ކިޔޫ ކުޑަކުރަން އައިޖީއެމްއެޗުގެ ތިން ޑިޕާޓްމެންޓެއްގައި ބަލި މީހުން ބަލާ ވަގުތު އިތުރުކޮށްފި

ޑިމާންޑު ބޮޑުވުމުން އައިޖީއެމްއެޗްގެ ތިން ޑިޕާޓްމަންޓެއްގެ ޝިފްޓް ޑިއުޓީ އިތުރުކޮށްފި އެވެ.

މާލެ ހޮސްޕިޓަލްސް ގްރޫޕުން އިއްޔެ ބޭއްވި ނިއުސް ކޮންފަރެންސްގައި، "މިހާރު"ން ކުރި ސުވާލާ ގުޅިގެން، ސަރުކާރުގެ މައި ހޮސްޕިޓަލްގެ މެޑިކަލް ޑިރެކްޓަރު، ޑރ. އާމިނަތު ޒޭބާ އަހުމަދު ވިދާޅުވީ އަންހެނުންގެ ބަލިތަކާއި ނަފްސާނީ ބަލިތައް އަދި ދަތުގެ މައްސަލަތަކަށް ފަރުވާ ދޭ ޑިޕާޓްމަންޓުގެ ކިއު ދިގުވުމުން ބަލި މީހުން ބަލާ ވަގުތު އިތުރުކޮށްފައިވާ ކަމަށެވެ.

މީގެ ކުރިން ރަސްމީ ވަގުތުތަކުގައި ހަދަމުން ދިޔަ ކޮންސަލްޓޭޝަން، އިތުރު ޝިފްޓާއެކު ރޭގަނޑު 8:00 އާ ހަމައަށް ބަލި މީހުން ބަލަމުން އަންނަތާ ދުވަސްކޮޅެއް ވެފައިވާ ކަމަށް އޭނާ ވިދާޅުވި އެވެ.

އެއީ އެއް ފަރުވާއެއް ނުވަތަ އެއް ކަމެއްގައި ފަރުވާ ހޯދަން ނުވަތަ ޑޮކްޓަރަށް ދެއްކުމަށް ކިއުގައި މަޑުކުރަންޖެހޭ ތިން ޑިޕާޓްމަންޓެވެ. އެހެންވެ، އެޕޮއިންޓްމަންޓް ލިބުމުގައި ގިނަ ވަގުތު ނަގަ އެވެ.

ސީއީއޯ އިބްރާހިމް އަބްދުއްރައްޒާގް ހަލީމް ވެސް ވިދާޅުވީ އާ ވަސީލަތްތައް ތައާރަފްކުރުމާ އެކު މެނޭޖްމަންޓުން ވެސް ރަނގަޅުކުރަންޖެހޭ ކަންތައްތައް އެބަހުރި ކަމަށެވެ. ބައެއް ޑިޕާޓްމަންޓުތައް ދެ ޝިފްޓަށް އިތުރުކުރަން ވެސް މަސައްކަތްކުރާ ކަމަށް އޭނާ ވިދާޅުވި އެވެ.

"މަޑުމަޑުން މިކަންކަން ރަނގަޅުކުރެވޭ ގޮތަކަށް ކަންކަން ބައްޓަންވެގެން ގޮސް، މި ދެންނެވި ނިޒާމަކުން [ޖީޕީ ސިސްޓަމް]ގުޅިގެން ދިޔައީމަ އެޕޮއިންޓްމަންޓް ލިބުމުގައި ވެސް ފަސޭހަތަކެއް ވެގެންދާނެ،" ހަލީމް ވިދާޅުވި އެވެ.

މާލެ ހޮސްޕިޓަލްސް ގްރޫޕުން އަންނަނީ މާލޭގެ ހަތަރު ސަރަހައްދެއްގައި ޖީޕީ ކްލިނިކް ހުޅުވައި ރިފަރަލް ސިސްޓަމަކަށް ދިއުމަށް ތައްޔާރުވަމުންނެވެ. އޭރުން، ސްޕެޝަލިސްޓުންނަށް ދެއްކުމަށް އޮންނަ ކިއު ވެސް ކުޑަ ކުރެވޭނެ ކަމަށް އޭނާ ހަލީމް ވިދާޅުވި އެވެ.