ޓޫރިޒަމް: އުނދަގޫ ނިންމުންތަކެއް، 400 މިލިއަން ޑޮލަރުގެ އިންވެސްޓްމެންޓް

ރާއްޖޭގެ މުޅި އިގްތިސާދު ހިންގާ ޓޫރިޒަމް ދާއިރާގައި ކުރިއަށް އޮތީ މިނިސްޓަރު އިބްރާހިމް ފައިސަލްގެ ޕްލޭންގައިވާ ގޮތުން، މާބޮޑަށް ވެސް ކުރިއެރުމެވެ. އޭނާގެ އަމާޒަކީ އަންނަ އަހަރު 2.5 މިލިއަން ޓޫރިސްޓުން ރާއްޖެ ގެނައުމެވެ.

ރާއްޖެ އޮތް ހާލަތުން، މި ސަރުކާރުގެ އަހަރެއްހާ ދުވަހުގެ ތެރޭގައި އުނދަގޫ ނިންމުންތަކެއް ނިންމަން ޖެހުނު ނަމަވެސް ރާއްޖޭގެ ޓޫރިޒަމްގައި ހާސިލްކުރަން އުނދަގޫ އަމާޒެއް ނެތެވެ. މިނިސްޓަރު ވިދާޅުވީ އިންވެސްޓަރުންގެ ޝައުގުވެރިކަން ނުގެއްލޭ ކަމަށެވެ. ހުރި ކަންބޮޑުވުންތައް ހައްލު ކުރެވޭނެ އެވެ. ޓޫރިޒަމަށް މި އަހަރު ދޫކުރި ގިނަ ރަށްތައް ދިވެހިން ނެގުމަކީ ވެސް މިނިސްޓަރު ދެކެވަޑައިގަންނަވާ ގޮތުގައި ރަނގަޅު މިސްރާބެކެވެ.

ޖީޑީޕީގެ އެންމެ ބޮޑު އަދަދެއް ހިއްސާކުރާ ޓޫރިޒަމް ދާއިރާ އިން، ދައުލަތަށް ވަންނަ އާމްދަނީގެ ގާތްގަނޑަކަށް 70 ޕަސެންޓަކީ ޓޫރިޒަމް ދާއިރާގެ އާމްދަނީ އެވެ.

ޓޫރިޒަމް ދާއިރާ ކުރިއަށް ގެންދިއުމުގައި އެންމެ ބުރަ މަސައްކަތް ކުރަނީ، އެ ދާއިރާގައި މަސައްކަތް ކުރާ ވިޔަފާރިވެރިންނެވެ. ސަރުކާރުން ކުރާ ކަމަކީ، ދާއިރާ ރެގިއުލޭޓު ކުރުމާއި ވިޔަފާރިވެރިންނަށް ފުރުސަތުތައް ފަހި ކޮށްދިނުމެވެ. މި ފަހުން އެ ދާއިރާއާ ގުޅޭ ގޮތުން އެޅި ބައެއް ފިޔަވަޅުތަކުން ޓޫރިޒަމް ދާއިރާގެ ވިޔަފާރިތަކަށް ނުތަވަސްކަން ގެނުވި އެވެ.

ޓީޖީއެސްޓީ އާއި ގްރީން ޓެކްސް އަށް ގެންނަ ބަދަލުތަކުގެ އިތުރުން ޓޫރިސްޓުން އަންނަ ނިސްބަތަކުން ބޮލަކަށް ޑޮލަރު މާރުކުރަން ޖެހޭ ފަދަ ގަވައިދެއް ހެދުމަކީ ޓޫރިޒަމް ދާއިރާގެ ކަންބޮޑުވުން އޮތް ކަމެކެވެ. އޭގެ ތެރޭގައި އެންމެ ފުޅާ ދާއިރާއެއްގައި އެ ވިޔަފާރީގައި އުޅުއްވާ ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) އާއި ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) ވެސް ވަނީ އެ ގަވައިދަށް އަމަލު ކުރެވެން ނެތް ކަމަށް އެމްއެމްއޭއަށް އަންގައިފަ އެވެ.

ޓޫރިޒަމް ދާއިރާގެ ކުރިއެރުމަށް ވޭތުވެދިޔަ އެއް އަހަރުގެ ތެރޭގައި މި ސަރުކާރުގެ ޕްލޭނާ އެއްގޮތަށް ކުރިއަށް ގެންދެވި މަސައްކަތްތަކާ ގުޅޭ ގޮތުން މިނިސްޓަރު އިބްރާހިމް ފައިސަލް "މިހާރު" އަށް ވިދާޅުވީ، ސަރުކާރުގެ އުނދަގޫ، ނިންމުންތައް ބިނާވަނީ ރާއްޖޭގެ އޮތް އިގްތިސާދީ ހާލަތުގެ މައްޗަށް ކަމަށެވެ.

