ސަލާމަތީ މަޖިލީހުގައި ނެތް ޑިމޮކްރަސީއެއް ގައުމުތަކުން ލިބޭނެ ކަމަށް އުންމީދެއް ނުކުރެވޭނެ: ރައީސް

ފަލަސްތީނުގައި އިޒްރޭލުން ހިންގަމުންދާ ނަސްލު ނައްތާލުމުގެ ޖަރީމާތައް ހުއްޓުވުމުގައި ނުކުޅެދުން ފަދަ އެތައް ކަމަކީ އދ. ގެ ސަލާމަތީ މަޖިލީހުގެ އާރެއް ބާރެއް ނެތުމުގެ ނަތީޖާ ކަމަށާއި އެ ކައުންސިލްގައި ނެތް ޑިމޮކްރަސީއަކާއި ޒިންމާދާރުކަމެއް މެންބަރު ގައުމުތަކުން ވެސް ލިބޭނެ ކަމަށް އުންމީދު ނުކުރެވޭނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އދ.ގެ މެންބަރު ގައުމަކަށް ރާއްޖެ އަށް ވިތާ 59 އަހަރު ފަހުން، އދ. ގެ ސަލާމަތީ މަޖިލީހުގައި ރާއްޖޭގެ ރައީސަކު ފުރަތަމަ ފަހަރަށް ބައިވެރިވެވަޑައިގެން ދެއްވި ބަޔާނުގައި ރައީސް މުއިއްޒު ވިދާޅުވީ ސީދާ އެ މަނިކުފާނު ވަޑައިގަތީ ދިވެހި ރައްޔިތުންގެ މެސެޖެއް ދެއްވުމަށް ކަމަށެވެ. އެއީ؛

"ދުނިޔޭގެ ސުލްހަޔާއި ސަލާމަތަށް މި ކައުންސިލްގެ ޒިންމާ ބޮޑުކަމުގެ ވާހަކަ،

ދުނިޔޭގެ ރައްޔިތުން މި ކައުންސިލަށް ކުރާ ބޮޑު އުއްމީދުގެ ވާހަކަ،

އުންމީދު ގެއްލިފައިވާ މީހުންނަށް އުންމީދު ހޯދައިދީ، ކެކުޅުންތަކަށް ނިމުން ގެނެސްދިނުމުގައި މި ކައުންސިލް ނާކާމިޔާބު ވެފައިވާ ވާހަކަ،" ރައީސްގެ ވާހަކަފުޅު ފައްޓަވަމުން ވިދާޅުވި އެވެ.

ރައީސް ވިދާޅުވި ގޮތުގައި ދުނިޔޭގެ ނިޒާމުގެ ތެރޭގައި އިތުބާރު ގެއްލި ޝައްކުތައް ގިނަވަމުން ދާއިރު އެންމެ ބޮޑު އެއް ސަބަބަކީ ސަލާމަތީ މަޖިލީހުގެ ނާގާބިލްކަމެވެ.

"އަޅުގަނޑުމެން މިއަދު މިތާ މި ތިބޭއިރު ބައިނަލްއަގުވާމީ ގާނޫނު ތަންފީޒު ކުރަން ނުކެރި، ނަސްލު ނައްތާލުމުގެ ޖަރީމާއެއް އެ ދަނީ މި ކައުންސިލްގެ ކުރިމަތީގައި ހިނގަމުން،" އިޒްރޭލުން ފަލަސްތީނުގެ ޣައްޒާގައި ހިންގަމުންދާ ލާއިންސާނީ އަމަލުތަކަށް އިޝާރާތްކުރައްވައި ރައީސް މުއިއްޒު ވިދާޅުވި އެވެ.

ޣައްޒާގައި ނަސްލު ނައްތާލުމުގެ އަމަލުތައް ހިނގާ ކަމަށް އދ. އިން ކަނޑައަޅާފައިވާ މިނިވަން ރެޕަޓުއާއިން ވިދާޅުވެފައި ވާއިރު އަދި އިޒްރޭލުން ފަލަސްތީނުގެ ބިންތަކުން ފައިބައި ބަދަލު ދޭންޖެހޭނެ ކަމަށް އިންޓަނޭޝަނަލް ކޯޓް އޮފް ޖަސްޓިސް އިން ބުނެފައި ވާއިރު އެ ކަންކަމާ ގުޅޭ ގޮތުން ސަލާމަތީ މަޖިލީހަށް ކުރެވުނު ކަމެއް ނެތްކަން ރައީސް ފާހަގަކުރެއްވި އެވެ.

"މި ޖަމިއްޔާއިން މި ޖަމިއްޔާގެ އަޑު އަހަންޖެހޭ...،" ރައީސް ވިދާޅުވި އެވެ.

ރައީސް މުއިއްޒު ސިފަކުރެއްވި ގޮތުގައި، ދުނިޔޭގެ ސުލްހަޔާއި އިންސާފަށް ސަލާމަތީ މަޖިލީހުން ހަމަތަކާއި އުސޫލުތައް ކަނޑައަޅާއިރު މި ހުރިހާ ކަމެއް، ފަލަސްތީނުގެ ޣައްޒާގައި ބިމާ ހަމަކުރަމުންދާ އިމާރާތްތަކާއި މައުސޫމް ރައްޔިތުންގެ ފުރާނަ ނެތް ހަށިތަކުގެ ދަށުގައި ދަނީ ފަނާވަމުންނެވެ.

"މި ކައުންސިލްގައި ބާރު ގަދަ މެންބަރު ގައުމުތަކުން މިއީތޯ އަޅުގަނޑުމެންނަށް ބިނާކޮށްދޭން ބޭނުންވާ ދުނިޔެއަކީ؟" ރައީސް ސުވާލުކުރެއްވި އެވެ.

