ރައީސް އދ. ގައި: އެދިވަޑައިގަތީ މާލީ ނިޒާމުގެ ތެރެއިން އަދަބު ނުދީ، ލުއިގޮތްތައް ހަމަޖައްސައިދޭން

ރާއްޖެއަކީ ވެސް ތަރައްގީގެ ބައިވެރިއެއް ކަމަށާއި ރާއްޖޭގެ ނާޒުކުކަން ހުރަހެއްގެ ގޮތުގައި ނުބަލައި މާލީ ނިޒާމުގެ ތެރެއިން ލުއިގޮތްތަކެއް ހޯދައިދޭން ރައީސް ޑރ. މުހައްމަދު މުއިއްޒު ބައިނަލްއަގްވާމީ ފަރާތްތަކުގެ ކިބައިން މިރޭ އެދިވަޑައިގެންފި އެވެ.

އެ މަނިކުފާނު އެކަމަށް އެދިވަޑައިގަތީ، އދ. ގެ އާންމު މަޖިލިހުގެ ސެޝަނެއްގައި ފުރަތަމަ ފަހަރަށް ވާހަކަފުޅު ދައްކަވަމުންނެވެ.

އދ. ގެ އާންމު މަޖިލިހުގެ 79 ވަނަ ސެޝަންގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖެ އަށް މިނިވަންކަން ލިބުނުތާ 75 އަހަރު 2040 ގައި ފާހަގަކުރާއިރު، އެ ހިސާބަށް ދާންވާއިރަށް، ރާއްޖެއަކީ ފުރިހަމަ އަށް ތަަރައްގީވެފައިވާ ގައުމަކަށް ހެދުމަކީ އެ މަނިކުފާނުގެ އަމާޒު ކަމަށެވެ.

ރައީސް މުއިއްޒު ވިދާޅުވީ މިއަދު އެ މަނިކުފާނު އދ. ގައި ހުންނެވީ ގައުމު ގެންދަން ބޭނުންވާ މަންޒިލުގެ ތަސައްވުރަކާ އެކުގައި ކަމަށާއި އެއީ 2040 ވަނަ އަހަރާ ހަމައަށް އާދެވޭއިރު، ރާއްޖެ ފުރިހަމަ އަށް ތަރައްގީވެފައިވާ ގައުމަކަށް ހެދުން ކަމަށެވެ.

"ތަރައްގީވެފައިވާ ގައުމަކަށް ވުމަކީ ވަރަށް ބޮޑު މަސައްކަތެއް އަދި ވަރަށް ދުރު އުންމީދެއް ކަމަށް ހީވެދާނެ. އެހެން ނަމަވެސް އަޅުގަނޑަށް ޔަގީންކަމާ އެކު ދަންނަވަން ކެރޭނީ މަގުސަދެއް ކަނޑައަޅައި، ޕްލޭނެއް އޮވެއްޖެ ނަމަ އެކަން ހާސިލުކުރެވޭނެ،" ރައީސް ވިދާޅުވި އެވެ.

"ބޮޑެތި ގޮންޖެހުންތަކާ ކުރިމަތިލައި، އަދި އޭގެ ތެރެއިން ކުރިއަރައި ދިއުމަކީ ދިވެހިންނަށް އާ ކަމެއް ނޫން."

ރައީސް ވިދާޅުވީ، ރާއްޖެ އަށް 1965 ގައި މިނިވަންކަން އަލުން ލިބުނުއިރު، ރާއްޖެއަކީ ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ގައުމެއް ކަމަށާއި އާބާދީގެ ތިންބައިކުޅަ އެއްބައި މީހުން ލިޔަންކިޔަން ނުދަންނަ ކަމަށެވެ. ދިވެހިންގެ އެއްވެސް ސިނާއަތެއް ނެތްއިރު، އެކްސްޕޯޓް ކުރެވޭ އެއްޗެއް ވެސް ހަމަ ނެތް ކަމަށް ވިދާޅުވި އެވެ.

ނަމަވެސް، ދިވެހިން ވަނީ ކުޑަދުވަސްކޮޅެއްގެ ތެރޭގައި އެކަން ބަދަލުކޮށްފައި ކަމަށް އެ މަނިކުފާނު ވިދާޅުވި އެވެ. ރައީސް ވިދާޅުވީ އެންމެ ފަންސާހަކަށް އަހަރުގެ ތެރޭ ވަނީ މަތީ މެދުފަންތީގެ އާމްދަނީ ލިބޭ ގައުމެއްގެ ދަރަޖަ އަށް އާދެވިފައި ކަމަށާއި އެއީ ވަރަށް ބޮޑަށް ފަހުރުވެރިވެވަޑައިގަންނަވާ ކަމެއް ކަމަށެވެ.

