އުމުރުން ދުވަސްވީ މީހުންގެ އަތުން ފޭރުމުގެ މައްސަލަތައް އިތުރުވަނީ

އުމުރުން ދުވަސްވީ މީހުންނަށް އަމާޒުކޮށްގެން ހިންގާ މަކަރާއި ހީލަތުން ފައިސާ ހޯދުމުގެ މައްސަލަތައް އިތުރުވަމުންދާ ކަމަށް ފުލުހުން މިއަދު ބުނެފި އެވެ.

ފުލުހުން މިއަދު ބުނީ، މި ކަން ހިނގަނީ އުމުރުން ދުވަސްވީ މީހުންނާ ދިމާވެ، ދަންނަ މީހެއްގެ ގޮތުގައި ތައާރަފްވެ އޭނާގެ އިތުބާރު ހޯދައިގެން ކަމަށެވެ.

މި ގޮތުން، އިތުބާރު ހޯދުމަށް ފަހު އެކި ތަންތަނަށް ގެންގޮސް، ދުވަސްވީ މީހުންގެ އަތުން ފޭރޭ މައްސަލަތައް ހުށަހެޅޭ މިންވަރު އިތުރުވެފައިވާ ކަމަށް ފުލުހުން ބުންޏެވެ.

ފުލުހުން ވަނީ މިފަދަ ކުށްތަކަށް އަރައިގަންނަ ފަރާތްތަކާ މެދު ސަމާލުވުމަށް ދުވަސްވީ މީހުންނާއި އެ މީހުންގެ އާއިލާތަކަށް އިލްތިމާސްކޮށްފަ އެވެ.

އެކި ގޮތްގޮތުން ހިންގޭ ސްކޭމްތަކުގެ މައްސަލަތައް އިތުރުވެފައިވާއިރު އެފަދަ 1،661 މައްސަލަ މިދިޔަ އަހަރު ރިޕޯޓްކޮށްފައިވެ އެވެ. އެއީ 20 މިލިއަން ރުފިޔާގެ ސްކޭމެވެ.

މި އަހަރުގެ ޖެނުއަރީން މިދިޔަ ޖުލައި މަހުގެ ނިޔަލަށް 1،302 މައްސަލަ ރިޕޯޓްކޮށްފައިވާ ކަމަށް ފުލުހުން މީގެ ކުރިން ބުނެފައިވެ އެވެ.