ޓޫރިޒަމް ދާއިރާއާ ގުޅޭ ޓެކްސް އާއި ޑޮލަރު މާރުކުރުމުގެ ފިޔަވަޅުތައް އަޅަން ޖެހުނީ ރާއްޖޭގެ އިގްތިސާދު އޮތް ހާލަތުން، އިތުރު ގޮތެއް ނެތިގެން ކަމަށް ފައިސަލް ވިދާޅުވި އެވެ.

"ކަންބޮޑުވުން ހުންނާނެ. ކޮންމެ މީހަކަށް ވެސް ވިޔަފާރިއެއް ކުރާ އިރު ދައްކަން ޖެހޭ އެއްޗެއް އިތުރުވުމަކީ އޭގައި ޗެލެންޖުތައް ހުންނާނެ ކަމެއް. އެހެން ނަމަވެސް، މިވަގުތު ކުރަން ޖެހޭ ރަނގަޅު ކަމެއް ކަމަށް އަޅުގަނޑަށް ގަބޫލު ކުރެވެނީ،" އޭނާ ވިދާޅުވި އެވެ.

މިނިސްޓަރު ވިދާޅުވި ގޮތުގައި މި ހާލަތުން އަރައިގަތުމުން ޓޫރިޒަމް ދާއިރާގެ ވިޔަފާރިތަކަށް ލުއި ގޮތްތައް ފަހިކޮށްދެއްވާނެ އެވެ. އަންނަ އަހަރު ޓޫރިޒަމް ދާއިރާ ކުރިއަށް ގެންދަން މުހިއްމު މަސައްކަތެއް އެބަހުރި ކަމަށް ވެސް ވިދާޅުވި އެވެ.

އޭނާ ވިދާޅުވީ، މި މަހު ކުރީ ކޮޅު ލަންޑަންގައި ބޭއްވި ވޯލްޑް ޓްރެވަލް މާކެޓް (ޑަބްލިއުޓީއެމް) ގައި ވެސް ޓޫރިޒަމް ދާއިރާގެ ފަރާތްތަކުގެ ކަންބޮޑުވުންތައް ހިއްސާ ކުރެއްވި ކަމަށެވެ. އެކަންކަން އޭނާ އަށް އިހުސާސް ކުރެއްވޭ ކަމަށާއި މަސައްކަތް ކުރައްވަނީ، ވިޔަފާރިތަކަށް އެހެން ގޮތް ގޮތުން ފަސޭހަތައް ހޯދައިދެއްވުމަށް ކަމަށް ވިދާޅުވި އެވެ.

ފައިސަލްގެ އަމާޒު: 2.5 މިލިއަން ޓޫރިސްޓުން ގެނައުން

މި އަހަރު ނިމޭ އިރު ރާއްޖެއަށް ދެ މިލިއަން ޓޫރިސްޓުން ގެނައުމަށް ސަރުކާރުން ވަނީ އަމާޒު ހިފައިފަ އެވެ. މިނިސްޓަރު ދެކެވަޑައިގަންނަވާ ގޮތުގައި، އެ އަދަދު އަންނަ މަހުގެ ފަހު ހަފުތާގައި ހާސިލްވާނެ އެވެ.

ރާއްޖެ އަށް ޓޫރިސްޓުން އަންނަ ނިސްބަތުން އެއީ މިވަގުތު ހާސިލްކުރަން އެހާ އުނދަގޫ އަމާޒެއް ނޫން ކަމަށް ވިދާޅުވި އެވެ.

މަޖިލީހަށް މިހާރު ހުށަހަޅާފައިވާ ބަޖެޓު ފޮތުގައިވާ ގޮތުން އަންނަ އަހަރަށް ސަރުކާރުގެ އަމާޒަކީ 2.2 މިލިއަން ޓޫރިސްޓުން ގެނައުމެވެ.

