އަލިފާނުގެ ހާދިސާތަކަށް ތައްޔާރުވުމަށް އެމްއޭސީއެލްއިން ފަޔާ ފައިޓަރުން ތަމްރީނުކޮށްފި

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހިނގާ އަލިފާނުގެ ހާދިސާތަކަށް ތައްޔާރުވުމުގެ ގޮތުން މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) އިން ކުރިއަށް ގެންދިޔަ ބޭސިކް ފަޔާ ފައިޓާ ކޯސް ނިންމާލައިފި އެވެ.

މިދިޔަ ޖުލައި މަހުން ފެށިގެން 43 ދުވަހުގެ މުއްދަތަށް ކުރިއަށް ގެންދިޔަ ފަޔާ ފައިޓަރުން ތަމްރީނު ކުރުމުގެ 29 ވަނަ ބެޗުގެ ކޯހުގައި އޭވިއޭޝަން ސޭފްޓީ އާއި އިމަޖެންސީ ހާލަތްތަކުގައި ފުރިހަމައަށް އަމަލުކުރާނެ ގޮތްތައް ވަނީ ކިޔައިދީފަ އެވެ. މި ކޯހުގައި އެއާޕޯޓާއި އެއާޕޯޓު ވަށައިގެންވާ ސަރަހައްދުގެ އިތުރުން މަތިންދާބޯޓުގައި ހިނގާފާނެ އަލިފާނުގެ ހާދިސާތަކުގައި އަމަލުކުރަންވީ ގޮތުގެ ތަމްރީނުތައް ވަނީ ދީފަ އެވެ.

މި ކޯހުގެ ނިންމުމުގެ ރަސްމިއްޔާތުގައި އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުހައްމަދު ލައްމާން ވިދާޅުވީ އެ ކޯހުން އެމްއޭސީއެލްގެ އިންހައުސް ޓްރެއިނިން ނިޒާމުގެ ހަރުދަނާކަން ފެނިގެން ދިޔަ ކަމަށެވެ. އަދި ދެމެހެއްޓެނިވި ގޮތެއްގައި އެފަދަ ތަމްރީނުތައް ހިންގުމަށް މަސައްކަތް ކުރައްވާނެ ކަމަށް ވިދާޅުވި އެވެ.

އެމްއޭސީއެލްއިން ބުނި ގޮތުގައި މި ކޯހަކީ އެ ކުންފުނީގެ އިންހައުސް ޓްރެއިނަރުން ބޭނުންކޮށްގެން މި ކޯސް ކުރިއަށް ގެންދިޔަ ފުރަތަމަ ފަހަރެވެ. އަދި މިއީ މޯލްޑިވްސް ސިވިލް އޭވިއޭޝަން އޮތޯރިޓީއިން ފާސްކޮށްފައިވާ ކޯހެކެވެ.

އެމްއޭސީއެލުން ފަޔާ ފައިޓަރުން ތަމްރީން ކުރަމުން އަންނައިރު، ދާދިފަހުން އެ ކުންފުނިން ވަނީ ފަހުގެ ޓެކްނޮލޮޖީތައް ހިމެނޭ ފަޔާ ސްޓޭޝަނެއް ވެސް އެއާޕޯޓުގައި ހުޅުވައިފަ އެވެ. މިއީ އިމަޖެންސީ ހާލަތްތަކުގައި އަވަހަށް ރެސްޕޮންޑް ކުރުމުގެ ނިޒާމު ހަލުވި ވެގެންދިޔަ ކަމެއް ކަމަށް އެ ކުންފުނިން ބުންޏެވެ.