އޮންލައިން ސްކޭމް ހިންގާ ކަމުގެ ތުހުމަތަށް ޗައިނާގެ 230 މީހަކު ލަންކާއިން ހައްޔަރުކޮށްފި

ސްރީ ލަންކާގައި ތިބެގެން ބައިނަލްއަގުވާމީ ބޭންކްތަކަށް އަމާޒުކޮށް ސައިބަކްރައިމް އާއި ސްކޭމްގެ އަމަލުތައް ހިންގާ ކަމުގެ ތުހުމަތަށް ޗައިނާގެ 230 މީހަކު ހައްޔަރުކޮށްފި އެވެ.

ސްރީ ލަންކާގެ ފޮރިން މިނިސްޓަރު ވިޖިތަ ހީރަތު ވިދާޅުވީ ފުލުހުން މި މީހުން އަތުލައިގަތީ ޗައިނާއިން ފޮނުވި ސެކިއުރިޓީ އޮފިޝަލުންގެ ވެސް އެހީތެރިކަމާ އެކުގައި ކަމަށެވެ.

މިދިޔަ ހަފްތާގައި އަތުލައިގަތް މި މީހުންގެ އަތުން 250 ކޮމްޕިއުޓަރާއި 500 މޯބައިލް ފޯނު ފެނިފައިވާ ކަމަށާއި މި މީހުން ސްކޭމްގެ އަމަލުތައް ހިންގައިގެން ހޯދާފައިވާ ފައިސާގެ އަދަދު ދެނެގަތުމުގެ މަސައްކަތް މިހާރު ކުރަމުން އަންނަ ކަމަށް މިނިސްޓަރު ވިދާޅުވި އެވެ.

"އެ މީހުންގެ މައިގަނޑު އަމާޒަކަށް ހަދާފައި އޮތީ ބޭރުގެ ބޭންކްތަކާއި މާލީ އިދާރާތައް،" މިނިސްޓަރު ވިދާޅުވި އެވެ.

ލަންކާގައި ހުންނަ ޗައިނާ އެމްބަސީން ބުނީ ތުހުމަތުކުރެވޭ މީހުން ހޯދައި ހައްޔަރުކުރުމުގައި އެހީތެރިވުމަށް ޗައިނާއިން ހާއްސަ ޓީމެއް ގެނެސްފައިވާ ކަމަށެވެ.

"މި މައްސަލައިގައި ވަނީ ތުހުމަތުކުރެވޭ ގިނަ އަދަދެއްގެ ބަޔަކު ހައްޔަރުކޮށްފައި،" މި މީހުން އަނބުރާ ޗައިނާއަށް ގެންދިއުމާއި އެކަމާ ގުޅުން ހުރި އެހެން މަސައްކަތްތައް ވެސް މިހާރު ފަށާފައިވާކަން ހާމަކޮށް ޗައިނާ އެމްބަސީން ނެރުނު ބަޔާނެއްގައި ބުންޏެވެ.

އެމްބަސީން ބުނީ ޗައިނާގައި ސައިބަކްރައިމްއާ ދެކޮޅަށް ވަރުގަދަ އަށް މަސައްކަތް ފެށުމާ އެކު އެކި ގައުމުތަކަށް ގޮސް އެ ތަންތަނުގައި އެފަދަ އަމަލުތައް ހިންގުން އިތުރުވެފައިވާ ކަމަށް ބެލެވޭ ކަމަށެވެ.

މި މީހުން ހައްޔަރުކުރުމުގެ ރެއިޑްތަކުގައި އެންމެ ގިނަ މީހުން ހައްޔަރުކުރީ މިދިޔަ ހޮނިހިރު ދުވަހު އެވެ. އެ ދުވަހު ޗައިނާގެ 126 މީހަކާއި ވިއެޓްނާމްގެ ދެ މީހަކާއި ތައިލެންޑް މީހަކާއި ފިލިޕިންސް މީހަކު ހައްޔަރުކުރި އެވެ.

މިދިޔަ ޖޫން މަހު ލަންކާއިން ވަނީ ހަމަ މިފަދަ އަމަލުތަކުގެ ތުހުމަތަށް 200 މީހަކު ހައްޔަރުކޮށްފަ އެވެ. އޭގެ ތެރޭގައި ގިނައީ އިންޑިއާ މީހުންނެވެ.

ލަންކާ އަކީ މުއާސަލާތީ އިންފްރާސްޓްރަކްޗާ ވަރުގަދަ ގައުމެކެވެ. އެއީ ދެކުނު އޭޝިއާގައި 5ޖީ އެންމެ ފުރަތަމަ ތައާރަފްކުރި ގައުމެވެ. ލަންކާގައި މި ހިދުމަތް ފެށީ މިހާރު ކުރިމަތިވެފައިވާ މާލީ ދަތިކަމުގެ ތިން އަހަރު ކުރިން އޭޕްރީލް 2019 ގަ އެވެ. -- އޭއެފްޕީ