އައިސީއައިއޭގައި މެލޭޝިއާގެ ކުރީގެ އެޑިއުކޭޝަން މިނިސްޓަރު ތަގުރީރުކުރައްވަނީ

އިސްލާމީ ޔުނިވާސިޓީ އޮފް މޯލްޑިވްސް (އައިޔޫއެމް) އިން ބާއްވާ އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައިސީއައިއޭ) ގެ މި އަހަރުގެ ކޮންފަރެންސްގައި ތަފާތު ތިން ދާއިރާއަކުން، ދުނިޔޭގައި ފާހަގަކޮށްލެވޭ ތިން އިލްމުވެރިއަކު ކީނޯޓު ތަގުރީރު ދެއްވާ ގޮތަށް ހަމަޖައްސަވައިފި އެވެ.

މި އަހަރުގެ ކޮންފަރެންސް އޮންނާނީ މާދަމާ އިން ފެށިގެން އަންނަ އާދީއްތަ ދުވަހުގެ ނިޔަލަށް އިސްލާމިކް ޔުނިވާސިޓީގަ އެވެ.

މި ފަހަރު ކީނޯޓު ތަގުރީރު ދެއްވާ ބޭފުޅުންގެ ތެރެއިން އެންމެ ފާހަގަކޮށްލެވެނީ މެލޭޝިއާގެ ކުރީގެ އެޑިއުކޭޝަން މިނިސްޓަރު މާސްޒްލީ މަލިކް އެވެ. ދެން ހިމެނެނީ އެމެރިކާގެ ފިލިޕް ހެލިންޖާ އާއި ދެކުނު އެފްރިކާގެ ޓީޝަގޯނާ މެޓްރެޑްރޯ އެވެ.

މެލޭޝިއާގެ ގާނޫނު ހަދާ މަޖިލީހުގެ މެމްބަރުކަން ވެސް ކުރައްވާފައިވާ މަލިކް ތަގުރީރު ކުރައްވާނީ ތިމާވެށި ހިމާޔަތްކުރުމާއި ދެމެހެއްޓެނެވި ތަރައްގީއާ ގުޅޭ ގޮތުންނެވެ.

މަލިކަކީ ބަންގްލަދޭޝްގެ އިންޓަނޭޝަނަލް އިސްލާމިކް ޔުނިވަސިޓީގެ އާއްމު މަޖިލީހުގައި މެމްބަރުކަމާއި މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީގެ އެސޯސިއޭޓް ޕްރޮފެސަރުކަމާއި މެލޭޝިއާގެ ޔުނިވާސިޓީ އޮފް ސައިބާޖާޔާގެ ޕްރޮފެސަރުކަން ކުރައްވާފައިވާ ބޭފުޅެކެވެ. އޭނާ ވަނީ ދެކުނު ކޮރެއާގެ ހަންކުކް ޔުނިވާސިޓީ އޮފް ފޮރިން ސްޓަޑީޒްގައި ވެސް ކިޔަވައި ދެއްވައިފަ އެވެ.

އޭނާ މި ފަހަރުގެ ކޮންފަރެންސްގައި، އިސްލާމީ ނަޒަރަކުން ތިމާވެށީގެ ކަންކަން ބެލެހެއްޓުމާއި ދެމެހެއްޓެނިވި ތަރައްގީއާ ބެހޭ ގޮތުން ވާހަކަ ދައްކަވާނެ އެވެ. ޒަމާނީ ގޮންޖެހުންތަކަށް އިސްލާމީ އިލްމުން އޮތް ފަރުވާ އާއި މޫސުމަށް އަންނަ ބަދަލުތަކާ ބެހޭގޮތުން ވެސް އަލިއަޅުއްވާނެ އެވެ.

