ސިންގަޕޫރުގެ ބާނީގެ ގެކޮޅާ މެދު އާއިލާގެ ކޯޅުން އަލުން ފެށިއްޖެ

ސިންގަޕޫރުގެ އެންމެ ފުރަތަމަ ލީޑަރުން އެ ގައުމުގެ ބިންގާ އަޅުއްވައި ޕްލޭންތައް ކުރެއްވުމުގައި ގިނަ ވަގުތު ހޭދަކުރެއްވި ބަންގްލޯއާ މެދު އަމަލުކުރާނެ ގޮތަކާ މެދު، ކުރީގެ ބޮޑުވަޒީރު ލީ ކުއަން ޔޫގެ ދަރިންގެ މެދުގައި ހިނގަމުންދާ ހަމަނުޖެހުން އަލުން ބޮޑުވެ އަނެއްކާވެސް އާންމުންގެ ސަމާލުކަން ލިބިއްޖެ އެވެ.

މި ހަމަނުޖެހުން އުފެދިފައިވަނީ، 38 އޮކްސްލީ ރޯޑްގައި ހުރި، ޕީޕަލްސް އެކްޝަން ޕާޓީ (ޕީއޭޕީ) އުފެދުނު، އެއްބުރިއަށް ހުންނަ ގެކޮޅު ތަޅާލާނީތޯ ނުވަތަ ހިމާޔަތްކޮށްފައި ބަހައްޓާނީތޯ އުފެދިފައިވާ ބަހުސްފަ އެވެ. ޕީއޭޕީ އަކީ 1959 އިން ފެށިގެން ސިންގަޕޫރު ވެރިކަން ކުރަމުން އަންނަ ޕާޓީ އެވެ.

ލީ އާއިލާ އަކީ ސިންގަޕޫރުގައި ޝާހީ އާއިލާގެ ދަރަޖަ ލިބިފައިވާ އާއިލާއެކެވެ. އެ ގައުމުގެ ފުރަތަމަ ބޮޑުވަޒީރު، މިހާރު އަވަހާރަވެފައިވާ ލީ ކުއަން ޔޫ އަކީ ގައުމުގެ ބާނީ އެވެ.

މި ގެކޮޅާ މެދު އެ ބޭފުޅުންގެ ދަރިންގެ މެދުގައި އުފެދުނު ޚިލާފު 2017 ގައި އާންމުވެ، ބައިނަލްއަގުވާމީ މީޑިއާގެ ސަމާލުކަމަށް ވެސް އައިސްފައިވެ އެވެ. އަދި އެއާ އެކު ސިންގަޕޫރު ރައްޔިތުންގެ މެދުގައި ވެސް ބަހުސް ބޮޑުވި އެވެ.

މި ގެކޮޅާ މެދު ނިންމަން ޖެހޭ އުނދަގޫ ނިންމުން މިހާރު އޮތީ އާ ބޮޑުވަޒީރު ލޯރެންސް ވޯންގްގެ ސަރުކާރަށެވެ. މިއީ ލީ ކުއަން ޔޫގެ އެންމެ ދޮށީ ދަރިކަލުން ލީ ހްސިއެން ލޫންގް ބޮޑުވަޒީރުކަމުން އިސްތިއުފާ ދެއްވިތާ ހަ މަސްދުވަސް ފަހުން، އަދި އަންނަ އަހަރުގެ އާންމު އިންތިޚާބު ކުރިމަތީގައި އޮއްވަ އެވެ.

ސިންގަޕޫރުގައި 20 އަހަރު ވަންދެން ބޮޑުވަޒީރުކަން ކުރެއްވި ލީ ހްސިއެން ލޫންގް ވިދާޅުވަނީ މި ގެކޮޅު ހިމާޔަތްކޮށްފައި ބަހައްޓަން ޖެހޭ ކަމަށެވެ. ޕްރޮޕަޓީ އޭޖެންޓުން ބުނާ ގޮތުގައި މި ގެކޮޅުގެ އަގު ގާތްގަނޑަކަށް 30 މިލިއަން ސިންގަޕޫރު ޑޮލަރު (23 މިލިއަން އެމެރިކާ ޑޮލަރު) އަށް އަރާނެ އެވެ.

