ރިސޯޓް ހަދަން ދޫކޮށް އެއްވެސް މަސައްކަތެއް ނުހިނގާ 22 ރަށެއް އަތުލަން އޭޖީގެ ލަފާ ހޯދަނީ

ރިސޯޓު ހަދަން ދޫކޮށްފައިވާ ރަށްތަކުގެ ތެރެއިން އެއްވެސް މަސައްކަތެއް ކުރިއަށް ނުގެންދާ 22 ރަށެއްގެ އެއްބަސްވުން ބާތިލް ކުރުމަށް އެޓާނީ ޖެނެރަލް އަހުމަދު އުޝާމްގެ ލަފަޔަކަށް އެދިވަޑައިގެންފައިވާ ކަމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ފައިސަލް ވިދާޅުވީ ޓޫރިޒަމްގެ ބޭނުމަށް ދޫކޮށްފައިވާ ރަށްތަކުގެ ތެރެއިން މަސައްކަތް ނުހިނގާ ކަމަށް 58 ރަށެއް ފާހަގަކުރެވިފައިވާ ކަމަށެވެ. އޭގެ ތެރެއިން ބައެއް ރަށްތަކަކީ ދޫކުރިތާ 15 އަހަރު، 20 އަހަރު އަދި 30 އަހަރު ވެސް ވެފައިވާ ރަށްތަކެއް ކަން ފައިސަލް ފާހަގަކުރެއްވި އެވެ.

ފައިސަލް ވިދާޅުވީ، މި ރަށްތައް ނަގާފައި ތިބި ފަރާތްތައް ހާޒިރުކޮށް ތަރައްގީކުރުމަށް ކުރަމުންދާ މަސައްކަތްތަކާއި ހުރި ހުރަސްތައް ސާފުކޮށް އެކަން ހައްލުކުރުމަށް އިކޮނޮމިކް ކައުންސިލުން ކަރުދާހެއް އެކުލަވާލައިފާއިވާ ކަމަށެވެ.

ނަމަވެސް، 22 ރަށެއްގައި އެއްވެސް ވަރަކަށް މަސައްކަތް ނުހިނގާތީ، އެއްބަސްވުން ބާތިލް ކުރުމަށް އޭޖީގެ ލަފަޔަކަށް އެދިފައިވާ ކަމަށާއި ލަފާ ލިބުނު ހާ އަވަހަކަށް އެކަން ކުރިއަށް ގެންދާނެ ކަމަށް އޭނާ ވިދާޅުވި އެވެ.

މިގޮތަށް ދޫކޮށްފައި ހުންނަ ރަށްތަކުގެ އެއްބަސްވުން ބާތިލް ކުރުމުން ކޯޓަށް ގޮސް އެކަށީގެންނުވާ ބަދަލުތަކެއް މީގެ ކުރިން ހޯދާފައިވެ އެވެ. އެކަން ހައްލުކުރުމަށް ޓޫރިޒަމް ގާނޫނަށް އިސްލާހު ގެނައުމަށް ނިންމާފައިވާ ކަމަށް ވެސް ފައިސަލް ވިދާޅުވި އެވެ.

ފައިސަލް ވިދާޅުވީ އެ އިސްލާހުތައް ވަރަށް އަވަހަށް މަޖިލީހަށް ހުށަހަޅާނެ ކަމަށެވެ.