވި އެވެ.

ނިޒާރު ވިދާޅުވީ، ހިޔާލު ތަފާތުވުން ހުންނާނެ ކަމަށާއި އެކަމަކު ބޭނުންވަނީ އެ ހިޔާލުތައް އެއްގޮތް ކަމަށެވެ. އޭނާ ވިދާޅުވީ، މާލެ އިން އައްޑު އަށް ކުރާ ދަތުރުގެ އަގު ބޮޑުވާނެ ކަމަށާއި ސީޕްލޭނުން މާލެ އިން ވ. އަތޮޅަށް ދާން ވެސް ޓޫރިސްޓުން 400 ޑޮލަރު ހޭދަކުރާ ކަމަށެވެ.

"އައްޑު އަށް 300 ޑޮލަރު ދީފައި އައުމަކީ މައްސަލައެއް ނޫން. މި ކެނަރީފްގައި މިދިޔަ ހަފުތާގައި ނޫން ކުރީ ހަފުތާގެ ވީކެންޑަށް އަޅުގަނޑު އައިން. މިތާނގައި ހުރި ޓޫރިސްޓަކާ އަޅުގަނޑު ވާހަކަ ދެއްކިން. އަޅުގަނޑަކީ ކާކުކަން އެނގުނީމާ އަޅުގަނޑާ ވާހަކަ ދައްކަން އޭނާ ވެސް ޝައުގުވެރިކަން ހުރީމާ ވާހަކަ ދެއްކިން،" ނިޒާރު ވިދާޅުވި އެވެ.

"އަޅުގަނޑު އެހިން މިތަނަށް އައުމުގައި ހުރި ދަތިތަކާ މެދު ކިހިނެއްހޭ ވިސްނަނީ؟ ނިއުޒީލެންޑުން [ގެސްޓްމީހާ] މި ތަނަށް އައީ. ތިމަންނަގެ އެއްވެސް މައްސަލައެއް ނެތޭ [ބުނީ]. ތިމަންނަ ހަމަ އެންޖޯއިވާ ދަތުރެއްގެ ގޮތުގައޭ ދަތުރު ދިޔައީ."

މޭޔަރު ވިދާޅުވީ، އެ ޓޫރިސްޓްމީހާ އައްޑު އަށް ދިޔައީ މާލޭގައި ވެސް ތިން ގަޑިއިރު ހޭދަކޮށްފައި ކަމަށާއި އޭނާގެ ފަރާތުން މައްސަލައެއް ފެނިވަޑައިނުގެންނެވި ކަމަށެވެ.

އައްޑޫގައި ޓޫރިޒަމް ފުޅާކުރުމުގައި ވިޔަފާރިންގެ މައިގަނޑު އެއް ޝަކުވާއަކީ އެއާލައިންގެ އަގުބޮޑުވުން ކަމަށް ވީ ނަމަވެސް މޭޔަރު ރޭ ވިދާޅުވީ، ހަގީގަތުގައި މާލެ-އައްޑޫ ޓިކެޓުގެ އަގު ބޮޑު ނޫން ކަމަށެވެ.

"އެ ޝަކުވާގައި އަޅުގަނޑުމެން އަބަދު ދެމިތިބުމަކީ ހައްލެއް ނޫން. އެހެންވީމާ ގޮންޖެހުންތަކުން އަރައިގަނެވޭނީ މަސައްކަތް ކޮށްގެން،" އޭނާ ވިދާޅުވި އެވެ.

އައްޑޫ ސިޓީ ކައުންސިލުން ކުރި މަސައްކަތް އެހެން ބަޔަކަށް ނުކުރެވޭ

މޭޔަރު ވިދާޅުވީ، އައްޑޫގައި ޓޫރިޒަމް ފުޅާކުރަން އައްޑޫ ސިޓީ ކައުންސިލުން ކުރި މަސައްކަތާ އެއްވަރަށް ރާއްޖޭގެ އެއްވެސް ކައުންސިލަކުން މަސައްކަތް ކުރެވުނުހެން ހީނުވާ ކަމަށެވެ. ވިދާޅުވީ، މިދިޔަ ސިޓީ ކައުންސިލުން އައްޑޫގައި ޓޫރިޒަމް ޒޯންތަކެއް ގާއިމްކޮށްފައިވާ ކަމަށެވެ.

އިންޑިއާ ސަރުކާރުން ދިން ހިލޭ އެހީގެ ތެރެއިން 30 މިލިއަން ރުފިޔާ ހަރަދު ކޮށްގެން އެ ތަންތަން ލޭންޑްސްކޭޕް ކޮށްފައިވާ ކަމަށް ވިދާޅުވި އެވެ.

"ހިލޭ ޓޫރިޒަމަށް އަޅުގަނޑުމެން ބިން ދެނީ. ތަކުރާރުކޮށް އަޅުގަނޑު ދަންނަވަން އަކަ މީޓަރަކަށް ޑޮަލަރެއް އަހަރަކަށް މި ނަގަނީ. މާދަން އަޔަސް ގަވާއިދާއި އުސޫލުގެ ތެރެއިން ކުރެވެން އޮތް އެންމެ އަވަހަކަށް އައްޑޫގައި އިންވެސްޓް ކުރަން އަންނަ މީހުންނަށް އެ އިންވެސްޓްތަކުގެ ފުރުސަތު ދޭން،" މޭޔަރު ވިދާޅުވި އެވެ.

"އަޅުގަނޑުމެން ވަރަށް ފަހުން ޑައިވިން ސްކޫލްތަކަށާއި ވޯޓަ ސްޕޯޓްސް ފެސިލިޓީތަކަށް ބޭނުންވާ ބިންތައް އެ ތަން ބޭނުންވާ ކުދިންނާ ހަވާލުކުރިން. އަޅުގަނޑުމެން 12 ބިން އިއުލާން ކުރިން ހިތަދޫން. އެހެން އަވަށްތަކުން ވެސް އެކަން ކުރުމުގެ މަސައްކަތް މި ކުރަނީ."