އިތުރު 18 ބިމެއް ވިއްކަން އެޗްޑީސީން އަނެއްކާވެސް ހުޅުވާލައިފި

ހުޅުމާލެ 2 ގެ ބީޗް ފްރަންޓާއި ބީޗް ސައިޑުން އިތުރު 18 ބިމެއް ވިއްކަން އެޗްޑީސީން މިއަދު ހުޅުވާލައިފި އެވެ.

އެ ކުންފުނިން ކުރި އިއުލާނެއްގައި ހުޅުވާލީ ބީޗް ފްރޮންޓުން ދެ މިބަކާއި ބީޗް ސައިޑުން 16 ބިމެކެވެ.

ބީޗު ޕްރަންޓުން ވިއްކަނީ 1،454 އަކަފޫޓުގެ ބިމަކާއި 1،261 އަކަފޫޓުގެ ބިމެކެވެ. ބީޗް ސައިޑުން ވިއްކަނީ 1،316 އަކަފޫޓާއި 1،584 އަކަފޫޓާ ދެމެދުގެ ބިންތަކެކެވެ.

ބީޗް ފްރަންޓުން ވިއްކަނީ އަކަފޫޓެއް 4،500ރ. އަށެވެ. އެހެންވެ، އަލަށް ހުޅުވާލި 1،261 އަކަފޫޓުގެ ބިމުގެ އަގު 5.7 މިލިއަން ރުފިޔާ އަށް އަރަ އެވެ. ބީޗް ފްރަންޓުން ހުޅުވާލި 1،454 އަކަފޫޓުގެ ބިމުގެ އަގު 6.5 މިލިއަން ރުފިޔާއަށް އަރަ އެވެ.

ހުޅުމާލެ 2 ގެ ބީޗް ސައިޑުން ބިން ވިއްކާ އެންމެ ދަށް އަގަކީ އަކަފޫޓެއް 4،000ރ. އެވެ. އެހެންވެ، އަލަށް ހުޅުވާލީ 16 ބިންތަކުގެ އަގު އުޅެނީ 5.3 މިލިއަން ރުފިޔާ އާއި 6.3 މިލިއަން ރުފިޔާއާ ދެމެދުގެ އަގުތަކެއްގަ އެވެ.

މިދިޔަ ސެޕްޓެމްބަރު މަހު ވެސް އެޗްޑީސީން ވަނީ 16 ބިމެއް ވިއްކަން ހުޅުވާލައިފަ އެވެ. އެ ފަހަރު ބީޗް ފްރަންޓާއި ބީޗް ސައިޑުން ވިއްކަން ހުޅުވާލި ބިމުގެ ސައިޒު ހުރީ 1،000 އަކަފޫޓާއި 3،400 އަކަފޫޓާ ދެމެދުގެ އަގެއްގަ އެވެ. އެހެންވެ، އޭރު ހުޅުވާލި އެންމެ ބޮޑު ބިމުގެ އަގު 14 މިލިއަން ރުފިޔާ އަށް އަރަ އެވެ.

މި ބިންތައް ވިއްކަން އެޗްޑީސީން ހުޅުވާލީ ހަމައެކަނި ދިވެހިންނަށް ކުރިމަތިލެވޭ ގޮތަށެވެ. އުމުރުން 18 އަހަރުން މަތީގެ ކޮންމެ މީހަކަށް ވެސް ބީލަމަށް ކުރިމަތިލެވޭނެ އެވެ. ބީލަން ހުށަހަޅަނީ ކުންފުންޏަކުން ނަމަ އެއީ ރާއްޖޭގައި ރަޖިސްޓަރީ ކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏަކަށް ވާން ޖެހެ އެވެ.

މިދިޔަ މެއި މަހު ވެސް އެޗްޑީސީން 13 ބިމެއް ވިއްކަން ހުޅުވައިލި އެވެ. އެހެންވެ، މި އަހަރު އެޗްޑީސީން ވިއްކަން ހުޅުވާލި ބިމުގެ އަދަދު 47 އަށް އަރަ އެވެ.

މިދިޔަ އަހަރު ވެސް ދެ ފަހަރެއްގެ މަތިން ހުޅުމާލެ އިން ބިން ވިއްކަން ހުޅުވާލި އެވެ. އޭރު އެއް ބުރުގައި ވަނީ 17 ބިމެއް އަދި އަނެއް ފަހަރު 13 ބިމެއް ވިއްކަން ހުޅުވާލައިފަ އެވެ