ނަމަވެސް އޭނާގެ އެއްބަފާ ދެ ބޭފުޅުން ކަމަށްވާ ކޯޕަރޭޓް އެގްޒެކެޓިވް ލީ ހްސިއެން ޔަންގް އަދި އަވަހާރަވެފައިވާ ނިއުރޮލޮޖިސްޓް ލީ ވެއި ލިންގް ވިދާޅުވެފައި ވަނީ ގެކޮޅު ތަޅާލަން ބައްޕާފުޅު ވަސިއްޔަތްކުރައްވާފައިވާ ކަމަށެވެ.

މީގެ ތެރެއިން ހަގަށް ތިއްބެވި ބޭފުޅުން 2017 ގައި ތުހުމަތުކުރެއްވި ގޮތުގައި ބޭބޭފުޅު އުޅުއްވަނީ ލީ ކުއަން ޔޫގެ ލެގަސީ ސިޔާސީ ފައިދާއަށް ބޭނުންކުރައްވާށެވެ. ނަމަވެސް ލީ ވެއި ލިންގް އެ ގެކޮޅުގައި ދިރިއުޅުއްވާތީ ފަހުން އެ ވާހަކަ މަޑުޖެހިލި އެވެ.

ނަމަވެސް އޮކްޓޯބަރު 9 ގައި އޭނާ އަވަހާރަވުމާ ގުޅިގެން ގެކޮޅު ހުސްވެ، 2015 ގައި އޭނާގެ ދޮށީ ދައްތާފުޅުގެ އަތުން މި ގެކޮޅު ބައްލަވައިގަތް ލީ ހްސިއެން ޔަންގް ވަނީ ވަސިއްޔަތް ތަންފީޒު ކުރުމަށް އަލުން ގޮވާލައްވައިފަ އެވެ.

"38 އޮކްސްލީ ރޯޑްގެ ހަމައެކަނި ގާނޫނީ ވެރިފަރާތަކީ އަޅުގަނޑު. އަޅުގަނޑުގެ ދައްތަ އަވަހާރަވުމަށް ފަހު، ބައްޕާފުޅު ލީ ކުއަން ޔޫގެ ވަސިއްޔަތް ތަންފީޒުކުރަން ހުރި ހަމައެކަނި މީހަކީ އަޅުގަނޑު،" އެންމެ ހަގު ބޭފުޅާ އަންގާރަ ދުވަހު ފޭސްބުކްގައި ލިޔުއްވާފައިވެ އެވެ. "ވަސިއްޔަތުގައި ވިދާޅުވެފައިވަނީ ވެއި ލިންގް އެ ގެއިން ނުކުތުމުން 'ވަގުތުން' ގެކޮޅު ތަޅާލުމަށް. އޭނާގެ އެދިވަޑައިގަތުން ގާނޫނީ އިމުގެ ތެރެއިން ފުރިހަމައަށް ތަންފީޒުކުރުމަކީ އަޅުގަނޑުގެ ޒިންމާއެއް." އަމިއްލަފުޅަށް، 2022 އިން ފެށިގެން ގައުމުން ބޭރުގައި އުޅުއްވާ ލީ ހްސިއެން ޔަންގް ވިދާޅުވީ ބަންގަލޯ ތަޅާލުމަށްފަހު ކުޑަ ގެއެއް އެޅުމަށް ކަމާބެހޭ ފަރާތްތަކަށް ހުށަހަޅުއްވާނެ ކަމަށެވެ.

