4،000 އަށް ވުރެ ގިނަ ކުދިންނާ އެކު އޭލެވެލް އިމްތިހާނު ފަށައިފި

މި އަހަރުގެ އޭލެވެލް އިމްތިހާނު 4،000 އަށް ވުރެ ގިނަ ކުދިންނާ އެކު މިއަދު ފަށައިފި އެވެ.

އެޗްއެސްސީ އެޑެކްސެލް އަދި ކެމްބްރިޖް އޭލެވެލް އިމްތިހާނު ހިމެނޭ ގޮތަށް 4،293 ކުދިން މި ފަހަރުގެ އިމްތިހާނުގައި ބައިވެރިވި އެވެ. އިމްތިހާނު ބާއްވަނީ ރާއްޖޭގެ 48 ސެންޓަރެއްގަ އެވެ.

އެޑިއުކޭޝަން މިނިސްޓްރީން ބުނީ، އެޗްއެސްސީ އިމްތިހާނުގައި މި އަހަރު ބައިވެރިވި 1،663 ކުދިން ކަމަށެވެ. އެޑެކްސެލް އޭލެވެލް އިމްތިހާނުގައި 3،842 ކުދިން، ކެމްބްރިޖް އޭލެވެލް އިމްތިހާނުގައި 443 ކުދިން ބައިވެރިވި ކަމަށް މިނިސްޓްރީން ބުންޏެވެ.

ކެމްބްރިޖް އޭލެވެލްގެ އިމްތިހާނުތައް މާދަމާ އިން ފެށިގެން ފެށިގެން އަންނަ މަހުގެ 14 އިގެ ނިޔަލަށް ކުރިއަށް ގެންދާއިރު، އެޑެކްސެލް އޭލެވެލް އިމްތިހާނުތައް ފެށުމަށް ނިންމާފައި ވަނީ އަންނަ މަހުގެ 8 އެވެ. އެ އެޑެކްސެލް އޭލެވެލް އިމްތިހާނުތައް ނިމޭނީ އަންނަ މަހުގެ 31ގަ އެވެ.

އޯލެވެލް އަދި އޭލެވެލް އިމްތިހާނު ހަދާ ކުދިންގެ ތެރެއިން ފާސްވާ ޕަސެންޓު އަދިވެސް 50 ޕަސެންޓަށް ނާރާތީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވަނީ ދާދި ފަހުން ކަންބޮޑުވުން ފާޅުކުރައްވައިފަ އެވެ.

އޭލެވެލް އިމްތިހާނު ނިންމާ ކުދިން ޔުނިވާސިޓީ ތައުލީމާ ގުޅޭ އަދަދު ވެސް ވަރަށް ދަށްކަމުން ޓީޗަރުންގެ ފެންވަރު މަތިކޮށްގެން ނޫނީ ސަރުކާރުން ބޭނުންވާ ނަތީޖާއާ ހަމައަށް ވާސިލް ނުވެވޭނެ ކަމަށް މިނިސްޓަރު އޭރު ވިދާޅުވި އެވެ.

މިނިސްޓަރު ވިދާޅުވެފައިވާ ގޮތުގައި، އެކަން ހައްލު ކުރުމަށް ތައުލީމީ ދާއިރާއަށް 2،700 އަށް ވުރެ ގިނަ ޓީޗަރުން ބޭނުންވެ އެވެ.