ފިހާރަ ފަޅާލައި މުދާތައް ހިފައިގެން ދިޔައީ އެންމެންގެ ކުރިމަތީގައި!

މަޖީދީމަގުގައި ހުންނަ ޒިއޯން މޯބައިލްސް 4 ގެ މައި ދޮރުގެ ބިއްލޫރިގަނޑު ތަޅާލައިގެން ވަދެ ވައްކަން ކޮށްފި އެވެ.

ފިހާރައިގެ ސީސީޓީވީ ފޫޓޭޖުން ފެންނަ ގޮތުގައި ފިހާރައިގެ ދޮރުގެ ބިއްލޫރިގަނޑު ތަޅާލަނީ ފިހާރަ ކައިރިން ހިނގާފައިދަމުން އަތުގައި އޮތް އެއްޗަކުން ޖަހަ އެވެ. ބޮލުގައި ތޮއްޕެއް އަޅައިގެން އަދި ރޮނގު ދެމި ޓީޝާޓެއް ލައިގެން ހުރި އެ މީހާ ބިއްލޫރިގަނޑު ތަޅާލުމަށް ފަހު ދަނީ އެތަނަށް ނުވަދެ އެވެ.

އެކަމަކު ފަހުން އެތަނުން ވަދެ ފިހާރައިގެ ކަބަޑުތައް ހާވައި ބެލުމަށް ފަހު ނުކުމެގެން ދަނީ އަގުބޮޑު ފޯނު ފަދަ ތަކެތި ހުރި އެ ފިހާރައިން ނަގައި ހައެއްކަ ކޮތަޅަށް އަޅައިގެންނެވެ. ސީސީޓީވީ ފުޓޭޖުގެ ގަޑިން ދައްކާ ގޮތުގައި އޭރު ގަޑިން 5:40 ވެއްޖެ އެވެ.

ފުލުހުން ބުނީ މައްސަލަ ރިޕޯޓްކޮށްފައިވަނީ 5:35 ގައި ކަމަށެވެ.

ބިއްލޫރިގަނޑު ތަޅާލި މީހާ ލައިގެން ހުރީ ރޮނގުދެމި ޓީޝާޓެއް ނަމަވެސް ފިހާރަ ތެރޭގައި އުޅުނީ ކަޅު ޓީޝާޓެއްގައި ހުރި މީހެކެވެ. އެކަމަކު ލައިގެން ހުރި ސޯޓާއި އަަރައިގެން ހުރި ފައިވާނާއި އެހެން ކަންކަމަށް ބަލާއިރު އެއީ ހަމަ އެކަކެވެ.

އޭނާ ފިހާރައަށް ވަނުމަށް ފަހު ކައުންޓަރުގައި ހުރި ވަތްގަނޑު ހަލާކުކޮށްލައިގެން ހުޅުވަ އެވެ. އެކަމަކު ބެލެވޭ ގޮތުގައި އެ ވަތްގަނޑުގައި ފައިސާއެއް ނެތެވެ. އެހެންވެ ދެން އެ ކައުންޓަރުގައި ހުރި ކޮތަޅުތަކެއް ނަގައިގެން ގޮސް، ފިހާރައިގެ ރެކުގައި ހުރި ފޯނުތައް ނަގައި ކޮތަޅުތަކަށް އަޅާތީ ފެނެ އެވެ.

ގާތްގަނޑަކަށް ފަސް މިނެޓު ވަންދެން ފިހާރަ ތެރޭގައި އޭނާ އުޅެ އެވެ. ނުކުމެގެން ދާއިރު ބައެއް ފޯނުތައް ކޮތަޅުތަކުން ވެއްޓުމުން އަލުން އެ ނަގައި ކޮތަޅަށް ވެސް ލަ އެވެ.

ފިހާރައިގެ ބިއްލޫރިގަނޑު ތަޅާލާފައި ހުރި ތަން ފެނިގެން މީހަކު އެތަން ބަލަން ހުއްޓާތީ ވެސް ވީޑިއޯއިން ފެނެ އެވެ. އަދި ވެހިކަލްތައް ވެސް މަގުމަތިން ދުއްވަ އެވެ. އެކަމަކު އެ މީހާ ހުއްޓުވަން އެއްވެސް މީހަކު މަސައްކަތްކުރި ތަނެއް ވީޑިއޯ ފުޓޭޖަކުން ނުފެނެ އެވެ.

ފުލުހުން ބުނީ މި މައްސަލާގައި މިހާތަނަށް މީހަކު ހައްޔަރުކޮށްފައި ނުވާ ކަމަށާއި މައްސަލަ ތަހުގީގުކުރަމުން އަންނަ ކަމަށް ފުލުހުން ބުންޏެވެ.