ކުރިމަގުގެ ޖީލު އެދެނީ ޣައްޒާގެ ގަތުލްއާންމު ހުއްޓުވާނެ ހިތްވަރު ހުރި ދުނިޔެއެއް: ރައީސް

ކުރިމަގުގެ ޖީލުން އެދެނީ ފަލަސްތީނުގެ ނަސްލު ނައްތާލުމަށް އިޒްރޭލުން ޣައްޒާގައި ކުރިއަށްގެންދާ ގަތުލުއާންމު ހުއްޓުވުމުގެ ހިތްވަރު ހުރި ޖީލެއް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އ.ދގައި މިރޭ ފެށިގެން ކުރިއަށްދާ "ސަމިޓް އޮފް ދަ ފިއުޗާ" ގައި ތަގްރީރު ކުރައްވަމުން ރައީސް ވިދާޅުވީ، އ.ދ. ގެ އާންމު މަޖިލީހަށް އެއްވެ އެތައް ތަސައްވުރެއް، ފާއިތުވީ އަހަރުތަކުގައި ގައުމުތަކުން އެކުލަވާލާފައިވީ ނަމަވެސް އެ ކަންކަން ގިނަ ފަހަރަށް ހުރީ ހަގީގަތަކަށް ނުވެ ކަމަށެވެ.

އަންނަން އޮތް ޖީލުތަކަށް ބައިނަލްއަގްވާމީ މަލްޓިލޭޓަރަލް ސިސްޓަމް ތައްޔާރުކުރުމުގެ މަޝްވަރާ ކުރުމަށް ބާއްވާ މި ސަމިޓުގައި ރައީސް ވިދާޅުވީ މިއީ އަންނަން އޮތް ޖީލުތަކުން މި ޖީލު އިންސާފުކުރާނީ ނިންމާ ނިންމުންތަކަކުން ނޫން ކަމަށާއި އަޅާ ވަރުގަދަ ފިޔަވަޅުތަކަކުން ކަމަށެވެ.

މިގޮތުން، ބޭނުންވަނީ ކޮންމެ ކޮންމެ ގޮންޖެހުމަކާ ކުރިމަތިލުމުގެ ހިތްވަރު ހުރި ދުނިޔެއެއް ކަމަށާއި ވާންވީ ޣާޒާގައި ހިނގަމުންދާ ގަތުލްއާންމު ހުއްޓުވުމުގެ ހިތްވަރު ހުރި މަލްޓިލޭޓަރަލް ސިސްޓަމެއް ކަމަށެވެ،

"[ކުރިމަގުގެ ޖީލުން ބޭނުންވަނީ] ފަލަސްތީނުގެ ދައުލަތަށް، އދ.ގެ ފުރިހަމަ މެންބަރުކަން ދިނުމުގެ ހިތްވަރު. އިންސާނީ ހައްގުތަކަށް އަރައިގަންނަ މީހުން ޖަވާބުދާރީކުރެވޭނެ ހިތްވަރު،" ރައީސް ވިދާޅުވި އެވެ.

އެމަނިކުފާާނު ވަނީ ރާއްޖޭގެ ތަސައްވުރު ހާމަކުރައްވައި ތިން ކަމެއް ހުށަހަޅުއްވައިފަ އެވެ. ރައީސް ވިދާޅުވީ މިއީ މި ނިޒާމުގެ ތެރެއިން ނަތީޖާ ނެރެންވީ ވަގުތު ކަމަށާއި އެންމެ ފުރަތަމަ ކުރަން ޖެހޭ ކަމަކީ އަދުގެ ޒުވާން ޖީލު ބާރުވެރިކުރުވުން ކަމަށެވެ.

މާދަމާ ދުނިޔެ ލީޑުކުރަން ތިބި ބަޔަކީ އަދުގެ ޒުވާނުން ކަމަށާއި ރާއްޖޭގެ ތަސައްވުރަކީ ޑިޖިޓަލް އިނޮވޭޝަންގެ ތެރެއިން ޒުވާނުންނަށް އިގްތިސޯދީ ފުރުސަތުތަކާއި އިޖުތިމާއީ ހަމަހަމަކަން ގާއިމްކޮށްދިނުން ކަމަށް ރައީސް ވިދާޅުވި އެވެ.

ރައީސް ވިދާޅުވީ ދެ ވަނަ ކަމަކީ މޫސުމަށް އަންނަ ބަދަލުތަކާ ކުރިމަތިލުން ކަމަށާއި އަންނަން އޮތް ޖީލުތަކަށް ކުރިމަތިވެފައިވާ އެންމެ ބޮޑު ބިރަކީ އެއީ ކަމަށެވެ.

"މޫސުމީ ހާސްކަމަކީ ވަރަށް ބޮޑު ކަންބޮޑުމެއް. ދިރާސާތަކުން ދައްކާ ގޮތުގައި އަދުގެ ޒުވާނުންގެ ގާތްގަނޑަކަށް 62 އިންސައްތަ މީހުންނަށް މިކަމުގެ އަސަރު ކުރޭ،" ރައީސް ވިދާޅުވި އެވެ.

ރައީސް ހުށަހެޅުއްވި ތިން ވަނަ ކަމަކީ ކަންކަން ހާސިލް ކުރެވޭނެ މަގުފަހި ކުރެވޭނެ މާލީ އެހީތެރިކަން ހޯދުން ކަމަށެވެ.

ރައީސް ވިދާޅުވީ އެކްޝަން ޕްލޭން ޓު އެކްސެލެރޭޓް ޕްރޮގްރެސް އޮން ދަ ސަސްޓެއިނަބަލް ޑިވެލޮޕްމަންޓް ގޯލްސް (އެސްޑީޖީ) އާއި އެހެނިހެން އިންވެސްޓްމެންޓުތަކުގެ ފަރަގު ވަރަށް ބޮޑު ކަން ރައީސް ފާހަގަކުރެއްވި އެވެ. އެގޮތުން އެ ފަރަގު އަހަރަކު 2.5 އާއި 4 ޓްރިލިއަން އެމެރިކާ ޑޮލަރަށް އަރާއިރު، އޭގެ އަސަރު ރާއްޖެއަށް ވަރަށް ބޮޑަށް ކުރާ ކަމަށާއި އެ ފަރަގު ނައްތާލަން ޖެހޭ ކަމަށް ރައީސް ވިދާޅުވި އެވެ.

މޫސުމަށް އަންނަ ބަދަލުތަކުން އަރައިގަތުމަށް ބޭނުންވާ ފައިނޭންސިން ބޭނުންވާ ކަން ވެސް ރައީސް ފާހަގަކުރެއްވި އެވެ.

ދެ ދުވަހުގެ މުއްދަތަށް ކުރިއަށްދާ މި ސަމިޓްގެ މަގްސަދަކީ ބައިނަލްއަގްވާމީ ގޮތުން ވެފައިހުރި އެއްބަސްވުންތަކަށް ޢަމަލުކުރުން އަވަސްކުރުމާއި، އަދި "ޕެކްޓް ފޮރ ދަ ފިއުޗާ" މެދުވެރިކޮށް، އަލަށް ކުރިމަތިވަމުން އަންނަ ގޮންޖެހުންތަކުން އަރައިގަތުމަށް މަސައްކަތްކުރުމެވެ.