ހަރަދު ކުޑަކުރަން ފާގަސަން އެމްބެސެޑަރުކަމުން ވަކިކުރަނީ

މެންޗެސްޓާ (އޮކްޓޫބަރު 15) - މެންޗެސްޓާ ޔުނައިޓެޑުގެ ހަރަދު ކުޑަކުރުމުގެ ސިޔާސަތުގެ ދަށުން، ކުރީގެ ކޯޗު ސާ އެލެކްސް ފާގަސަން، ކްލަބްގެ އެމްބެސަޑަރުކަމުން ވަކިކުރަން ނިންމައިފި އެވެ.

އެމްބެސަޑަރުގެ މަގާމުގައި އޭނާ އަށް އަހަރަކު 2.6 މިލިއަން ޑޮލަރުގެ މުސާރައެއް ލިބެ އެވެ. ފާގަސަން، 82، ވަނީ ޔުނައިޓެޑާ އެކު ހޭދަކުރި 27 އަހަރުތެރޭ 13 ފަހަރު ޕްރިމިއާ ލީގު ކާމިޔާބު ކޮށް، ދެ ފަހަރު ޗެމްޕިއަންސް ލީގު އުފުލާލައިފަ އެވެ.

އިނިރޭސި މީޑިއާތަކުން ރިޕޯޓް ކުރާގޮތުން މި ސީޒަނަށް ފަހު އޭނާ މަގާމުން ދުރަށް ދާނެ އެވެ. ނަމަވެސް ނޮން އެގްޒެކެޓިވް ޑިރެކްޓަރެއްގެ ގޮތުގައި ކްލަބްގެ ބޯޑުގައި އޭނާ ދެމި ހުންނާނެ އެވެ.

ދެހާސް ތޭރަވަނަ އަހަރު ޔުނައިޓެޑްގެ ކޯޗުކަން ދޫކޮށްލި ފަހުން ވެސް އޭނާ ފާހަގަވެފައި ވަނީ ގަވާއިދުން ކްލަބްގެ މެޗުތައް ބަލަން ދަނޑަށް ދާ ކްލަބްގެ ސަޕޯޓަރެއްގެ ގޮތުގަ އެވެ.

ޔުނައިޓެޑްގެ މައިނޯރިޓީ ހިއްސާދާރުން ކަމަށްވާ އީނިއޯސްގެ ފައުންޑާ ޖިމް ރަޓްކްލިފްގެ ހަރަދު ކުޑަކުރުމުގެ ސިޔާސަތުގެ ދަށުން 250 އެއްހާ މުވައްޒަފުން ވަޒީފާއިން ވަކިކުރާނެ އެވެ.

މިދިޔަ މަހު ޔުނައިޓެޑުން ވަނީ 148 މިލިއަން ޑޮލަރުގެ ގެއްލުން ވެފައިވާކަން ހާމަކޮށްފަ އެވެ. ނަމަވެސް މިއީ ލީގުގެ ފައިނޭންޝަލް ގަވާއިދުތަކާ ހިލާފުވާ ވަރުގެ އަދަދެއް ނޫން ކަން ވެސް އެ ކްލަބުން ބުނެ އެވެ.

މި ސީޒަނުގައި ޔުނައިޓެޑް މިވަގުތު އޮތީ ލީގުގެ 14 ވަނައިގަ އެވެ. ދަށް ނަތީޖާތަކާ އެކު އެ ކްލަބްގެ ކޯޗު އެރިކް ޓެން ހާގަށް ވެސް ވަނީ މަގާމުގެ ޕްރެޝަރު ކުރިމަތިވެފަ އެވެ.