ކުރީގެ ޕީޖީގެ ނިންމުންތައް އަމިއްލައަށް އިސްނަގައިގެން ރިވިއު ކުރުމުގެ ވިސްނުމެއް ނެތް: އައްބާސް

ޕްރޮސިކިއުޓާ ޖެނެރަލް (ޕީޖީ) ގެ މަގާމުން ހުސެއިން ޝަމީމް ވަކިކުރުމުގައި ބައެއް މައްސަލަތައް އޭނާ ގޯސްކޮށް ނިންމެވި ކަމަށް ތުހުމަތުކުރިޔަސް، އަމިއްލައަށް އިސްނަގައިގެން އެ މައްސަލަތައް ރިވިއު ނުކުރައްވާނެ ކަމަށް ޕީޖީ އައްބާސް ޝަރީފް މިއަދު ވިދާޅުވެއްޖެ އެވެ.

މިދިޔަ އޮގަސްޓް މަހުގެ 22 ގައި ޝަމީމް ޕީޖީގެ މަގާމުން ވަކިކުރީ މަޖިލީހުގެ 65 މެމްބަރުންގެ ވޯޓާ އެކު އެވެ. ހުޅުދޫ ދާއިރާގެ ޕީއެންސީ މެމްބަރު މުހައްމަދު ޝާހިދު ހުށަހެޅުއްވި ޝަމީމްގެ އިތުބާރު ނެތްކަމުގެ މައްސަލާގައި ޖުޑީޝަރީ ކޮމިޓީއަށް ވެސް އޭނާ ހާޒިރުކުރި އެވެ. އެކަމަކު އެ ބައްދަލުވުން ސިއްރު ކުރީ އެވެ.

ޝަމީމްގެ މައްޗަށް ކުރި ތުހުމަތުތައް ދޮގު ކުރައްވައި އޭނާ އޭރު ވިދާޅުވީ އެ ތުހުމަތަކީ މަގާމުން ވަކިކުރަން ބޭނުންވެގެން ކުރި ތުހުމަތުތަކެއް ކަަމަށެވެ.

ޕީޖީ އޮފީހުން ބޭއްވި ނޫސްވެރިންގެ ބައްދަލުވުމުގައި ޝަމީމްގެ ބައެއް ނިންމުންތައް ގޯސްކަމަށް މަޖިލީހުން ބުނާއިރު އެ މައްސަލަތައް ރިވިއުކުރާނެތޯ ނޫސްވެރިއަކު ސުވާލުކުރުމުން އައްބާސް ވިދާޅުވީ އަމިއްލައަށް އިސްނަގައިގެން ވަކި މައްސަލައެއް ރިވިއު ނުކުރައްވާނެ ކަމަށެވެ.

"އަޅުގަނޑުގެ އަދިއެއް ނެތް ކުރީގެ ޕީޖީ ނިންމަވާފައި ހުރި ނިންމެވުމެއް އަޅުގަނޑު އިސްނަގައިގެން ރިވިއު ކުރާކަށް. މިވަގުތަކު ނެތް. އަޅުގަނޑަށް އެނގޭ މިހެން ދަންނަވާއިރު ވެސް މަޖިލީހުގައި ބައެއް މައްސަަލަތަކާ ގުޅިގެން ވާހަކަ ދެކެވުނު. އެއީ ކުރީގެ ޕީޖީ މަގާމުން ވަކިކުރަން އެ ބޭފުޅުން ނިންމެވި ރީޒަންކަން ވެސް،" އައްބާސް ވިދާޅުވި އެވެ.

އައްބާސް ވިދާޅުވި ގޮތުގައި އޭނާގެ ވިސްނުމަކީ މައްސަލަތަކާ ގުޅިގެން ޝަކުވާއަށް ހުޅުވާލުމެވެ. އަދި ކުރިއަށް އޮތް 20 ދުވަހުގެ ތެރޭގައި ޝަކުވާ ހުށަހަޅައިފި ނަމަ، އެ މައްސަލަތައް ރިވިއުކުރުމަށް އެކަމަށް ކަނޑައަޅާފައިވާ ކޮމިޓީއަކުން ނިންމާނެ ކަމަށް އޭނާ ވިދާޅުވި އެވެ.

"އޭގެ ބަދަލުގައި އަޅުގަނޑު މި ހުޅުވާލީ ހުރިހާ ބޭފުޅުންނަށް އެ ފުރުސަތު. އެ ފުރުސަތުގެ ތެރޭގައި ރައީސް ޔާމީންގެ މައްސަލަ ހުށަހަޅައިފިއްޔާ މިކޮޅުން މި އުފައްދާ ކޮމިޓީން ރިވިއުކުރަން ނަގާނީ. އެއީ އަދި އެހެން މައްސަލައެއް ކަމުގައި ވިޔަސް،" އައްބާސް ވިދާޅުވި އެވެ.

އައްބާސް ވިދާޅުވި ގޮތުގައި އަލުން ރިވިއުކުރާ މައްސަލަތައް އަމިއްލައަށް ނިންމަވަން ބޭނުންނުވާ ސަބަބަކީ އެގޮތަށް އެކަން ކޮށްފި ނަމަ، މީހުން އެކި ގޮތްގޮތަށް ތުހުމަތުކޮށްފާނެތީ އެވެ. އެހެންވެ އެ ފުރުސަތު ދެއްވަން ބޭނުން ނުވާ ކަމަށް އޭނާ ވިދާޅުވި އެވެ.

"އަޅުގަނޑު ވަކި މައްސަލައެއް ނުނެގިއްޖެއްޔާ ނޫނީ އަޅުގަނޑު ވަކި މައްސަލައެއް ނަގާފައި ކުރީގެ ޕީޖީގެ ޑިސިޝަން ބަދަލުކޮށްފިއްޔާ އަޅުގަނޑަށް އަންނާނެ އެލެގޭޝަން. އަމިއްލަ ޕާސަނަލް ކޮންމެވެސް ކަމެއްގައޭ އެ މައްސަލަ ވަކި ޗޫޒްކުރީ. އަޅުގަނޑު ބޭނުމެއް ނޫން އެ ފުރުސަތު ދޭކަށް. އެއީ އަޅުގަނޑު އެކަން ކުރަން ބޭނުންވާ ގޮތެއް ނޫން،" އައްބާސް ވިދާޅުވި އެވެ.

އެހެންވެ، ޕީޖީގެ މަސައްކަތްތަކާ ގުޅިގެން އެއްވެސް ޝަކުވާއެއް އޮތް ނަމަ، އެ އޮފީހަށް ޝަކުވާ ހުށަހެޅުމަށް އައްބާސް އެދިވަޑައިގަތެވެ.

ޝަމީމް މަގާމުން ވަކިކުރަން މަޖިލީހުން ފާސްކޮށްފައި ވަނީ އޭނާ އިސްތިއުފާ ދެއްވާފައިވަނިކޮށެވެ. އެކަމަކު މަޖިލީހުން ބުނެފައިވާ ގޮތުގައި އޭރު އޭނާގެ އިސްތިއުފާގެ ސިޓީއެއް ނުލިބެ އެވެ.

އެހެންވެ، ޕީއެންސީގެ މެޖޯރިޓީ އޮތް މަޖިލީހުން އޭނާ މަގާމުން ވަކިކުރީ އެވެ.