ރައީސްގެ ވަރުގަދަ މެސެޖެއް: އިޒްރޭލުން ހިންގަނީ ގަތުލުއާމެއް، ޖަވާބުދާރީކުރުވަންޖެހޭ

25 ސެޕްޓެމްބަރ 2024

ފަލަސްތީނުގެ ބިންތަކަށް ވެރިވެގަންނަން އިޒްރޭލުން ހިންގަމުންދަނީ ގަތުލުއާމެއް ކަމަށާއި އެކަން ދުނިޔޭގެ ގައުމުތަކުން ހުއްޓުވަން ޖެހޭ ކަމަށް އދ. ގެ އާންމު މަޖިލީހުގައި ރައީސް ޑރ. މުހައްމަދު މުއިއްޒު އިއްޔެ ވިދާޅުވެއްޖެ އެވެ.

އެމެރިކާގެ ނިއު ޔޯކުގައި ކުރިއަށް ގެންދާ އދ. ގެ އާންމު މަޖިލީހުގެ 79 ވަނަ ބައްދަލުވުމުގައި ތަގުރީރު ކުރައްވަމުން ރައީސް ވިދާޅުވީ އދ. ގެ މުއާހަދާތަކާއި ނިންމުންތަކަށް ހުރިހާ ގައުމަކުން ވެސް އެއީ ކިތަންމެ ބޮޑު ގައުމެއް ވިޔަސް ކުޑަ ގައުމެއް ވިޔަސް އެއް ހަމައެއްގައި އަމަލު ކުރަން ޖެހޭނެ ކަމަށެވެ.

އެއްވެސް ގައުމަކުން ހައްގެއް ނިގުޅައިގަތުމަކީ ގަބޫލުކުރެވޭނެ ކަމެއް ނޫން ކަމަށާއި އަސާސީ ހައްގުތައް ރައްކާތެރިކުރަން އެންމެ މުހިންމު ކަމަކީ އެ ހައްގުތަކަށް އިހުތިރާމްކުރާ ސަގާފަތެއް އާލާކުރުން ކަމަށް ރައީސް ވިދާޅުވި އެވެ. ނަމަވެސް، އިޒްރޭލްގެ އަމަލުތައް ހުރީ އެގޮތަށް ނޫން ކަމަށާއި ދުނިޔޭގެ ގައުމުތަކަށް އެކަމުގައި އެކަށީގެންވާ ފިޔަވަޅެއް ވެސް އެޅިފައި ނެތް ކަމަށް ރައީސް މުއިއްޒު ވިދާޅުވި އެވެ.

ރައީސް މުއިއްޒު އދ. ގެ އާންމު މަޖިލިހުގެ 79 ވަނަ ސެޝަންގައި އިއްޔެ ތަގުރީރު ކުރައްވަނީ.

"އަޅުގަނޑުމެންނަށް މިކަން މިގޮތަށް ކުރިއަށް ގެންދެވޭކަށް ނެތް. އަޅުގަނޑުމެން ބައްދަލުކޮށް، ވާހަކަ ދައްކައި، ވައުދުވެވޭ، ނަމަވެސް އަމަލީ ގޮތުން އެއްވެސް ކަމެއް ނުކުރެވޭ،" ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން އދ. ގެ ސެޝަނެއްގައި ފުރަތަމަ ފަހަރަށް އެ މަނިކުފާނު އިއްވެވި ތަގުރީރުގައި ވިދާޅުވި އެވެ.

ރައީސް ވިދާޅުވީ މިއީ ގާޒާގައި އިޒްރޭލުން މިހާރު ހިންގާ އިންތިހާ އަށް ބޮޑު އަނިޔާވެރިކަމެއް އަދި ނަސްލު ނައްތާލުމުގެ އަމަލެއް ކަމަށެވެ. އެއީ ބައިނަލްއަގްވާމީ ނިޒާމާއި އިންސާފަށް އިޒްރޭލުން ގޮންޖެހުން ކަމަށް ވެސް ވިދާޅުވި އެވެ.

ރައީސް މުއިއްޒު މިދިޔަ ހޯމަ ދުވަހު ފަލަސްތީނުގެ ރައީސް މަހުމޫދު އައްބާސްއާ އެކު އދ. ގެ މައި މަރުކަޒުގައި.--ފޮޓޯ: ރައީސް އޮފީސް

"ގޭގެ އާއި ހޮސްޕިޓަލްތަކާއި ސްކޫލްތަކާއި އިންސާނީ އެހީގެ ވަސީލަތްތައް ތަކުރާރުކޮށް އެ ދަނީ ހަލާކު ކުރަމުން. ފިރިހެނުންނާއި އަންހެނުންނާއި ކުޑަކުދިން މެރުން ތަކުރާރު ކުރަމުން. ހާހުން ހާހަށް ގާޒާގައި އެތައް އާންމު ރައްޔިތުންނެއް މަރުވަމުންދަނީ،" ރައީސް ކަންބޮޑުވުމާ އެކު ވިދާޅުވި އެވެ.

We need nations united in harmony, not in misery – Mohamed Muizzu

Maldivian President Mohamed Muizzu has delivered his speech during a session of the 79th session of UN General Assembly, addressing major humanitarian and geopolitical issues

މިހާރު އިޒްރޭލުން ލެބަނަންގައި ހިންގާ ހަމަލާތަކުގައި ވެސް އެތައް ސަތޭކަ އާންމުންގެ ފުރާނަ ގެއްލެމުންދާ ކަން ރައީސް ކަންބޮޑުވުމާ އެކު ފާޅުކުރެއްވި އެވެ. އެ މަނިކުފާނު ވިދާޅުވީ އިންސާނިއްޔަތުކަން ހުރި ކޮންމެ މީހެއްގެ ހިތުގައި އެ މީހުންގެ ރުއިމުގެ އަޑު އިވެމުން އަންނަ ކަމަށެވެ.

Comments