ޕްރޮފެސަރު ހެލިންޖާ ކީނޯޓު ތަގުރީރު ދެއްވާނީ ދެމެހެއްޓެނިވި އުސޫލުތަކުގެ މައްޗަށް މަތީ ތައުލީމު ދޭނެ ގޮތްތަކާ ބެހޭގޮތުންނެވެ. އޭނާއަކީ ތައިލެންޑުގެ މަހިޑޯލް ޔުނިވާސިޓީގައި މެނޭޖްމަންޓް ދާއިރާގެ ގްލޯބަލް ޓެލެންޓް ޕްރޮފެސަރެކެވެ. ތައުލީމީ ލީޑަޝިޕުގައި ދުނިޔޭގައި އެންމެ ގިނައިން ހަވާލާދީފައިވާ ދެ ސްކޮލަރުންގެ ތެރޭގައި ވެސް ހިމެނިވަޑައިގަންނަވާ ހެލިންޖާ ދެމެހެއްޓެނެވި ލީޑާޝިޕުގެ ރޮނގުން ޕީއެޗްޑީ ޕްރޮގްރާމެއް ވެސް ކުރިއަށް ގެންދަވަ އެވެ. އޭޝިއާ ޕެސިފިކް ގައި 30 އަހަރުގެ ތެރޭގައި 20،000 އަށް ވުރެ ގިނަ ސްކޫލް ލީޑަރުން ތައްޔާރު ކުރެއްވި އެވެ.

އޭނާ އޮންލައިންކޮށް ދެއްވާ ކީނޯޓުގައި ދެމެހެއްޓެނިވި ޔުނިވާސިޓީއެއްގެ ތަސައްވުރު އަދި ދެމެހެއްޓެނިވި ގޮތެއްގައި ކަންކަން ހާސިލް ކުރާނެ ގޮތުގެ މަރުހަލާތަކާއި އުސޫލުތަކާއި ކުރިމަތިވާ ގޮންޖެހުންތަކާއި އެކަންކަން ކާމިޔާބު ކުރާނެ އުކުޅުތައް ކިޔައި ދެއްވާނެ އެވެ.

މި ފަހަރުގެ ކޮންފަރެންސްގައި ދެން ކީނޯޓު ދެއްވާ މެޓްރެޑްރޯ އޭނާގެ ތަގުރީރުގައި އަލިއަޅުއްވާލާނީ ތައުލީމީ ދާއިރާގައި އާޓިފިޝަލް އިންޓެލިޖެންސް ބޭނުންކޮށްގެން ސިސްޓަމް ހެދުމާއި މެނޭޖްކުރުމާ ބެހޭގޮތުންނެވެ.

ކެންވާސް ޑޮޓް އެފްރިކާގެ މުއައްސިސް އަދި ކޮންސަލްޓެންޓް މެޓްރެޑްރޯ ވަނީ ޔުނިވާސިޓީ އޮފް ޒިމްބާބްވޭގައި އެކޮމޮޑޭޝަން އަދި އިމްތިހާނު ޝެޑިއުލް ކުރުމަށް އާޓިފިޝަލް އިންޓެލިޖެންސް ބޭނުންކުރައްވައިގެން ޔުނިވާސިޓީ މެނޭޖްމަންޓް ސިސްޓަމެއް ގާއިމްކުރައްވައިފަ އެވެ. އޭނާ އަކީ އާޓިފިޝަލް އިންޓެލިޖެންސް އިން ލާޖް ލެންގުއޭޖް މޮޑެލްސް ސްޓްރެޓެޖީސް، ކްލައުޑް އިންޖިނިއަރިން އަދި އާޓިފިޝަލް އިންޓެލިޖެންސް ޑްރިވެން އޮޓޮމޭޝަންގެ ތަޖުރިބާ ހުރި ބޭފުޅެކެވެ.

އިލްމު ހިއްސާކޮށް އުނގެނުމަށް ލޯބިކުރާ މުޖުތަމައެއް ބިނާކުރުމުގެ މަގުސަދުގައި އައިޔޫއެމް އިން 2016 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ އައިސީއައިއޭއަކީ ރާއްޖޭގައި ބާއްވާ އިލްމީ އެންމެ ބޮޑު އެއް ކޮންފަރެންސެވެ.