ރާއްޖެ-ޗައިނާ ގުޅުމުގެ ރަމްޒަކަށް "ބްރިޖު ޕާކް"

ރާއްޖެއާއި ޗައިނާގެ ގުޅުން ރަމްޒުކޮށްދޭ ޕާކެއް މިއަދު ހުޅުވައިފި އެވެ.

މާލެއިން ބްރިޖަށް އަރާ ހިސާބުގައި ތަރައްގީކުރި ކުޑަ ޕާކު ހުޅުވައިދެއްވީ ކޮންސްޓްރްކަޝަން މިނިސްޓަރު ޑރ. އަބްދުﷲ މުއްތަލިބު އަދި ޗައިނާއިން ރާއްޖެ ކަނޑައަޅާފައިވާ ސަފީރު ވަންގް ލީޝިން އެވެ.

ކޮންސްޓްރަކްޝަން މިނިސްޓްރީން ބުނީ ބްރިޖް ޕާކަކީ މުޖުތަމައު ގުޅުވާލުމަށް ޗައިނާގެ އެހީގައި ކުރިއަށްގެންދިޔަ މަޝްރޫއުތަކާއި ދެ ގައުމުގައި އޮތް ޒަމާންވީ ގާތް ގުޅުން ދައްކުވައިދޭ ތަނެއް ކަމަށެވެ.

އިށީނދެވޭ ގޮތަށް ތަރައްގީކޮށްފައިވާ ޕާކުގެ ތެރޭގައި، ސިނަމާލެ ބްރިޖު މަޝްރޫއު ތަރައްގީކުރުމުގެ އެކި ފިޔަވަހިތަކުގެ ފޮޓޯ ބަހައްޓާފައިވެ އެވެ.

މާލެއާ ހުޅުމާލެ ގުޅުވާލި މި ބްރިޖަކީ ޗައިނާ ސަރުކާރުގެ ބޮޑު އެހީއެއްގައި ނިންމި މަޝްރޫއެކެވެ. ސިނަމާލެ ބްރިޖަށް ގާތްގަނޑަކަށް 200 މިލިއަން ޑޮލަރު ހަރަދުވި އެވެ. އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އަދި ލޯނެއްގެ ގޮތުގައި 72 މިލިއަން ޑޮލަރު ދިން އިރު، ދިވެހި ސަރުކާރުން ވަނީ 12 މިލިއަން ޑޮލަރު ހަރަދުކޮށްފަ އެވެ.