"އަޅުގަނޑު ގަބޫލުކުރާ ގޮތުގައި ދިވެހިރާއްޖެ އަށް ތަރައްގީވެފައިވާ ގައުމަކާ ހަމައަށް އާދެވޭނެ. ގައުމުގެ އުފެއްދުންތެރިކަމުގެ ގާބިލްކަން އިތުރުކޮށް އަދި އުފެއްދުންތެރިކަން އިތުރު ކުރެވޭނެ. އަޅުގަނޑުމެންގެ އިގުތިސާދު ޑިޖިޓަލައިޒްކޮށް އަދި އާޓިފިޝަލް އިންޓެލިޖެންސް އިން ކުރިއަށް ގެންދާ އިގްތިސާދަކަށް ބަދަލުކުރެވޭނެ،" އދ. ގެ އާންމު މަޖިލިހުގައި އެ މަނިކުފާނު އިއްވެވި ފުރަތަމަ ތަގުރީރުގައި ވިދާޅުވި އެވެ.

"އަދި އެންމެ މުހިންމު ކަމަކީ، ގައުމުގެ ގުދުރަތީ ރީތިކަމާއި ކަނޑުގެ ވަސީލަތްތައް ބޭނުންކޮށްގެން އިގުތިސާދު ފުޅާ ކުރުން."

ރައީސް ވިދާޅުވީ:

- އުފެއްދުންތެރިކަން އިތުރުކުރުމަކީ އިގުތިސާދީ ތަރައްގީ އަށް މަގުފަހިކުރުމުގެ މުހިންމު ތަޅުދަނޑި ކަމަށާއި ޑިޖިޓަލް އިކޮނޮމީ ފަދަ މުހިންމު ދާއިރާތަކަށް އިންވެސްޓްމަންޓް ގެނައުމަށް އެހީތެރިވާ ސިޔާސަތުތައް ދެނެގަނެ ތަންފީޒުކުރާނެ ކަމަށް.

- އާޓިފިޝަލް އިންޓެލިޖެންސް ބޭނުންކޮށްގެން ޢާންމު ހިދުމަތްތައް ފޯރުކޮށްދިނުމާއި އާ އުފެއްދުންތައް އުފެއްދުމާއި އަދި ދުނިޔޭގެ ޑިޖިޓަލް އިގްތިސާދުގައި ކާމިޔާބުކަމާ އެކު ވާދަކުރެވޭނެ ޖީލެއް ބިނާ ކުރުން މުހިން ކަމަށް.

- ގާނޫނީ އޮނިގަނޑުތައް ހަރުދަނާކުރުމާއި މުއައްސަސާތައް ވަރުގަދަކުރުމަކީ ވެސް އިގްތިސާދު ފުޅާ ކުރަން މުހިންމު ކަންކަން ކަމަށް.

ރައީސް ވިދާޅުވީ ތަރައްގީވެފައިވާ ގައުމަކަށް ވުމަށްޓަކައި އާ ސިނާއަތްތައް ކުރިއެރުވުމަކީ މުހިންމު ކަމެއް ކަމަށާއި ރާއްޖޭގައި ވަރުގަދަ ފައިނޭންޝަލް ސެކްޓާއެއް ބިނާކުރުމަށް މަސައްކަތް ކުރަމުން އަންނަނީ އެހެންވެ ކަމަށެވެ. އެ މަސައްކަތުގައި މި އަހަރުގެ މެއި މަހު ޑިވެލޮޕްމަންޓް ބޭންކް ގާއިމުކޮށްފައިވާ ކަން ފާހަގަކުރެއްވި އެވެ. މި ބޭންކުގެ އަމާޒަކީ އިގްތިސާދީ ތަފާތު ދާއިރާތައް ތަރައްގީކުރުމާއި އެކަމަށް އިންވެސްޓްކުރުން ކަމަށް ވިދާޅުވި އެވެ.

"އަޅުގަނޑުމެން ބޭނުންވާ ނަތީޖާއަކީ އެންމެންނަށް ފައިދާވާ ގޮތަށް ތަރައްގީ ގެނައުން. އެއީ ހަމަހަމަކަން ކަށަވަރު ކުރެވިފައިވާ ތަރައްގީއެެއް އަދި އަންހެނުންނާއި ޒުވާނުންނަކީ އަޅުގަނޑުމެންގެ ތަރައްގީގެ މައިގަނޑު ބައިވެރިން ގޮތުގައި ދެކެން. އަދި ބޭނުން ވަނީ ކޮންމެ ދިވެހި ރައްޔިތަކަށް ވެސް އެކަށީގެންވާ ބޯހިޔާވަހިކަން ލިބިފައިވާ ތަރައްގީއެއް،" ރައީސް ވިދާޅުވި އެވެ.

