ސިންގަޕޫރުގައި ލިމްއާ ދެކޮޅަށް އަޑުއުފުލި ވެލެންސިއާ ސަޕޯޓަރު ފުރުން މަނާކޮށްފި

ސްޕެއިނުގެ ވެލެންސިއާގެ ވެރިޔާ ސިންގަޕޫރުގެ ޕީޓާ ލިމްއާ ދެކޮޅަށް އެ ގައުމުގައި މުޒާހަރާކުރުމާ ގުޅިގެން ސްޕެއިނުގެ ދެމަފިރިއަކު ފުރިޔަނުދީ ސިންގަޕޫރުން ހިފަހައްޓައިފި އެވެ.

ހަނީމޫން ދަތުރެއްގައި އިރުމަތީ އޭޝިއާ އަށް ގޮސް ތިބި ޑެނީ ކުއެސްޓާ އާއި އޭނާގެ އަންހެނުން މިރެއިއާ ސައޭޒް ސިންގަޕޫރު އެއާޕޯޓުން ހިފެހެއްޓީ އެ ގައުމުގައި ތިބުމަށް ފަހު އިންޑޮނީޝިއާގެ ބާލީ އަށް ފުރަން ބޯޓަށް އަރަން އުޅެނިކޮށެވެ.

ކުއެސްޓާ ވަނީ ސިންގަޕޫރުގެ އެންމެ މުއްސަނދި އެކަކު ކަމަށްވާ ލިމް، ވެލެންސިއާ ހިންގާ ގޮތާ މެދު ހިތްހަމަނުޖެހުން ފާޅުކޮށް އޭނާއާ ދެކޮޅަށް ބޯޑުތަކެއް ހަދައި ސިންގަޕޫރުގެ އެކި ހިސާބުތަކުގައި މުޒާހަރާކޮށްފަ އެވެ. ލިމް ދިރިއުޅޭ ކަމަށް ބެލެވޭ ގެއެއްގެ ކައިރީގައި ވެސް މުޒާހަރާކޮށް އޭނާ އެ ފޮޓޯތައް ސޯޝަލް މީޑިއާގައި ޕޯސްޓުކުރި އެވެ.

ސިންގަޕޫރުގައި އެކަކު ވެސް އެއްވެ އުޅުމާއި، މުޒާހަރާކުރުން އޮންނަނީ ވަރަށް ބޮޑަށް ހަރުކަށިކޮށްފަ އެވެ.

ސިންގަޕޫރުގެ ފުލުހުންނާ ހަވާލާދީ މީޑިއާ އިން ބުނާ ގޮތުގައި، އެ ދެމަފިރިންނާ ދެކޮޅަށް ޝަކުތާކަތެއް ލިބިފައިވާތީ ޕާސްޕޯޓް ހިފެހެއްޓީ ކަމަށެވެ. ވެލެންސިއާގެ މޭޔަރު މާރިއާ ހޯސޭ ކަޓަލާ ވިދާޅުވީ އެ ދެމަފިރިންގެ މައްޗަށް މިހާތަނަށް ދައުވާއެއް އުފުލާފައި ނުވާ ކަމަށާއި، ހަމައެކަނި ފުރުން މަނާކުރީ ކަމަށެވެ.

"ހޮޓެލުން ބޭރަށް ވެސް ދެވޭ. އެކަމަކު އެ ގައުމުން ބޭރަކަށް ނުދެވޭ،"

ވެލެންސިއާ އާއި ސްޕެނިޝް ލީގުން ނެރުނު ބަޔާނެއްގައި ބުނީ ސިންގަޕޫރުގައި ހުންނަ ސްޕެއިން އެމްބަސީއާ ގުޅައި ދެމަފިރިންގެ ހާލަތު ކައިރިން ބަލަމުންނެވެ. އަދި ވަރަށް އަވަހަށް މައްސަލަ ހައްލުކުރެވޭނެ ކަމަށާއި، އެކަމުގައި އެހީތެރިވަމުން އަންނަ ކަމަށް ވެސް ބުނެފައިވެ އެވެ.

ބަނގުރޫޓުވާން ކައިރިވެފައި އޮތް ވެލެންސިއާއާ 2014 ވަނަ އަހަރު ލިމް ހަވާލުވެވަޑައިގެން އުއްމީދުތަކެއް ދެއްވި ނަމަވެސް، ކްލަބުގެ ހާލަތު އެއްކޮށް ބަދަލެއް ނުކުރެވުނެވެ. މިވަގުތު ސްޕެނިޝް ލީގުގެ ވަރަށް ދަށުގައި އޮތް ޓީމުގެ ސަޕޯޓަރުން ފަހަކަށް އައިސް އަންނަނީ ލިމް ކްލަބް ދޫކޮށްލަން ގޮވާލައި އަޑު އުފުލަމުންނެވެ.