ރައީސް ވިދާޅުވި ގޮތުގައި ސަލާމަތީ މަޖިލީހަށް އިތުބާރު ގެއްލުމުން ދިއުން ގުޅިފައިވަނީ ގައުމުތަކަށް ހަމަހަމަ ފުރުސަތު ކައުންސިލުން ނުދިނުމާއި ޒިންމާދާރު ނުކުރެވުމާއި ހާމަކަން ކުޑަވުމާ އެވެ. އެހެންވެ ސަލާމަތީ މަޖިލިސް ބަދަލުކުރަންޖެހޭ ކަމަށާއި މިއީ އެކަން ކުރަންވީ ވަގުތު ކަމަށް ވިދާޅުވި އެވެ.

ސަލާމަތީ މަޖިލިހުގެ އެކުލަވައިލުން މި ޒަމާނަށް ނުފެތޭ ކަމަށް ރައީސް މުއިއްޒު ވިދާޅުވި އެވެ. މިސާލެއް ދައްކަވަމުން އެ މަނިކުފާނު ވިދާޅުވީ ތަރައްގީވަމުން އަންނަ ކުދި ޖަޒީރާ ގައުމުތަކަކީ އދ.ގެ މެންބަރު ގައުމުތަކުގެ ފަސް ބައިކުޅަ އެއް ބައި ކަމަށް ވާއިރު ވެސް ސަލާމަތީ މަޖިލީހުގައި އެ ގައުމުތަކަށް ގޮނޑިއެއް ނެތުމެވެ.

އެހެންވެ "ސްމޯލް އައިލެންޑް ޑިވެލޮޕިން ނޭޝަންސް" ނުވަތަ ސިޑްސް އަށް ސަލާމަތީ މަޖިލީހުގައި ދާއިމީ ގޮނޑިއެއް ހާއްސަކުރުމަކީ ތާރީހީ ކަމަކަށް ވާނެ ކަމަށް ވިދާޅުވި އެވެ. މި ގައުމުތަކަކީ މައްސަލަތައް ހައްލުކުރުމުގައި ކާމިޔާބު ތާރީހެއް އޮތް ގައުމުތަކެއް ކަމަށާއި އެ ގައުމުތަކުގެ ބައިވެރިވުމާ އެކު ކައުންސިލްގެ ގާބިލްކަން އިތުރުވާނެ ކަމަށް ވިދާޅުވި އެވެ.

ވީޓޯ ކުރުމުގެ ބާރު އުވާލަންޖެހޭ

ސަލާމަތީ މަޖިލީހުގެ ނިންމުންތައް އެ މަޖިލީހުގެ ދާއިމީ ފަސް މެންބަރުން ކަމަށްވާ އެމެރިކާ، ރަޝިޔާ، އިނގިރޭސި ވިލާތް، ފްރާންސް އަދި ޗައިނާ އިން ކުރެ ކޮންމެ ގައުމަކުން ވެސް ބޭނުންވެއްޖެ ނަމަ ވީޓޯކޮށް ބާތިލްކޮށްލުމުގެ ބާރު އޮންނާތީ އެކަމާ ގުޅޭ ގޮތުން ވެސް ރައީސް ވާހަކަފުޅު ދެއްކެވި އެވެ.

"މި ކައުންސިލްގައި ޑިމޮކްރަސީ އާއި ޒިންމާދާރުކަން ގާއިމުނުކޮށް އެ ކަންކަން މެންބަރު ގައުމުތަކުން ލިބޭނެ ކަމަށް އުންމީދު ކޮށްގެން ނުވާނެ،" ރައީސް މުއިއްޒު ވިދާޅުވި އެވެ.

"އަޅުގަނޑުމެންނަށް އެކަމުގެ ހައްލު އެނގޭ. އެކަމަށް ބޭނުންވަނީ ހިތްވަރު ... ކަން ކުރުމުގެ އަޒުމް."

އިޒްރޭލުން ހިންގާ ޖަރީމާތައް ހުއްޓުވުމުގައި ނާކާމިޔާބުވެފައި ވަނީ ވެސް ވީޓޯކުރުމުގެ ބާރު އޮންނާތީ ކަމަށް ރައީސް ވިދާޅުވި އެވެ. އިޒްރޭލު ހުރިހާ ކަމަކުން ބަރިއްޔަވެގެން އޮވެ، އަނިޔާވެރި އިސްތިއުމާރެއް ކުރިއަށް ގެންދަނީ ކަމަށާއި އެކަމުގެ ސަބަބުން މުޅި ސަރަހައްދަށް ނުރައްކާވެފައިވާ ކަމަށް ރައީސް ވިދާޅުވި އެވެ.

"ކުށެއް ނެތް އާންމުންނާ ދެކޮޅަށް ގަތުލްއާންމު ހިންގަން ފުރުސަތު ލިބެނީ ވީޓޯގެ ސަބަބުން. އެހެންވެ ވީޓޯ ނައްތާލަން ހިނގާ،" ރައީސް ގޮވައިލެއްވި އެވެ.

ރައީސް ވަނީ ކައުންސިލްގެ ގާބިލްކަން އިތުރުކުރުމަށް އަލުން މަސައްކަތް ފަށައި އިތުބާރު ހޯދުމަށް ގޮވާލައްވައިފަ އެވެ. އެކަމަކު އެކަން ކާމިޔާބުވާނީ ރާއްޖެ ފަދަ ކުދި ގައުމުތަކާ އެކު މުޅި ދުނިޔޭގެ ބައިވެރިވުން ލިބޭ ގޮތަށް ކުރާ މަސައްކަތުން ކަމަށް ރައީސް ތަކުރާރުކޮށް ވިދާޅުވި އެވެ.