ޑޮލަރު މާރުކުރާ ގަވާއިދު ބަދަލެއް ނުކުރާނެ، ރައީސް ދެއްކެވީ އޭގެ ފައިދާތައް

ޓޫރިޒަމް ދާއިރާއިން ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްކޮށް ހަދާފައިވާ ގަވާއިދު ބަދަލު ނުކުރައްވާނެ ކަމަށާއި ބޭންކުތަކަށް ޑޮލަރު މާރުކުރުމުން ރާއްޖޭގެ އިގުތިސާދަށް ބޮޑުފައިދާއެއް ވަންނަ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި މިހާރު ކުރިއަށް ގެންދާ ރަސްމިއްޔާތުގައި ރައީސް ވަނީ ޑޮލަރު މާރުކުރުމުގެ ގަވައިދު ބަދަލުކުރެވެން ނެތް ކަމަށް ތަކުރާރުކޮށް ވިދާޅުވެފަ އެވެ.

"ގަވައިދު ބަދަލުކުރާކަށް ނެތިން. ގަވައިދު ބަދަލެއް ނުކުރާނަން، ވަރަށް ސާފުކޮށް މި ދެންނެވީ،" ސޯޝަލް ސެންޓަރުގައި ކުރިއަށް ގެންދާ ހަފުލާގައި އެ މަނިކުފާނު ވިދާޅުވި އެވެ.

ރައީސް ވިދާޅުވީ މިދިޔަ އަހަރު އެކަނި ވެސް ޓޫރިޒަމް ސެކްޓާ އަށް 4.5 ބިލިއަން ޑޮލަރުގެ ޖުމްލަ އާމްދަނީއެއް ލިބުނު ކަމަށެވެ. އެކަމަކު އޭގެ ތެރެއިން ބޭންކުތަކަށް މާރުކުރީ 1.5 ޕަސެންޓެވެ. އަލަށް ކަނޑައަޅާފައިވާ ގަވައިދަށް ޑޮލަރު މާރުކުރާ ނަމަ އެ މަނިކުފާނު ވިދާޅުވި ގޮތުގައި އެއީ 15-20 ޕަސެންޓުގެ އިތުރު ވުމެކެވެ.

އެމްއެމްއޭ އިން މިހާރު ކަނޑައަޅާފައިވާ ގޮތަށް ރާއްޖޭގެ ބޭންކުތަކަށް ރިސޯޓުތަކުން ޑޮލަރު މާރުކުރާ ނަމަ ބޮޑު ފައިދާއެއް ވާނެ ކަމަށް ރައީސް ވިދާޅުވި އެވެ. އެއީ:

1- ސަރުކާރު ހިއްސާވާ ކުންފުނިތަކުން ބްލެކް މާކެޓްގެ ބަދަލުގައި ރަސްމީ ރޭޓްގައި ޑޮލަރު ގަންނަން ފެށުން. އެންމެ ލަސްވެގެން އަންނަ އަހަރުގެ ޖުލައި މަހު އެކަން ފަށައިގަނެވޭނެ ކަމަށާއި އޭގެ ސަބަބުން ބޮޑު ކުރިއެރުމެއް ލިބޭނެ ކަމަށް ރައީސް ވިދާޅުވި.

2- ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ފަސިންޖަރަކަށް މިހާރު ވިއްކާ 500 ޑޮލަރުގެ ބަދަލުގައި 1،000 ޑޮލަރު ވިއްކަން ފެށޭނެ. އެ އުސޫލުން ޑޮލަރު ވިއްކަން ފެށޭނީ ރައީސް މުއިއްޒު ވިދާޅުވި ގޮތުގައި 2026 ވަނަ އަހަރުގެ ފުރަތަމަ ކުއާޓަރުގެ ތެރޭގައި.

3- ކްރެޑިޓް ކާޑުގެ ލިމިޓް 700 ޑޮލަރުން 1،400 ޑޮލަރާ ހަމައަށް މަތިވާނެ.

4- ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރު ކުރާނެ. އަންނަ އަހަރުގެ ޖުލައި މަހުން ފެށިގެން އެ އަށް އަމަލު ކުރަން ފަށާނެ ކަމަށް ރައީސް ވިދާޅުވި.