އެކަމަކު މިނިސްޓަރު ފައިސަލް ވިދާޅުވީ، އެ އަދަދު ކަނޑައަޅާފައި ވިޔަސް އޭނާގެ އަމާޒަކީ އަންނަ އަހަރު 2.5 މިލިއަން ޓޫރިސްޓުން ގެނައުން ކަމަށެވެ. އެކަން ކުރެވޭނެ ޕްލޭންތައް އެކުލަވާލާފައިވާ ކަމަށާއި އަންނަ އަހަރުގެ މެދުތެރޭގައި އެއާޕޯޓުގެ ޓާމިނަލް ހުޅުވިއްޖެ ނަމަ އެއީ އެހާ އުނދަގޫ އަމާޒަކަށް ނުވާނެ ކަމަށް މިނިސްޓަރު ވިދާޅުވި އެވެ.

ފައިސަލް ވިދާޅުވި ގޮތުގައި އެކަން ކުރާނީ، މާކެޓިން ސްޓްރެޓެޖީ އަށް ގެންނަ ބަދަލުތަކާ އެކު އެވެ. އަންނަ އަހަރު ރާއްޖެ ޕްރޮމޯޓު ކުރުމުގައި މުޅިން އާ މާކެޓުތަކަށް ޓާގެޓުކޮށް ވެސް ކެމްޕެއިންތައް ހިންގަން ވަނީ ރާވައިފަ އެވެ. ބްރެޒިލް އާއި އެފްރިކާގެ ގައުމުތަކުގައި ވެސް ރާއްޖެ ޕްރޮމޯޓު ކުރަން ޕްލޭންކޮ ށްފައިވާ އިރު މިހާރު އެންމެ ގިނައިން ޓޫރިސްޓުން އަންނަ ރަޝިއާ އާއި ޗައިނާ އާއި އިޓަލީ އާއި އިންޑިއާ ފަދަ ގައުމުތަކަށް އަމާޒު ކޮށްގެން ވެސް މުހިއްމު ކެމްޕެއިން ހަރަކާތްތައް ވެސް ހިންގަން ވަނީ ރާވައިފަ އެވެ. އަދި ޔޫރަޕަށް ހާއްސަކޮށް ވެސް އިތުރު ހަރަކާތްތައް ބާއްވަން އޭނާ ވަނީ ނިންމައިފަ އެވެ.

"އަޅުގަނޑަށް ގަބޫލު ކުރެވެނީ މިހާރަށް ވުރެ ރަނގަޅަށް މާކެޓިން އަށް އިންވެސްޓް ކުރެވިއްޖެ ނަމަ އެ އަދަދު އެ އަށް ވުރެ ވެސް އިތުރު ކުރެވޭނެ. އެ ވެސް ދައުލަތަށް ރެވެނިއު އިތުރުވެގެންދާނެ ކަމެއް. ފައިނޭންޝަލް ސިޓުއޭޝަން ހަމަޖެހުނީމާ ޓޫރިޒަމްގެ ދާއިރާ ރަނގަޅު ގޮތްތައް ވާނެ،" އޭނާ ވިދާޅުވި އެވެ.

11 ރަށް ދޫކުރި، އެއީ 400 މިލިއަން ޑޮލަރުގެ އިންވެސްޓްމެންޓް

މި އަހަރުގެ ކުރީކޮޅު ޓޫރިޒަމް މިނިސްޓްރީން ވަނީ ރިސޯޓް ހެދުމަށް ގާތްގަނޑަކަށް 25 ރަށް ދޫކޮށްފަ އެވެ. އޭގެ ތެރެއިން 11 ރަށުގެ އިކުއިޒިޝަން ކޮސްޓް ދައުލަތަށް ވަނީ ދައްކައިފަ އެވެ.

އެ ރަށްތަކުގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބިފައި ވަނީ 33 މިލިއަން ޑޮލަރު (509 މިލިއަން ރުފިޔާ) އެވެ.

"މި ފަހަރު ގިނަ ރަށްތައް ނެގީ ދިވެހިން. މިއީ ވަރަށް ޕޮޒިިޓިވް ސައިނެއް ގޮތަށް ފާހަގަކުރެވެނީ. އެއީ ރާއްޖޭގެ ޓޫރިޒަމް ޑޮމިނޭޓް ކުރަނީ ބޭރު މީހުން. އެހެންވީމާ ދިވެހިން ރިސޯޓު ހަދައިގެން ދިއުމަކީ ވަރަށް ރަނގަޅު ކަމެއް،" ފައިސަލް ވިދާޅުވި އެވެ.

ފައިސަލް ވިދާޅުވި ގޮތުގައި ދޫކުރި ރަށްތަކުގެ އިންވެސްޓްމެންޓް ވެލިއު 400 މިލިއަން ޑޮލަރަށް ވުރެ އިތުރުވާނެ ކަމަށް ބެލެވެ އެވެ. އެއާ އެކު، އަނެއްކާ ވެސް ވަޒީފާގެ ފުރުސަތުތައް އިތުރުވެ، އިގްތިސާދަށް ވަންނަ އާމްދަނީ އިތުރުވާނެ އެވެ.

