ކާރެއްގެ ތެރޭ މީހަކު ރަހީނުކުރި މައްސަލާގައި އިތުރު 4 މީހުން ހައްޔަރުކޮށްފި

ހުޅުމާލޭގައި ކާރެއްގެ ތެރޭގައި މީހަކު ރަހީނުކޮށް، ފައިސާ ހޯދަން އުޅުނު މައްސަލާގައި އިތުރު ހަތަރު މީހަކު ހައްޔަރުކޮށްފި އެވެ.

ފުލުހުން ބުނީ ރޭ ހުޅުމާލޭ އޯކިޑްމާ ހިނގުމުގައި، ކާރެއްގެ ތެރޭގައި، ދިވެހި ފިރިހެނަކު ރަހީނުކޮށް، އަނިޔާކުރި މައްސަލައެއް ހުށަހަޅާފައިވާ ކަމަށެވެ. އަދި އެ މީހާ ރަހީނު ކުރުމަށްފަހު، އޭނާގެ އާއިލާއަށް ގުޅައިގެން ފައިސާ ހޯދުމަށް މަސައްކަތްކުރި ކަމަށް ފުލުހުން ބުންޏެވެ.

އެ މައްސަލާގައި އެންމެ ފުރަތަމަ ހައްޔަރުކުރީ ތޮލާލް މޫސާ، ދަފްތަރު ނަމްބަރު 9022 އެވެ.

އޭނާގެ އިތުރުން ދެން މި މައްސަލައާ ގުޅިގެން ހައްޔަރަށް ގެންގޮސްފައިވަނީ ހުޝާމް އިބްރާހިމް، ރަތްބަގީޗާގެ ހދ. ކުމުންދޫ އާއި ހަމަ އެ ގޭ އާދަމް ޝަރީފް އާއި ހުސެއިން ހައިކަލް ނިޔާޒު، ގ. ކަޅަގާރިމާގެ އަދި އަހުމަދު ރިޝްފާން، ހުޅުމާލެ ފްލެޓް ނަންބަރު 71-1-04 އެވެ.

މި ފަސް މީހުންގެ ބަންދަށް ވެސް ހަތް ދުވަސް ޖަހަން ހުޅުމާލެ މެޖިސްޓްރޭޓް ކޯޓުން މިއަދު ވަނީ އަމުރުކޮށްފަ އެވެ.

މި މައްސަލާގައި ފަސް މީހަކު ހައްޔަރު ކޮށްފައި ވާއިރު، މިދިޔަ ބުރާސްފަތި ދުވަހުގެ ރޭ ހިޔާ ފްލެޓެއްގެ ތެރޭގައި މީހަކު ރަހީނުކޮށް، އަނިޔާކުރި މައްސަލައެއްގައި ވެސް 12 މީހަކު ހައްޔަރުކޮށް ބަންދު މުއްދަތު ވަނީ އިތުރުކޮށްފަ އެވެ.

އެ މައްސަލާގައި އެ މީހުން ހައްޔަރުކުރީ ރަހީނު ކޮށްފައިވާ މީހާގެ އިނގިލި ބުރިކޮށްލަން އުޅެނިކޮށެވެ.

ފަހަކަށް އައިސް ރަހީނު ކުރުމުގެ މައްސަލަތައް އިތުރުވެފައި ވާއިރު، އެ މައްސަލަތަކުގައި ކަން ހިނގި ގޮތުގެ އިތުރު ތަފްސީލެއް ފުލުހުން އަދި ހާމައެއް ނުކުރެ އެވެ.