އަންނަ އަހަރު އައްޑޫގައި ޓޫރިޒަމް ސިމްޕޯޒިއަމެއް ބާއްވަނީ

އައްޑޫގައި ޓޫރިޒަމަށް ހުރި ފުރުސަތުތަކާއި ވަޒީފާގެ ފުރުސަތުތައް ކިޔައިދިނުމަށް ޓޫރިޒަމް ސިމްޕޯޒިއަމެއް ބާއްވާނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ރޭ ވިދާޅުވެއްޖެ އެވެ.

އައްޑޫގެ ޓޫރިޒަމް ބްރޭންޑް ލޯންޗު ކުރުމަށް ރޭ ކެނަރީފް ރިސޯޓުގައި ބޭއްވި ރަސްމިއްޔާތުގައި ފައިސަލް ވިދާޅުވީ، ސުވާލަކީ އައްޑޫގައި ޓޫރިޒަމް ޑިވޮލޮޕްމެންޓް އިތުރުކުރާނީތޯ ނުވަތަ މިހާރު ހުރި އަދަދަށް އިތުރަށް ބްރޭންޑުކޮށް، ކަނެކްޓިވިޓީ އިތުރުކުރާނީތޯ ކަމަށެވެ.

ފައިސަލް ވިދާޅުވީ، މިވަގުތަށް އެންމެ މުހިންމީ ޓޫރިޒަމަށް ހުރި ފުރުސަތުތަކަށް ރައްޔިތުންނަށް ހޭލުންތެރިވެ، މިކަމުގައި ހުރި ފުރުސަތުތައް ޒުވާން ޖީލަށް ކިޔައިދިނުން ކަމަށެވެ.

އަންނަ އަހަރު ތެރޭގައި އެކަމަށް އައްޑޫގައި ޓޫރިޒަމް ސިމްޕޯޒިއަމެއް ބާއްވާނެ ކަމަށާއި އެ ލީޑު ކުރާނީ އެމްއެމްޕީއާރްސީން ކަމަށް ފައިސަލް ވިދާޅުވި އެވެ.

މި ސިމްޕޯޒިއަމްގައި އިންޑިއާ އާއި ޗައިނާގެ ޓުއާ އޮޕަރޭޓަރުންނާއި އެއާލައިންތަކާއި އޮންލައިން ބުކިން ޕްލެޓްފޯމްތައް ބައިވެރިކުރާނެ ކަމަށް ވެސް އޭނާ ވިދާޅުވި އެވެ.

"މިގޮތަށް މަސައްކަތް ކޮށްގެން ނޫނީއްޔާ ހަމަ ވަރަށް އުނދަގޫ ކަމަކަށް ވާނެ. އަޅުގަނޑު ގަބޫލުކުރަނީ މި މަސައްކަތް ވެގެން ދާނީ ވަރަށް މުހިންމު މަސައްކަތަކަށް ކަމަށޭ، މުގޮތަށް އެންމެން ނެޓްވޯކެއް ސެޝަނެއް ކުރިއަށް ގެންދެވިއްޖެއްޔާ،" ފައިސަލް ވިދާޅުވި އެވެ.

މިހާރު އައްޑޫގައި ހުރީ 1،100 އެނދުކަން ފާހަގަކުރައްވައި ފައިސަލް ވިދާޅުވީ، އައްޑޫގައި އިތުރަށް އެނދު ތަރައްގީކުރަން، ގަން އިންޓަނޭޝަނަލް އެއާޕޯޓު ހިންގުމުގެ ހިއްސާ އޮންނަ ކާސާ ހޯލްޑިންސް އިން ބޭނުންވާ ކަމަށެވެ.

ފައިސަލް ވިދާޅުވީ އެ ކުންފުނިން ބޭނުންވަނީ ގަމުގައި 130 އެނދުގެ ޓޫރިސްޓު ހޮޅެލެއް އަޅަން ކަމަށާއި އެކަމަށް މަގުފަހިކުރަން ސަރުކާރުގެ ތެރެއިން ކުރަން ހުރި ކަންކަން ކުރަމުން އަންނަ ކަމަށެވެ.