ރާއްޖޭގައި ރިސޯޓް ހިންގާ ބިލިއަނަރު އޮންގުގެ މައްޗަށް ސިންގަޕޫރުގައި ދައުވާކޮށްފި

ރިޝްވަތު ހިފުމާއި އަދުލުއިންސާފަށް ހުރަސްއެޅުމުގެ ކުށުގައި ސިންގަޕޫރުގެ ކުރީގެ ޓްރާންސްޕޯޓް މިނިސްޓަރު އެއް އަހަރަށް ޖަލަށްލާން ހުކުމްކުރިތާ އެއް ދުވަސް ފަހުން، އޭނާގެ ކުށްތަކާ ގުޅުން ހުރި މަހުޖަނު އޮންގް ބެންގް ސެންގުގެ މައްޗަށް ވެސް މިއަދު ދައުވާކޮށްފި އެވެ.

ހޮޓެލް ވިޔަފާރީގައި މަޝްހޫރު، އަދި ރާއްޖޭގައި ވެސް އަގު ބޮޑު އެތައް ބްރޭންޑެއްގެ ރިސޯޓްތައް ހިންގާ މެލޭޝިއާގެ މަހުޖަނުގެ މައްޗަށް ކުރީ އަދުލުއިންސާފަށް ހުރަސްއެޅުމާއި ދައުލަތުގެ މުވައްޒަފަކަށް ހަދިޔާ ހުށަހަޅައިގެން ކުށް ކުރުމަށް ހިތްވަރު ދިނުމުގެ ދައުވާ އެވެ.

ޗެނަލް ނިއުސް އޭޝިއާ އިން ބުނީ ދައުވާތަކާ ގުޅިގެން ބާއްވާ އިބްތިދާއީ އަޑުއެހުން ތާވަލްކޮށްފައިވަނީ ނޮވެމްބަރު މަހުގެ 15 ވަނަ ދުވަހަށް ކަމަށެވެ.

އަދުލުއިންސާފަށް ހުރަސްއެޅުމުގެ ކުށަށް، ގިނަވެގެން ހަތް އަހަރުގެ ޖަލު ހުކުމެއް ނުވަތަ ޖޫރިމަނާއެއް ކަނޑައެޅިދާނެ އެވެ. ނުވަތަ ޖަލު ހުކުމާ އެކު ޖޫރިމަނާ ވެސް ކުރެވިދާނެ އެވެ. ހަދިޔާ ނުވަތަ ރިޝްވަތު ހުށަހެޅުމުގެ ކުށަށް އަންނާނީ ގިނަވެގެން ދެ އަހަރުގެ ޖަލު ހުކުމެކެވެ.

ސިންގަޕޫރުގައި އުޅޭ، އުމުރުން 78 އަހަރުގެ ބިލިއަނަރާ، އިސްވަރަންގެ ކޮރަޕްޝަނާ ހުރި ގުޅުންތަކާ އެކު އޭނާއަށް މީޑިއާގެ ސަމާލުކަން މި ދުވަސްވަރު ވަނީ ވަރަށް ބޮޑަށް އަމާޒުވެފަ އެވެ. ކޮރަޕްޝަންގެ މައްސަލައިގެ ތަހުގީގުގެ ތެރެއިން މިދިޔަ އަހަރުގެ ޖުލައި މަހު އޮންގް ހައްޔަރު ވެސް ކުރި އެވެ. އޭރު ކަފާލާތުގެ ދަށުން ދޫކޮށްލި އިރު އެއްވެސް ދައުވާއެއް ނުއުފުލަ އެވެ.

އިއްޔެ ޖަލު ހުކުމް އައި އިސްވަރަން ވަނީ ގާނޫނާ ހިލާފަށް ހަދިޔާ ގަބޫލުކުރުމުގެ ދައުވާއަށް އިއުތިރާފް ވެފަ އެވެ. ދައުވާގައިވާ ގޮތުން އިސްވަރަން އަށް 2017 ގައި ފޯމިއުލާ ވަން ގްރޯން ޕްރީގެ ޓިކެޓާއި ފްލައިޓް ދަތުރުތަކާއި ހޮޓާތަކުގައި ހުރުމުގެ ހަރަދު އޮންގް ވަނީ ހަމަޖައްސައިދީފަ އެވެ. އަދި އޮންގުގެ ހަރަދުގައި ބިޒްނަސް ކްލާހުގައި ކުރި ދަތުރެއްގެ ތަހުގީގަށް ހުރަސްއަޅަން މަސައްކަތްކުރުމާއި އޮންގުގެ އަތުންނާއި ކޮންސްޓްރަކްޝަން ކުންފުންޏެއްގެ އިސް ޑިރެކްޓަރެއްގެ އަތުން ވިސްކީ ފުޅިތަކަކާއި ގޮލްފް ކްލަބްތަކެއް ހަދިޔާގެ ގޮތުގައި ގަބޫލުކުރި މައްސަލަ ވެސް ހިމެނެ އެވެ.

ސިންގަޕޯ ގްރޯން ޕްރީގެ ރައިޓްސް އޮންގަށް އޮންނައިރު އިސްވަރަން އެންމެ ބޮޑަށް މަޝްހޫރުވެފައިވަނީ ސިންގަޕޫރަށް ފޯމިއުލާ ވަން ގެނައުމުގައި އިސް ދައުރެއް އަދާކޮށްގެންނެވެ.

އުމުރުން 62 އަހަރުގެ އިސްވަރަން ވަނީ ގާނޫނާ ހިލާފަށް ހަދިޔާ ގަބޫލުކުރުމާއި އަދުލުއިންސާފަށް ހުރަސް އެޅުމުގެ ފަސް ދައުވާއަށް ވެސް އިއުތިރާފް ވެފަ އެވެ. މިއީ ސިންގަޕޫރުގައި ބައި ގަރުނު ތެރޭ ސިޔާސީ ބަޔަކު ހިމެނޭ ފުރަތަމަ ހިޔާނާތުގެ ދައުވާ އެވެ.

ކޮރަޕްޝަންގެ ދައުވާއަކީ އޮންގް އާއި ކޮންސްޓްރަކްޝަން ކުންފުންޏެއްގެ ޑިރެކްޓަރެއް ކަމަށްވާ ލަމް ކޮކް ސެންގްގެ ފަރާތުން އިޝްވަރަން ހަދިޔާ ތަކެއް ލިބުމެވެ.

ތުހުމަތުތަކާ އެކު މިދިޔަ ޖެނުއަރީ މަހު އިސްވަރަން އިސްތިއުފާ ދިނުމުން ސިންގަޕޫރު ސަރުކާރުން ވަނީ ފޯމިއުލާ ވަން ގްރޯން ޕްރީ އެއްބަސްވުން މުރާޖައާ ކުރާނެ ކަމަށް ބުނެފަ އެވެ. ސިންގަޕޫރުގައި މިއަހަރުގެ ފޯމިއުލާ ވަން ރޭސް މިދިޔަ މަހުގެ 22 ވަނަ ދުވަހު ވަނީ ނިންމާލައިފަ އެވެ.