ބެޔާން އަތުން މޮޅުވިޔަސް ބާސެލޯނާއަކީ ފޭވަރިޓެއް ނޫން: ފްލިކް

ޔުއެފާ ޗެމްޕިއަންސް ލީގު ހަ ފަހަރު ކާމިޔާބުކޮށްފައިވާ ޖަރުމަނުގެ ގަދަބާރު ބެޔާން މިއުނިކް އަތުން 4-1 އިން މޮޅުވެވުނަސް، އޭނާގެ ޓީމަކީ މުބާރާތުގެ ފޭވަރިޓެކޭ ބުނަން އަދި މާ އަވަސް ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ.

ބާސެލޯނާ އިން މުބާރާތް އެންމެ ފަހުން ކާމިޔާބުކުރީ 2015 ގަ އެވެ. އޭގެ ފަހުން މުބާރާތުގައި އެދެވޭ ނަތީޖާއެއް ނުނެރެވުމުގެ އިތުރުން ބާސެލޯނާ ވަނީ ބެޔާންއާ ދެކޮޅަށް އެންމެ ފަހުން ކުޅުނު ހަ މެޗުން ވެސް ބަލިވެފަ އެވެ. އޭގެ ތެރޭގައި ބެޔާނުގެ ކޯޗަކަށް ފްލިކް ހުރިއިރު ކުޅުނު މެޗުތައް ވެސް ހިމެނެ އެވެ.

އެކަމަކު ބެޔާނުގެ ދަނޑުގައި ރަފީނިއާގެ ހެޓްރިކާ އެކު ބާސެލޯނާ މި ހޯދި މޮޅާ އެކު އެ ޓީމަކީ މި ސީޒަނުގެ ޗެމްޕިއަންސް ލީގު ކާމިޔާބުކުރުމުގެ ފުރުސަތު ބޮޑު ޓީމެއް ކަމަށް މީޑިއާތަކުން އަންނަނީ ބުނަމުންނެވެ.

"އެހެން ބުނަން އަދި މާ އަވަސް،" ފްލިކް ބުންޏެވެ.

"އަހަރެމެން އަދި ސީޒަން ކިރިޔާ މި ފެށީ. ސްޕެނިޝް ލީގާއި ޗެމްޕިއަންސް ލީގުގައި އަދި ދިގު ރާސްތާއެއް އެބައޮތް ކަޑައްތުކުރަން ޖެހޭ."

ފްލިކް ބުނީ އޭނާ އާއި ޓީމުގެ ވިސްނުން ހުރީ ކޮންމެ މެޗަކަށް ވަކިން ކަމަށާއި، ތަށްޓާ މެދު ވިސްނާނީ ފައިނަލަށް ދެވުމުން ކަމަށެވެ.

ބާސެލޯނާ އަށް ދެން އޮތީ ވެސް ވަރުގަދަ ޓެސްޓެކެވެ. އެއީ މިދިޔަ ސީޒަނުގެ ސްޕެނިޝް ލީގާއި، ޗެމްޕިއަންސް ލީގު ކާމިޔާބުކުރި ރެއާލް މެޑްރިޑާ ދެކޮޅަށް ހޮނިހިރު ދުވަހުގެރޭ ކުޅޭ މެޗެވެ.

"ބެޔާން އަތުން މި ލިބުނު ނަތީޖާއާ މެދު ފަހުރުވެރިވަން. އެކަމަކު ހޮނިހިރު ދުވަހުގެރޭ އެއީ މުޅިން އެހެން މެޗެއް އެކަމަކު ހަމަ އެހާ ވަރުގަދަ ޓީމަކާ ދެކޮޅަށް ކުޅެން މި ޖެހެނީ،" ފްލިކް ބުންޏެވެ.

"އަހަރެމެން ބޭނުންވޭ އެ މެޗުގައި ވެސް ވަރުގަދަ ކުޅުމެއް ދައްކަން."

ބާސެލޯނާގެ ދަނޑުގައި ރޭ ކުޅުނު މެޗުގެ ފުރަތަމަ މިނެޓުގައި ރަފީނިއާ ވަނީ އެ ޓީމަށް ކުރި ހޯދައިދީފަ އެވެ. އެކަމަކު 18 ވަނަ މިނެޓުގައި ހެރީ ކޭން ވަނީ ބެޔާނަށް ނަތީޖާ އެއްވަރުކޮށްދީފަ އެވެ. ބާސެލޯނާ އަށް އަލުން ލީޑު ނަގައިދިނީ 36 ވަނަ މިނެޓުގައި ރޮބަޓް ލެވޮންޑޮސްކީ އެވެ. އަދި ފުރަތަމަ ހާފުގެ ފަހު މިނެޓުގައި ރަފީނިއާ ތަފާތު ބޮޑުކޮށްދިނެވެ. އޭނާ ހެޓްރިކް ފުރިހަމަކުރީ ދެ ވަނަ ހާފު ފަށައިގެން 56 ވަނަ މިނެޓުގަ އެވެ.

މި ނަތީޖާއާ އެކު ބާސެލޯނާ އޮތީ ހަ ޕޮއިންޓް ހަމަކޮށް 10 ވަނައިގަ އެވެ. އެއް ވަނައިގައި ނުވަ ޕޮއިންޓާ އެކު އޮތީ އިނގިރޭސި ލީގުގެ އެސްޓަން ވިލާ އެވެ.

މުބާރާތުގައި ރޭ ސްޕެއިނުގެ އެތުލެޓިކޯ މެޑްރިޑް ވަނީ ފްރާންސްގެ ލިލެ އަތުން 3-1 އިން ބަލިވެފަ އެވެ. އެތުލެޓިކޯގެ ހޫލިއަން އަލްވަރޭޒް އެ ޓީމަށް ކުރި ހޯދައިދީފައިވަނިކޮށް ލިލެ މޮޅުވީ އެޑޮން ޒެގްރޯވާ ޖެހި ގޯލާއި، ޖޮނަތަން ޑޭވިޑް ޖެހި ލަނޑާ އެކު އެވެ.