ފައިސަލް ވިދާޅުވީ، ރާއްޖެއަށް އިންވެސްޓަރުންގެ ޝައުގުވެރިކަން ނުގެއްލޭ ކަމަށާއި ކްރޮސް ސަބްސިޑީގެ ތެރެއިން ކުރިއަށް ގެންދިއުމަށް ވެސް ހައެއްކަ ޕްރޮޕޯސަލް ލިބިފައި އެބަ އޮތް ކަމަށެވެ.

ޓޫރިޒަމް މިނިސްޓްރީން ނިންމާފައި ވަނީ އަންނަ އަހަރު އިންވެސްޓަރުންނަށް އަމާޒުކޮށް ހާއްސަ ފޯރަމްތައް ބޭއްވުމަށެވެ. އަންނަ އަހަރު އިންޑިއާ އާއި ދުބާއީ އާއި ސިންގަޕޫރާއި ތައިލެންޑް ފަދަ ގައުމުތަކުގައި އެފަދަ ފޯރަމްތައް ބާއްވާނެ އެވެ. އަންނަ އަހަރުގެ ދެވަނަ ކުއާޓާ ނިމުމުގެ ކުރިން އެ ފޯރަމްތައް ބޭއްވުމަށް ޓޫރިޒަމް މިނިސްޓްރީން ޓާގެޓް ކުރެ އެވެ.

ޓޫރިޒަމް ދާއިރާގެ އުސްއަލިތައް:

- ހުޅުވި ރިސޯޓު: 2 (104 އެނދު)

- ހުޅުވި ހޮޓެލް: 2 (148 އެނދު)

- ހުޅުވި ގެސްޓްހައުސް: 93 (1432 އެނދު)

- އިތުރު އާ ސަފާރީ: 13 (300 އެނދު)

ޓޫރިޒަމަށް މިވަގުތު ކުރިމަތިވެފައިވާ އެންމެ ބޮޑު ގޮންޖެހުމަކީ އެއާޕޯޓު ޓާމިނަލް މަސައްކަތް ނުނިމި އޮތުމާއި ވަކި ވަކި ރަށްރަށަށް ފަސޭހައިން ދަތުރު ކުރެވޭނެ ގޮތްތައް ފަހިވެފައި ނެތުމެވެ.

މިނިސްޓަރު ވިދާޅުވި ގޮތުގައި އެކަމަށް އަވަސް ހައްލުތަކެއް ހޯދުމަށް ސަރުކާރުން ވަރަށް ބޮޑު އިސްކަމެއް ދެ އެވެ. އަދި އަންނަ އަހަރު އާ ޓާމިނަލް ހުޅުވި، ރަށްރަށަށް ފަސޭހައިން ދަތުރު ކުރެވޭނެ ގޮތްތައް ވެސް ފަހިކުރާނެ ކަމަށް އޭނާ ވިދާޅުވި އެވެ.

ޓޫރިޒަމް ދާއިރާ އަށް މުހިއްމު ޕްލޭންތަކެއް ކަނޑައަޅާފައިވާ އިރު، އާ ސަރުކާރުން މިހާރު މަސައްކަތް ފަށާފައިވާ އެއް ކަމަކީ، ވަކި ވަކި ރަށްތަކުގެ ޓޫރިޒަމް ޕްލޭންތައް އެކުލަވާލައި އެ ރަށްރަށަށް އަދި އަތޮޅުތަކަށް ހާއްސަ ކެމްޕެއިން ތައް ކުރިއަށް ގެންދިއުމެވެ. އަންނަ އަހަރު އެ ކަންކަން ނިންމަން ވެސް ޓޫރިޒަމް މިނިސްޓްރީން ވަނީ ކަނޑައަޅައިފަ އެވެ.

ޓޫރިޒަމް ދާއިރާގެ ވިޔަފާރިތަކާ ގުޅޭ އުނދަގޫ ނިންމުންތަކެއް ނިންމި ނަމަވެސް، ފައިސަލްގެ އެންމެ ބޮޑު އަމާޒަކީ ދާއިރާ އެކަތިގަނޑަކަށް ހަދައި، މިހާރު ހުރި މައްސަލަތައް އެކުގައި ހައްލު ކުރުމެވެ. އެކަން ކުރެއްވޭނެ ކަމަށް މިނިސްޓަރު ވިދާޅުވި އެވެ.