"ވިޔަފާރިތަކަށް ވަރަށް ބޮޑު ކުރިއެރުމެއް ލިބިގެންދާނެ. ވީމާ އަޅުގަނޑު ދަންނަވާނީ އަޅުގަނޑުމެން ތިބޭނީ ރައްޔިތުންގެ ފަޅީގައޭ. އަޅުގަނޑު ނެތިން މި ގަވާއިދު ބަދަލުކުރާކަށެއް. ނުކުރާނަން ބަދަލެއް. ވަރަށް ސާފުކޮށް މި ދަންނަވަނީ ގަވާއިދު ބަދަލެއް ނުކުރާނަމޭ،" ވަރަށް ޔަގީންކަމާ އެކު ރައީސް ވިދާޅުވި އެވެ.

"ފައްސަތޭކަ ޑޮލަރު މާރު ކުރައްވަން ޖެހިވަޑައިގަންނަވާނެ. ގަވާއިދަށް ތަބާވުމަކީ އެންމެންގެ މައްޗަށް ލާޒިމް ކަމެކޭ، މިކަން ކުރައްވަން ޖެހިވަޑައިގަންނަވާނީ. މިއީ ގާނޫނުއަސާސީއާ އެއްގޮތަށް ކުރާ ކަމެއް. ގާނޫނުތަކާ އެއްގޮތަށް ކުރާ ކަމެއް."

ރައީސް ވިދާޅުވީ، ރާއްޖޭގެ ބޭންކުތަކަށް ޑޮލަރު މާރުކުރުން އެމްއެމްއޭ އަށް އިތުރަށް ފަސޭހަ ކޮށްދިނުމަށްޓަކައި ހާއްސަ ގާނޫނެއް ވެސް ހައްދަވާނެ ކަމަށެވެ.

"މި ސަރުކާރު އޮންނާނީ ސަތޭކަ ޕަސެންޓު ރައްޔިތުންނާ އެކީގައި. ސުވާލެއް ވެސް އެއަކު ނޯންނާނެ،" ރައީސް މުއިއްޒު ވިދާޅުވި އެވެ.

ރައީސް ވިދާޅުވީ، އަންނަ އަހަރުގެ ޖެނުއަރީން ފެށިގެން ރިސޯޓްތަކާއި ގެސްޓް ހައުސްތަކުން ރާއްޖޭގެ ބޭންކުތައް މެދުވެރިކޮށް ޑޮލަރު މާރުކުރުން ކުރިއަށް ދާ ނަމަ ވާނެ ފައިދާތައް ކަނޑައެޅީ ފަންނީ ގޮތެއްގައި ދިރާސާތައް ކުރުމަށް ފަހު ކަމަށެވެ.

ރައީސްގެ މިރޭގެ ވާހަކަފުޅުގައި ރާއްޖޭގެ ޓޫރިޒަމްގެ ބާނީންގެ މަސައްކަތްތައް ފާހަގަކުރައްވައި ޝުކުރު އަދާކުރެއްވި އެވެ. އެކަމަކު އެދިވަޑައިގަތީ އެ ބޭފުޅުންގެ ނާޖާއިޒު ފައިދާ ސިޔާސީ ގޮތުން ފަހިކޮށް ނުދެއްވުމަށެވެ.

"ތިޔަ ބޭފުޅުންގެ ނާޖާއިޒު ފައިދާ، ސިޔާސީ ގޮތުން ގައުމަށް ލޯބިނުކުރާ ދިވެހިންގެ ފަޅީގައި ނެތް ސިޔާސީ މީހުންނަށް ތިބޭފުޅުންގެ ފައިދާ ނާޖައިޒު ގޮތުގައި ނެގިޔަ ނުދެއްވާށޭ. އަޅުގަނޑުމެން މިތިބީ, ރައްޔިތުންގެ ފަޅީގައި ރައްޔިތުންނާއެކީގައި ތިޔަ ހިދުމަތްތެރި އިސްރަށްވެހިން އަޅުގަނޑުމެންނާއެކު ވަޑައިގަތުމަކީ ގައުމަށް އެންމެ ފައިދާހުރި ގޮތް،" ރައީސް ވިދާޅުވި އެވެ.

މަރުކަޒީ ބޭންކުން މިދިޔަ މަހު އާންމުކުރި ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކުތައް މެދުވެރިކޮށް މާރުކުރަން ޖެހޭނެ އެވެ. ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. ކެޓަގަރީ "ބީ" ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

ނަމަވެސް އެ ގަވާއިދަށް އަމަލު ކުރަން ދަތި ވާހަކަ ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ) އާއި ޗަމްޕާ ބްރަދާސްގެ ޗެއާމަން މުހައްމަދު މޫސާ (އުއްޗު) ވަނީ އެމްއެމްއޭ އަށް އަންގަވައިފަ އެވެ.