ތަމްރީން ހެދި ދިވެހި ސިފައިންނަށް ޑޯނިއާ ދުއްވަން ނުދޭ ސަބަބު ހާމަނުކުރަން ޑިފެންސުން ކޯޓަށް

ރާއްޖެ އަށް އިންޑިއާ އިން ހަދިޔާކޮށްފައިވާ ޑޯނިއާ މަތިންދާބޯޓުތައް ދުއްވުމުގެ ތަމްރީން ހެދި ދިވެހި ސިފައިންނަށް އެ އުޅަނދުތައް ދުއްވަން ފުރުސަތު ނުދޭ ސަބަބު ހާމަނުކުރަން ޑިފެންސް މިނިސްޓްރީން ހައި ކޯޓުގައި މައްސަލަ އިސްތިއުނާފުކޮށްފި އެވެ.

ރާއްޖޭގައި ދުއްވާ ޑޯނިއާ އޮޕަރޭޓް ކުރަމުން އައީ އިންޑިއާ ސިފައިންނެވެ. މިހާރު ވެސް އެ އުޅަނދުތައް ދުއްވަނީ އެ ގައުމުން ފޮނުވާ ސިވިލް މީހުންނެވެ.

ނަމަވެސް ޑޯނިއާ ދުއްވަން 2021 ވަނަ އަހަރު އެމްއެންޑީއެފްގެ ދެ އޮފިސަރަކު ތަމްރީނު ކުރި އެވެ. އެއީ ސިފައިންގެ ފަސްޓް ލެފްޓިނެންޓް އިބްރާހިމް ޝަރީފާއި ލެފްޓިނެންޓް އަހުމަދު އަލީ އެވެ.

އޭގެ އިތުރުން ފަސް ޕައިލެޓެއް އަސްކަރީ އުޅަނދުތައް ދުއްވަން ތަމްރީނުކޮށް ހަތަރު ޕައިލެޓަކު ޑޯނިއާ ކޮންވާޝަން ކޯސް ފުރިހަމަކޮށްފައިވާ ކަމަށް ވެސް އެމްއެންޑީއެފުން ކުރިން ބުނެފައިވެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" ގެ ނޫސްވެރިޔާ ނާޒިމް ހަސަން ވަނީ އެ އޮފިސަރުން އެއްވެސް ވަރަކަށް އަސްކަރީ މަތިންދާބޯޓުތައް ދުއްވިތޯ ސާފުކުރަން ޑިފެންސަށް ހުށަހަޅައިފަ އެވެ. ތަމްރީން ކޮށްފައިވާ ދިވެހި ޕައިލެޓުންތަކެއް ތިއްބާ، އެ ޕައިލެޓުން ބައިވެރިވުމެއް ނެތީ ކީއްވެެގެންތޯ އާއި އެ މީހުން ސިފައިންގެ ވަޒީފާ އިން ވަކިވެފައިވާ ނަމަ ވަކިވީ ކޮން އިރަކުތޯ ވެސް ސުވާލުކުރި އެވެ.

އެ މައްސަލާގައި ޑިފެންސް މިނިސްޓްރީން ވަނީ މައުލޫމާތު ހޯދައި ލިބިގަތުމުގެ ގާނޫނުގެ 29 ވަނަ މާއްދާއާ ހަވާލާދީ އެ މައުލޫމާތު ހާމަނުކުރަން ނިންމައިފަ އެވެ. އެ މާއްދާގައި ބުނާ ގޮތުން ގައުމީ ސަލާމަތަށް ނުރައްކާވެދާނެ ފަދަ މައުލޫމާތު ސިއްރު ކުރުމުގެ ފުރުސަތު އޮންނާނެ އެވެ.

ނަމަވެސް އެ މައުލޫމާތު ހާމަކޮށްގެން ގައުމީ ސަލާމަތަށް ނުރައްކާވެދާނެ ފަދަ ކަމެއް ހިމެނިގެން ނުވާ ނަމަ އެ މާއްދާ ނުހިނގާނެ ކަމަށް ވެސް ގާނޫނުގައި ބުނެފައިވެ އެވެ.

އެކަމާ ގުޅޭ ގޮތުން ހަތަރު އަޑު އެހުން ބޭއްވުމަށް ފަހު އިންފޮމޭޝަން ކޮމިޝަނަރުގެ އޮފީހުން މިދިޔަ މަހު 9 ގައި ނިންމީ އެ މައުލޫމާތު ފަސް ދުވަސް ތެރޭގައި ހާމަކުރަން ޑިފެންސް މިނިސްޓްރީ އަށް އެންގުމަށެވެ.

ޑިފެންސް މިނިސްޓްރީން އެ މައްސަލަ ހައި ކޯޓުގައި އިސްތިއުނާފުކޮށްފައި ވަނީ މިދިޔަ އަންގާރަ ދުވަހު އެވެ.