އަލިފާނުގައި ގެއްލުން ލިބުނު، ހައުސިން މިނިސްޓްރީގެ ބިން ކޮމާޝަލް ސެންޓަރަކާ އެކު ތަރައްގީ ކުރަނީ

މިދިޔަ އަހަރުގެ ޑިސެމްބަރު 12 ވަނަ ދުވަހު ހިނގި އަލިފާނުގެ ބޮޑު ހާދިސާގައި އަނދައި ހުލިވި، ހައުސިން މިނިސްޓްރީގެ ބިން ހިމެނޭ ސަރަހައްދު ކޮމާޝަލް ސެންޓަރަކާ އެކު ތަރައްގީ ކުރަން ނިންމާފައިވާ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

މިނިސްޓަރު "މިހާރު" އަށް ވިދާޅުވީ އެ ބިމުގައި ވިޔަފާރީގެ އެކި ހަރަކާތްތައް ހިންގަން ބޮޑު ސެންޓަރެއް އަޅަން ޕްލޭންކޮށް އެކަމާ ގުޅޭ ކަންކަން މިހާރު ފަށާފައިވާ ކަމަށެވެ.

އެހެންވެ، ފުރަތަމަ ކަމެއްގެ ގޮތުގައި ކުރާ ކަމަކީ އަމީނީ މަގުން އެސްޓީއޯ ކާޑު ގުދަންތައް ކައިރީގައި އޮންނަ އެ ބިން ތަރައްގީ ކުރާނެ ގޮތުގެ މާސްޓަޕްލޭނެއް ހެދުމެވެ. "މާލެ ސެންޓަރު ޕޮއިންޓު" ނަމުގައި ތަރައްގީ ކުރާ އެ ސަރަހައްދުގެ މާސްޓަ ޕްލޭނާއި ޑިޒައިން ކޮންސެޕްޓް އަދި ޓެކްނިކަލް އެހީދޭނެ ކޮންސަލްޓަންޓެއް ހޯދަން ފިނޭންސް އެންޑް ޕްލޭނިން މިނިސްޓްރީން މިދިޔަ މެއި މަހު އިއުލާންކުރި އެވެ.

އެ އިއުލާނުގެ މުއްދަތު މިދިޔަ މަހުގެ 15 އަށް ވަނީ ހަމަވެފަ އެވެ.

މިނިސްޓަރު ވިދާޅުވީ ކޮމާޝަލް ސެންޓަރު ހަދަނީ އަލިފާން ރޯވި އިމާރާތްތައް ހުރި ބިންތަކުގެ ތެރެއިން އެއްބައިގައި ކަމަށެވެ. ވަށައިގެންވާ ސަރަހައްދު ބޭނުންކުރާނެ ގޮތްތައް ވެސް މާސްޓަ ޕްލޭންގައި ހިމަނާނެ ކަމަށް މުއްތަލިބު ވިދާޅުވި އެވެ.

"މާލޭގެ އެންމެ މުހިންމު ސަރަހައްދަކަށް މުސްތަގުބަލްގައި ވާނީ އެ ސަރަހައްދު. އެހެންވެ، އެ ތަން ތަރައްގީ ކުރާނެ ގޮތެއް މިހާރު މި ހޯދަނީ،" މުއްތަލިބު ވިދާޅުވި އެވެ.

ޕްލޭނިން ސްޓޭޖުގައި އޮތުމުން އެ ސެންޓަރާ ގުޅޭ އިތުރު ތަފްސީލެއް އަދި ނުލިބެ އެވެ.

މަޝްހޫރު ޓިނު ބިލްޑިންގުގައި އަލިފާނުގެ ހާދިސާ ހިނގިއިރު އެ އިމާރާތުގައި ހިންގަމުން އައީ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އެވެ. ޓިނު ބިލްޑިންގުގައި ރޯވި އަލިފާންގަނޑު ކޮންޓްރޯލް ނުވެ، ޖެހިގެން ހުރި ގްރީން ބިލްޑިންގަށް ވެސް ފެތުރި އެ ތަނުގައި ހިންގި އެންވަޔަރުމެންޓް މިނިސްޓްރީ ވެސް ދަރުބާރުގެ އަށް ބަދަލުކުރަން ޖެހުނެވެ.

ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް އޮތީ އަނދައި ހުލިވެފަ އެވެ. އެހެންވެ، ޓިނު ބިލްޑިންގައި ހިންގަމުން އައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރުމެންޓް މިނިސްޓްރީ ވަގުތީ ގޮތުން އޭރުއްސުރެ ހިންގަނީ ދަރުބާރުގޭގަ އެވެ. ފަހުން ވަނީ ހައުސިން އާއި ކޮންސްޓްރަކްޝަން މިނިސްޓްރީ އެއްކޮށްލައިފަ އެވެ.

އޭރު ތިން މިނިސްޓްރީ ހިންގި އިމާރާތުގައި ރޯވި ސަބަބެއް އަދިވެސް ރަސްމީކޮށް ނުބުނެ އެވެ.