ލީ ވެއި ލިންގް ވެސް އަވަހާރަވުމުގެ ކުރިން ނޯޓެއް ލިޔުއްވާފައި އޮތެވެ. އޭގައި ވެސް އޮތީ "ބައްޕާފުޅުގެ އެދިވަޑައިގަތުމަށް އިހުތިރާމްކޮށް ގެ ތަޅާލަން" އެދިވަޑައިގަންނަވާ ކަމަށެވެ.

ތާރީހީ މުހިންމުކަން

ކުރިން ދަނޑު ހެއްދި ސަރަހައްދެއްގައި ހުރި، ފަސް ކޮޓަރީގެ މި ބަންގަލޯއަކީ ބިމުގެ ދަތިކަން ބޮޑު ސިންގަޕޫރުގެ އެންމެ އަގުބޮޑު ސަރަހައްދުގައި މިހާރު ހުރި ތަނެކެވެ. ސިންގަޕޫރުގެ ގިނަ މީހުން ދިރިއުޅެނީ ސަރުކާރުން އަޅާފައިވާ އުސް އިމާރާތްތަކުގަ އެވެ.

މި ގެކޮޅަކީ 1940 ގެ އަހަރުތަކުގެ މެދަކާ ހިސާބުން ފެށިގެން ފުރަތަމަ ބޮޑުވަޒީރު ލީ އަވަހާރަވަންދެން އުޅުއްވި ގެކޮޅެވެ. އޭނާއަކީ އިނގިރޭސި އިސްތިއުމާރުގެ ދަށުގައި ކުރިން އޮތް ކުޑަ ގައުމު 30 އަހަރަށްވުރެ ކުޑަ މުއްދަތެއްގައި މުއްސަނދި ސިޓީ-ސްޓޭޓަކަށް ބަދަލުކުރެއްވި ލީޑަރެވެ.

ލީ އާއިލާ ތެރޭ 2017 ގައި އުފެދުނު ހަމަނުޖެހުމާ ގުޅިގެން، މިހާރުގެ ބޮޑުވަޒީރު ވޯންގް ވެސް ހިމެނޭ މިނިސްޓަރުންގެ ކޮމިޓީއަކާ މި ބަންގަލޯއާ މެދު ގޮތެއް ނިންމުމުގެ މަސައްކަތް ހަވާލުކުރި އެވެ.

އެ ކޮމިޓީން 2018 ގައި ނެރުނު ރިޕޯޓެއްގައި ބުނެފައިވަނީ މި ގެކޮޅަކީ "އިމާރާތްކުރުމުގެ ފަންނާއި ތަރިކައިގެ އަދި ތާރީޚީ މުހިންމުކަމެއް" ލިބިފައިވާ ތަނެއް ކަމަށެވެ.

"މި ގެކޮޅަކީ ސިންގަޕޫރުގެ މިނިވަން ފުރަތަމަ ސަރުކާރު އުފެދުމަށް މަގު ފަހިވެގެން ދިޔަ ބައްދަލުވުންތައް ބޭއްވި އަދި ގައުމުގެ ކުރިމަގު ބައްޓަންކުރި ތަން،" ކޮމިޓީން ބުންޏެވެ.

މި ގެކޮޅުގެ ބޭސްމަންޓްގެ ކާ ކޮޓަރިއަކީ 60 އަހަރަށްވުރެ ގިނަ ދުވަހު ވެރިކަންކުރި ޕީއޭޕީ އުފެދުނު ތަން ވެސް މެ އެވެ.

އެ ކޮމިޓީން ސަރުކާރަށް ހުށަހެޅީ ގެކޮޅާ މެދު އަމަލުކުރާނެ ތިން ގޮތެކެވެ. އެއީ ގައުމީ ފަހުރުވެރި ތަނެއްގެ ގޮތުގައި ބެހެއްޓުން، ކާ ކޮޓަރި ބަހައްޓާފައި އެހެން ބައިތައް ތަޅާލުން އަދި މުޅި ގެކޮޅު ތަޅާލައި އަލުން ތަރައްގީކުރުމެވެ.