އދ.ގެ އާންމު މަޖިލީހުގައި ވާހަކަފުޅު ދައްކަވަމުން ރައީސް ވިދާޅުވީ ދިވެހިރާއްޖޭގެ މިސްރާބު ހުރީ އިންގިލާބީ އިގްތިސާދީ ކުރިއެރުމާ ދިމާއަށް ކަމަށާއި ނަމަވެސް ރާއްޖޭގެ ސިޔާސަތުތަކުން ނަތީޖާ ހާސިލުކުރެވޭނީ އެކަށީގެންވާ ގޮތަށް ބައިނަލްއަގްވާމީ މާލީ އެހީތެރިކަމާ އެކުގައި ކަމަށެވެ.

"އަޅުގަނޑުމެންގެ ތަރައްގީއަށް ފުޅާ ދާއިރާއެއްގައި އެހީތެރިކަން ލިބިފައިވީ ނަމަވެސް، ތަރައްގީއަށް އެހީދޭ ފަންޑުތަކާއި ބޭންކުތަކާއި އަދި ގައުމުތަކަށް އަޅުގަނޑުމެން ގޮވާލަނީ އަޅުގަނޑުމެންނަކީ ހަމައެކަނި އެހީ ލިބޭ ފަރާތް ގޮތުގައި ނުދެކެން. އަޅުގަނޑުމެންނަކީ ތަރައްގީގެ ބައިވެރިން. އަޅުގަނޑުމެންގެ އަމިއްލަ ނާޒުކުކަން ހުރަހެއްގެ ގޮތުގައި ނުބެލުމަށް. ދެފަރާތަށް ވެސް ފައިދާ ހުރި އުސޫލުތަކެއް ގެންގުޅުމަށް. ދަރަނި ނެގުމުގެ އަގު ކުޑަކޮށްދޭން،" ރައީސް ވިދާޅުވި އެވެ.

"އަޅުގަނޑުމެންނަށް އަދަބު ދިނުމުގެ ބަދަލުގައި މާލީ ނިޒާމުން އަޅުގަނޑުމެންނަށް ފައިދާވާނެ ގޮތް ހަދަން. ތިޔަ ފަރާތްތަކުގެ ޝަރުތުތައް ލުއިކޮށްދޭން."

ރައީސް ވިދާޅުވީ މޫސުމަށް އަންނަ ބަދަލަކީ ދުނިޔެއަށް ކުރިމަތިވެފައިވާ އެންމެ ނުރައްކާތެރި ބިރުވެރިކަން ކަމަށާއި މި ޖީލުގެ އެންމެ މުހިންމު ގޮންޖެހުން ކަމަށެވެ. އެއީ އެތައް އަހަރެއްގެ ކުރިއެރުން މަދު މިނެޓުކޮޅެއްގެ ތެރޭގައި ފޮހެލައި، ގައުމުތަކަށް މޫސުމަށް އަންނަ ބަދަލުތަކާ އެއްގޮތަށް ހޭނުމަށް ގިނަ ހުރަސްތަކެއް ހުރި ކަމެއް ކަމަށް ވިދާޅުވި އެވެ.

ނަމަވެސް މިކަމުގައި ރާއްޖޭން ނަމޫނާ ދައްކަމުންދާ ކަމަށް ރައީސް ވިދާޅުވި އެވެ.

"ރާއްޖެއަކީ އަބަދުވެސް ބުނާ އެއްޗަކަށް އަމަލު ކުރަމުން އަންނަ ބައެއް. އަޅުގަނޑުމެން މިދަނީ އިއާދަކުރަނިވި ހަކަތައަށް އިންވެސްޓް ކުރަމުން. އަޅުގަނޑުމެންގެ ލަނޑުދަނޑިއަކީ 2028 ވަނަ އަހަރާ ހަމައަށް ގައުމުގެ ކަރަންޓުގެ ބޭނުންތެރިކަމުގެ 33 ޕަސެންޓް އިއާދަކުރަނިވި ހަކަތައިގެ ވަސީލަތްތަކަށް ބަދަލު ކުރުން،" ރައީސް މުއިއްޒު ވިދާޅުވި އެވެ.