ކުރީގެ ބޮޑުވަޒީރުގެ ދަރިކަނބަލުން އައްނަބީލާ ހަދީޖާ އިބްރާހީމް ދީދީ އަވަހާރަވެއްޖެ

ދިވެހިރާއްޖޭގެ ކުރީގެ ބޮޑުވަޒީރު އަދި ރައްޔިތުންގެ މަޖިލީހުގެ ކުރީގެ ރައީސް ސުމުއްވުލް އަމީރު އިބްރާހީމް ފާމުލަދޭރި ކިލެގެފާނުގެ އެންމެ ހަގު ދަރިކަނބަލުން ހ. އެއްގަމުގެއާގޭ އައްނަބީލާ ހަދީޖާ އިބްރާހީމް ދީދީ މިއަދު އަވަހާރަވެއްޖެ އެވެ.

އުމުރުފުޅުން 68 އަހަރުގައި އެކަމަނާ މިއަދު މެންދުރުފަހުގެ ވަގުތެއްގައި އަވަހާރަވީ އާލާސްކަންފުޅަކަށް ފަރުވާ ދެމުން އަންނަނިކޮށް އައިޖީއެމްއެޗު ގަ އެވެ. ޖަނާޒާ އޮންނާނީ މިއަދުގެ މަޣުރިބް ނަމާދަށް ފަހު އާސަހަރާގަ އެވެ.

ރައީސް ޑރ. މުހައްމަދު މުއިއްޒު ވަނީ އެކަމަނާ އަވަހާރަވުމުގެ ހިތާމަ ފާޅުކުރައްވައި، އާއިލާ އަށް ތައުޒިޔާ ފޮނުއްވައިފަ އެވެ.

"އެކަމަނާ ވަނީ ދިވެހިރާއްޖޭގެ ތައުލީމީ ދާއިރާ އާއި އަންހެނުންނަށް ކުރިއެރުމާއި ފުރުސަތުތައް ފަހިކޮށްދިނުމުގެ ދާއިރާ އާއި ހާރިޖީ ގުޅުންތަކުގެ ދާއިރާގައި ވެސް ސަރުކާރަށް ހިދުމަތް ކުރައްވައިފަ އެވެ،" އެކްސްގައި ރައީސް ކުރެއްވި ޕޯސްޓުގައިވެ އެވެ.

ހަދީޖާ ފާހަގަކުރެވެނީ ހެންވޭރު އަވަށުގެ ކުރިއެރުމަށް ވަރަށް ގިނަ މަސައްކަތްތައް ކުރެއްވި ބޭފުޅެއްގެ ގޮތުގަ އެވެ. އެ އަވަށުގެ އަންހެނުންގެ ކޮމިޓީގެ ރައީސްކަން ވަރަށް ގިނަ ދުވަހު ކުރެއްވި އެވެ. އަންހެނުންގެ ގައުމީ ކޮމިޓީގައި ވެސް ހަރަކާތްތެރިވެވަޑައިގެންނެވި އެވެ. ރައީސް މައުމޫން އަބްދުލްގައްޔޫމުގެ ވެރިކަމުގައި 1990ގެ އަހަރުތަކުގައި އަންހެނުންނަށް ފުރުސަތުތައް ތަނަވަސް ކޮށްދިނުމަށް ހިންގި މަޝްރޫއުތައް ރޭވުމުގައި އެކަމަނާ އިސް ދައުރެއް އަދާކުރެއްވި އެވެ.

ހަދީޖާ ވަނީ ރައީސް މުހައްމަދު ނަޝީދުގެ ވެރިކަމުގައި، އިންޑިއާގެ ނިއު ދިއްލީގައި ހުންނަ ރާއްޖޭގެ އެމްބަސީގައި ޑެޕިއުޓީ އެމްބެސެޑަރެއްގެ މަގާމު ކުޑަދުވަސްކޮޅަކު ފުރުއްވައިފަ އެވެ. އެކަމަނާ އޭގެ ކުރިން ވެސް އަދި ފަހުން ދިއްލީގައި ވަރަށް ގިނަ ދުވަހު ދިރިއުޅުއްވި އެވެ.

ހަދީޖާ ވަނީ ދެ ކައިވެންޏެއް ކުރައްވައިފަ އެވެ. ފުރަތަމަ ކައިވެނި ކުރެއްވީ ކުރީގެ ހެލްތު މިނިސްޓަރުގެ ނާއިބު ޑރ. އަބްދުއްސައްތާރު ޔޫސުފްއާ އެވެ. އެ ކައިވެންޏަށް ތިން ބޭފުޅުން ލިބިވަޑައިގަތެވެ. ފަހުން ކައިވެނި ބައްލަވައިގަތީ އިންޑިއާގެ ރައްޔިތަކާ އެވެ.

ހަދީޖާގެ މަންމާފުޅަކީ އެއްގަމުގޭ އަލްވަޒީރު ހަކުރާ މަނިކުފާނުގެ މުހައްމަދު ދީދީގެ، ހ. އަނބުގަސްދޮށުގޭ އައްނަބީލާ އާމިނަތު މުހައްމަދު ދީދީ އެވެ.

އެކަމަނާގެ ބައްޕާފުޅު، ފާމުލަދޭރި ކިލެގެފާނަކީ ރާއްޖޭގެ ސިޔާސީ ތާރީހުގައި ފާހަގަކޮށްލެވޭ ޝަހުސިއްޔަތެކެވެ. މުހައްމަދު ފަރީދުގެ ރަސްކަމުގައި 1954 އިން 1957 އަށް ބޮޑުވަޒީރުކަން ކުރެއްވި ފާމުލަދޭރި ކިލެގެފާނަކީ، ރާއްޖޭގެ ފުރަތަމަ ޖުމްހޫރީ ވެރިކަން އިންގިލާބަކުން ބަދަލުކޮށްލުމުގައި ވެސް އިސްކޮށް އުޅުއްވި ބޭފުޅެކެވެ.

ހަދީޖާ އަވަހާރަވުމާ އެކު، ފާމުލަދޭރި ކިލެގެފާނުގެ ބޭފުޅުންގެ ތެރެއިން މިވަގުތު ދުނިޔޭގައި އިންނެވީ އެންމެ ބޭފުޅެކެވެ. އެއީ ކުރީގެ ހެލްތު މިނިސްޓަރު އަބްދުއްސައްތާރު މޫސާ ދީދީގެ ހުވަފަތް އަނބިކަނބަލުން އައްނަބީލާ އާއިޝަތު އިބްރާހީމް ދީދީ (މާންދޫގޭ ތިއްތި ގޮމާ) އެވެ.