މިދިޔަ މަސް ނިމުނުއިރު ރިޒާވްގައި 49 މިލިއަން ޑޮލަރު

މިދިޔަ މަސް ނިމުނު އިރު، ބޭނުން ކުރެވޭ ރިޒާވްގައި ހުރި އަދަދު 49 މިލިއަން ޑޮލަރަށް އަރައިފި އެވެ.

މަރުކަޒީ ބޭންކް، އެމްއެމްއޭ އިން އާންމުކުރި ތަފާސްހިސާބުތަކުން އެނގޭ ގޮތުން މިދިޔަ މަހު ރާއްޖޭގެ ޖުމްލަ ރިޒާވް ހުރީ 371 މިލިއަން ޑޮލަރުގަ އެވެ. އެއީ އޭގެ ކުރީ މަހަށް ވުރެ 16 ޕަސެންޓުގެ ދަށްވުމެކެވެ.

ބޭނުން ކުރެވޭ ރިޒާވް އެހާ ބޮޑަށް ވެއްޓުނީ، ދަރަންޏާއި ތެލުގެ ހަރަދުތަކަށް ކުރަންޖެހޭ ހޭދަ އިތުރުވުމުންނެވެ. މިދިޔަ މަހު އެފަދަ ހަރަދުތަކަށް 322 މިލިއަން ޑޮލަރު ހޭދަކޮށްފައިވާ ކަމަށް އެމްއެމްއޭގެ ތަފާސްހިސާބުތަކުން ދައްކަ އެވެ.

މިދިޔަ ފަސް މަހުގައި ވެސް ޔޫޒަބަލް ރިޒާވް އުޅުނީ 90 މިލިއަން ޑޮލަރާއި 45 މިލިއަން ޑޮލަރާ ދެމެދުގެ އަދަދެއްގެ އެވެ.

މި މަހުގެ ކުރީ ކޮޅު ރައީސް ޑރ. މުހައްމަދު މުއިއްޒު އިންޑިއާ އަށް ކުރެއްވި ދަތުރުފުޅުގައި ވަނީ އިންޑިއާ އިން ރާއްޖެއަށް 750 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއް ކަނޑައަޅައި، އެކަމުގެ ރަސްމީ ލިޔުންތަކުގައި ސޮއިކުރައްވައިފަ އެވެ. އޭގެ ތެރޭގައި ހިމެނެނީ 400 މިލިއަން ޑޮލަރުގެ ސްވޮޕް ފެސިލިޓީ އަކާޢި 30 ބިލިއަން ރުޕީސް އިން ދީފައިވާ ސްވޮޕް ފެސިލިޓީއެވެ.

އެމްއެމްއޭ އިން މިދިޔަ ހަފުތާގައި ބުނީ، ރިޒާވްގެ ހާލަތު ރަނގަޅު ކުރުމަށްޓަކައި އިންޑިއާގެ އާރްބީއައި މެދުވެރިކޮށް ކަރެންސީ ސްވޮޕް ފެސިލިޓީއެއް ހަމަޖެއްސުމުގެ މަސައްކަތް ވަރަށް ބާރަށް ކުރިއަށް ގެންދާ ކަމަށެވެ.

ރާއްޖޭގެ ފަހުގެ ތާރީހުގައި ޔޫޒަބަލް ރިޒާވް އެންމެ ބޮޑަށް ދަށަށް ދިޔައީ މިދިޔަ ޖުލައި މަހު އެވެ. އެ މަހު ރިޒާވްގައި ހުރީ 45 މިލިއަން ޑޮލަރެވެ. މި އަހަރު ފެށުނު އިރު ޔޫޒަބަލް ރިޒާވްގައި ހުރީ 110 ޑޮލަރެވެ.

އެވްރެޖް ޔޫޒަބްލް ރިޒާވް:

● 2022: 293 މިލިއަން ޑޮލަރު

● 2023: 161 މިލިއަން ޑޮލަރު

● 2024 (7 މަސް): 93 މިލިއަން ޑޮލަރު

ރިޒާވް އެހާ ބޮޑަށް ދަށަށް ދަނީ، ބޭރުގެ ދަރަނި އަދާކުރުމާއި އެ ނޫން ހަރަދުތައް ކުރުމަށް ޑޮލަރު ހޭދަކުރަން ޖެހޭ އަދަދު އިތުރުވުމުންނެވެ.

އެމްއެމްއޭ އިން ދާދި ފަހުން ވަނީ ޑޮލަރުގެ ޕްރެޝަރު ކުޑަކުރުމަށްޓަކައި ޓޫރިޒަމް ހިދުމަތްދޭ ހުރިހާ ތަނެއްގެ އާމްދަނީ ރާއްޖޭގެ ބޭންކްތަކަށް ޖަމާކޮށް، ކޮންމެ މަހެއްގެ އާމްދަނީން ވަކި އަދަދެއް ބޭންކްތަކަށް ސީދާ މާރުކުރަން ޖެހޭ ގޮތް ހަދައިފަ އެވެ. ރިސޯޓުތަކުން ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން ޖެހޭ އިރު ގެސްޓް ހައުސްތަކުން ޓޫރިސްޓެއްގެ ބޮލަކަށް 25 ޑޮލަރު މާރުކުރަން ވަނީ ކަނޑައަޅައިފަ އެވެ.