ރާއްޖެ އަށް ވަގު ޕާސްޕޯޓެއްގައި އައި ތިން މީހަކު ހިފަހައްޓައިފި

ޝަހުސު އޮޅުވާލައިގެން ރާއްޖެ އެތެރެވާން މަސައްކަތްކުރި ތިން މީހަކު ވެލާނާ އިންޓަނޭޝަނަލް އެއާޕޯޓުން ހިފަހައްޓައިފި އެވެ.

މޯލްޑިވްސް އިމިގްރޭޝަނުން މިރޭ ބުނި ގޮތުގައި އޭގެ ތެރެއިން އެކަކު ކާކުކަން އޮޅުވާލައިގެން ރާއްޖެ އަށް އެތެރެވާން އުޅުނީ މިދިޔަ ޖުލައި މަހުގެ 31 ގަ އެވެ. އެއީ އުމުރުން 25 އަހަރުގެ ފިރިހެނެކެވެ. އަނެއް ދެ މީހުން ހިފެހެއްޓީ މިދިޔަ އޮގަސްޓް މަހު އެވެ.

އޭގެ ތެރެއިން އުމުރުން 23 އަހަރުގެ ފިރިހެނަކު ހިފަހައްޓާފައި ވަނީ އޮގަސްޓު 16 ވަނަ ދުވަހު އެވެ. އަދި އޮގަސްޓު 18 ވަނަ ދުވަހު އުމުރުން 21 އަހަރުގެ ފިރިހެނަކު ހިފެހެއްޓި ކަމަށް އިމިގްރޭޝަނުން ބުންޏެވެ.

އެއީ ކޮން ގައުމަކުން ރާއްޖެ އެތެރެވާން މަސައްކަތްކުރި ބައެއް ކަމެއް ސާފެއް ނޫނެވެ. އެ ތިން މީހުން ފޮޓޯ މިއަދު އާންމުކުރިއިރު އެމީހުން އަނބުރާ ފޮނުވާލާފައިވާ ކަމަށް ވެސް އިމިގްރޭޝަނުން ބުނެ އެވެ.

މީގެ ކުރިން ވެސް ރާއްޖެ އަށް އެހެން މީހުންގެ ޕާސްޕޯޓު ބޭނުންކޮށްގެން މީހުން އެތެރެވާން މަސައްކަތްކުރުމުން ހިފަހައްޓާފައިވެ އެވެ.

ރާއްޖޭގައި މަސައްކަތްކުރާ ބިދޭސީންގެ ތެރެއިން ގަވާއިދާ ހިލާފުވެގެން ޑީޕޯޓް ކުރުމުން، ޝަހުސު އޮޅުވާލައިގެން އެ މީހުން އެނބުރި ރާއްޖެ އަށް އާދެ އެވެ. އަދި ބައެއް މީހުން ރާއްޖެ އެތެރެވެ، ޕާސްޕޯޓާއި އެހެން ލިޔެކިޔުންތައް ފޮރުވައި ގަސްދުގައި ގަވާއިދާ ހިލާފަށް އުޅެ އެވެ.

މި ފަހުން މޯލްޑިވްސް އިމިގްރޭޝަނުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދުމަށް ގިނަ އޮޕަރޭޝަންތަކެއް ހިންގަމުންނެވެ. އެކި ދާއިރާތަކުގައި މަސައްކަތްކުރާ ބިދޭސީންނަށް އަމާޒުކޮށް ހިންގި އެ އޮޕަރޭޝަންތަކުގައި މިހާތަނަށް 4،000 އަށް ވުރެ ގިނަ ބިދޭސީން ވަނީ ޑީޕޯޓުކޮށްފަ އެވެ.