މަންމައަށް އަނިޔާކޮށް ފޭރުނު މީހާގެ ބަންދަށް 10 ދުވަސް

މަންމައަށް އަނިޔާކޮށް، މަރުގެ އިންޒާރުދީ ފޭރުނު މައްސަލާގައި ހައްޔަރުކުރި މީހާގެ ބަންދަށް 10 ދުވަސް ޖަހައިފި އެވެ.

ހިޔާ ޓަވަރުގެ އެޗް13 ގެ އެޕާޓްމަންޓެއްގައި ފޭރުނު މައްސަލާގައި އިއްޔެ ހައްޔަރުކުރީ ހ. އެހަޑަ، މުހައްމަދު އިސްމާއިލް އެވެ.

އޭނާގެ ބަންދާ މެދު ގޮތެއް ނިންމަން ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން 10 ދުވަހަށް ބަންދުކުރަން އަންގާފައިވާ ކަމަށް ފުލުހުން ބުންޏެވެ.

އެ މައްސަލާގައި ފުލުހުން ބުނީ އެގެއަށް ފުލުހުން ދިޔައީ އަންހެނަކު ރޯއަޑު އިވޭތީ ބަޔަކު ރިޕޯޓުކޮށްގެން ކަމަށެވެ. އެ އެޕާޓްމެންޓުގެ ދޮރުގައި ޓަކި ޖެހުމުން ހުޅުވީ ވެސް އަންހެނެކެވެ.

އެ އަންހެން މީހާއާ ހަވާލާދީ ފުލުހުން ބުނި ގޮތުގައި އޭނާގެ ދަރި ވަނީ މަންމައަށް ވަރަށް އަނިޔާކޮށް، މަރާލާނެ ކަމުގެ އިންޒާރުދީ ފޯނު ފޭރިގަނެފަ އެވެ.

އެ އަނިޔާތަކާ ގުޅިގެން އަންހެން މީހާއަށް ހޮސްޕިޓަލުގައި ފަރުވާދޭން ވެސް ޖެހުނެވެ.

އެ މައްސަލަ ފުލުހުން ދަނީ ތަހުގީގު ކުރަމުންނެވެ.