ރާއްޖެއިން މަސައްކަތް ކުރަނީ ޑިޖިޓަލް އިގްތިސާދެއް އުފައްދަން: ރައީސް

ރާއްޖެއިން ޑިޖިޓަލް އިގްތިސާދެއް އުފެއްދުމަށްޓަކައި މުހިއްމު މަސައްކަތްތަކެއް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. ގައި ކުރިއަށްދާ "ބިލްޑިންގް ޕްރޮޑަކްޓިވް ކެޕޭސިޓީސް އިން ސްމޯލް އައިލެންޑް ޑިވެލޮޕިން ސްޓޭޓްސް"ގެ ހަވާސާގައި ރައީސް ވިދާޅުވީ، ގްލޯބަލް ޕޭމެންޓް ގޭޓްވޭތަކަށް ވަދެވޭނެ ގޮތްތައް ހޯދަން ވަރަށް މުހިއްމު މަސައްކަތެއް ކުރަމުން އަންނަ ކަމަށެވެ. އީ ކޮމާސް ޕްލެޓްފޯމުތަކާ ގުޅޭ ގަވައިދުތައް ވެސް އެކުލަވާލުމުގެ މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.

"ކުޑަ އާމްދަނީއެއް ލިބޭ ގައުމެއްގެ ގޮތުގައި ދިވެހިރާއްޖެ އޮއްވައި، މެދުމިނުގެ އާމްދަނީ ލިބޭ ގައުމަކަށް ރާއްޖެ ބަދަލުވުމަށް އެންމެ ބޮޑު ބާރެއް ލިބުނީ ޓޫރިޒަމުން. އަދި މެދުމިނުގެ އާމްދަނީގެ މަރުހަލާ ހުރަސްކޮށް އިތުރަށް އިގްތިސާދު ފުޅާކުރަން މިވަގުތު ގިނަ ގޮންޖެހުންތަކެއް އެބަހުރި. އެކަމުން އަރައިގަނެ، އިގްތިސާދީ އިތުރު ކުރިއެރުން ހޯދަން އެހެން ދާއިރާތަކުން އިގްތިސާދު ފުޅާ ކުރަން ޖެހޭ،" ރައީސް ވިދާޅުވި އެވެ.

ގައުމުގެ ތިޔާގިކަން އިތުރުކުރުމުގައި މިހާރު ހުރި ގޮންޖެހުންތަކުގެ މައްޗަށް ވެސް އެމަނިކުފާނު އަލިއަޅުއްވާލެއްވި އެވެ.

ރައީސް ވިދާޅުވި ގޮތުގައި އިންވެސްޓްމަންޓްތައް ގައުމަށް އިތުރުކުރަން ދަތުރުފަތުރާއި ހަކަތަ އާއި ޑިޖިޓަލް ގުޅުންތަކަށް ބޭނުންވާ އަސާސީ ވަސީލަތްތައް ގާއިމުކުރަން ވާނީ މި ޒަމާނުގެ ތަރައްގީއާ ފައިހަމަވާނޭ ގޮތަށެވެ.

އެމަނިކުފާނު ވިދާޅުވީ، ހައި ސްޕީޑް އިންޓަނެޓާއި ޑިޖިޓަލް ދާއިރާއަށް އާ އުފެއްދުންތައް ނެރުމަށްޓަކައި މުހިއްމު މަސައްކަތްތަކެއް ކުރައްވާނެ ކަމަށެވެ. އެގޮތުން 5ޖީ އާއި އޭއައި އެންހޭންސްޑް ސިސްޓަމްތައް ތައާރަފް ކުރެވޭނެ ގޮތްތައް ފަހިކޮށްދެއްވާނެ ކަމަށް ރައީސް ވިދާޅުވި އެވެ.

ރައީސް ވަނީ ވިޔަފާރި އާއި ތަރައްގީއާ ބެހޭ ޖަމިއްޔާ 'އަންކްޓެޑުން' ވަޒަންކުރަމުން ގެންދާ 'ދަ ޕްރޮޑަކްޓިވް ކެޕޭސިޓީސް އިންޑެކްސް'ގެ ބޭނުންތެރިކަމާއި، އިލްމީ ނިންމުންތަކާއި ދިރާސާތަކުގެ އަލީގައި އިގްތިސާދީ އިސްލާހީ ބަދަލުތައް ގެނައުމުގެ މުހިއްމު ކަން ފާހަގަކުރައްވައިފަ އެވެ. ރާއްޖޭގެ އުފެއްދުންތެރިކަމުގެ ގާބިލްކަން އިތުރުކުރަން އަންކްޓެޑުން ބައިވެރިވުމަށް ވެސް ރައީސް ދައުވަތު ދެއްވި އެވެ.