ފަސް ސެޓަށް ކުޅެ ޕޮލިސް ބަލިކޮށް ގައުމީ ލީގުގެ ޗެމްޕިއަންކަން ވެމްކޯއިން ހޯދައިފި

ވާދަވެރި މެޗުގައި ފަސް ސެޓަށް ކުޅެ ޕޮލިސް ކްލަބް ބަލިކޮށް ގައުމީ ވޮލީބޯޅަ ލީގުގެ އަންހެން ޑިވިޝަންގެ ޗެމްޕިއަންކަން ކްލަބް ވެމްކޯއިން ހޯދައިފި އެވެ.

މެޗަށް ނުކުތް އިރު ވެސް ތަށީގެ ފުރުސަތު ދެ ޓީމަށް ވެސް އޮތެވެ. ލީގުގައި ކުރިން ކުޅުނު މެޗުތަކުން ސެޓެއް ވެސް ގެއްލުވާނުލައި އެ ދެ ޓީމުން ކުޅުނު މެޗުތައް ކާމިޔާބު ކުރި އެވެ.

ސޯޝަލް ސެންޓަރުގެ އެތެރޭ ކޯޓުގައި ކުޅުނު މެޗު ވެމްކޯއިން ކާމިޔާބު ކުރީ 3-2 ންނެވެ. ފަހު ސެޓް ވެސް ޕޮލިހުން ވަރަށް ގާތުގައި ވިއްދި އެވެ. އެ ސެޓް 15-13 އިން ކާމިޔާބުކޮށް ވެމްކޯއިން ތަށި ގެންދިޔަ އެވެ.

މެޗުގެ ފުރަތަމަ ސެޓް ވެސް ދިޔައީ ވަރަށް ވާން ކޮށެވެ. 25-23 ޕޮލިހުން އެ ސެޓް ގެންދިޔަ އެވެ. ދެވަނަ ސެޓް ޕޮލިހަށް ޑޮމިނޭޓެއް ނުކުރެވުނެވެ. އެ ސެޓް ވެމްކޯއިން ގެންދިޔައީ 25-17 އިންނެވެ.

ޕޮލިހުން ގެންދިޔަ ކޮންމެ ސެޓެއްގައި ވެސް ވެމްކޯއިން ވަރަށް ގާތުން ވާދަކުރި އެވެ. ތިންވަނަ ސެޓް ޕޮލިހުން ގެންދިޔައީ އެންމެ ތިން ޕޮއިންޓްގެ ފަރަގަކުން 25-23 ންނެވެ. ހަތަރުވަނަ ސެޓް 25-21 ން ވެމްކޯއިން ކާމިޔާބުކޮށް މެޗު އިތުރަށް ވާދަވެރިވި އެވެ.

ފަހު ސެޓްގައި ވެމްކޯއިން ބޮޑު ލީޑެއް ނަގާފައި ވަނިކޮށް ޕޮލިހުން ފަހަތު ވިއްދަމުން އައިސް ފަރަގު ކުޑަ ކުރި އެވެ. އެކަމަކު އެ ސެޓްގެ ފަހުކޮޅުގައި ވެމްކޯގެ މައްޗަކަށް ލީޑެއް ނުނެގުނެވެ.

މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ބިދޭސީ ކުޅުންތެރިޔާ އުޒްބެކިސްތާނުގެ އިންނަ ޔަކޯވްލެވާ އެވެ. މުބާރާތުގެ އެންމެ މޮޅު ބިދޭސީ ކުޅުންތެރިޔަކަށް ވެސް ހޮވުނީ އޭނާ އެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ފާތިމަތު ޖޫޒާން ޒަރީރެވެ. އޭނާ ވަނީ އެންމެ މޮޅު ސެޓަރުގެ މަގާމު ވެސް ހޯދައިފަ އެވެ. އެންމެ އުއްމީދީ ކުޅުންތެރިޔަކަށް ހޮވުނީ މާޔާ ހުސައިން ސޮލާހް (ޕޮލިސް ކްލަބް)، އެންމެ މޮޅު ކޯޗުގެ މަގާމު ހޯދީ ވެމްކޯގެ އަހްމަދު އަދީލް (ބޭބެ) އެވެ.

މުބާރާތުގެ ޑްރީމް ޓީމު:

އެންމެ މޮޅު އައުޓްސައިޑް ހިޓާގެ މަގާމަށް ހޮވުނު ކުޅުންތެރިން: ހައްވާ ރާޝިދާ (ޕޮލިސް ކްލަބް)، އާއިޝަތު މާޖިދާ (ކްލަބް ވެމްކޯ)،

އެންމެ މޮޅު މިޑްލް ބްލޮކާގެ މަގާމު ހޯދި ކުޅުންތެރިން: އާމިނަތު ރިޔާސާ (ކްލަބް ވެމްކޯ)، މަރްޔަމް އަޒުމާ (ޕޮލިސް ކްލަބް)

އެންމެ މޮޅު އޮޕަސިޓް ކުޅުންތެރިޔާގެ އާމިނަތު ޝަހާ ޝާމިން (ޕޮލިސް ކްލަބް)

އެންމެ މޮޅު ސެޓަރު: ފާތިމަތު ޖޫޒާން ޒަރީރު (ކްލަބް ވެމްކޯ)

އެންމެ މޮޅު ލިބަރާ: މައިހާ އަލީ (ޕޮލިސް ކްލަބް)