މާލެ ނޫން ރަށެއްގައި އައިޑީކާޑު ޕްރިންޓް ކުރެވޭ ގޮތަށް ފުރަތަމަ ފަހަރަށް ހަދައިފި

ދިވެހި ރައްޔިތެއްކަން އަންގައިދޭ އައިޑީކާޑު މާލެ ފިޔަވައި އެހެން ރަށެއްގައި ޕްރިންޓް ކުރެވޭ ގޮތް ފުރަތަމަ ފަހަރަށް ސަރުކާރުން ހަދައިދީފި އެވެ.

އެ ހިދުމަތް މިއަދު ފެށީ ގއ. ވިލިނގިލީގަ އެވެ. މިއީ އަތޮޅުތެރޭގެ ރަށެއްގައި އައިޑީކާޑު ޕްރިންޓް ކުރެވޭ ގޮތް ހެދި ފުރަތަމަ ފަހަރެވެ.

ވިލިނގިލީގައި އެ ހިދުމަތް ފެށުމުގެ ގޮތުން މިއަދު އެ ރަށުގައި ވަނީ ހާއްސަ ރަސްމިއްޔާތެއް ބާއްވައިފަ އެވެ. އެ ރަސްމިއްޔާތަށް ހޯމްލޭންޑް މިނިސްޓަރު އަލީ އިހުސާން ވެސް ވަޑައިގަތެވެ.

މި ހިދުމަތް ފެށުމާ އެކު، ވިލިނގިލީގައި އައިޑީކާޑު ޕްރިންޓުކޮށް، ހަވާލުކުރުމުގެ ހިދުމަތް ވެސް ދޭނެ އެވެ.

އައިޑީކާޑު ޕްރިންޓް ކުރުމުގެ މަސައްކަތް މީގެ ކުރިން ހަމައެކަނި ކުރީ ވެލާނާގެ ބިލްޑިންގްގައި ހުންނަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ އޮފީހުގަ އެވެ.

މީގެ ކުރިން ކައުންސިލްތައް މެދުވެރިކޮށް އައިޑީކާޑަށް އެދި ހުށަހެޅުމުގެ ހިދުމަތް ދިނެވެ. ނަމަވެސް 2022 ވަނަ އަހަރު ވަނީ ޑީއެންއާރުގެ ހާއްސަ ޕޯޓަލެއް މެދުވެރިކޮށް ކޮންމެ ތަނަކު ހުރެގެން ވެސް އައިޑީކާޑަށް އެދެވޭނެ ގޮތަށް ހަދައިފަ އެވެ. ކާޑު ޕްރިންޓުކުރުމަށް ފަހު، ކުރިއަރު މެދުވެރިކޮށް އެ މީހަކު ހުރި ރަށެއްގެ ކައުންސިލަށް ކާޑު ފޮނުވަ އެވެ.

އުމުރުން 65 އަހަރުން މަތީގެ މީހުންގެ އައިޑީކާޑުގެ މުއްދަތު ހަމަނުވާނެ ގޮތަށް ބަދަލުކުރުމުގެ މަސައްކަތް ކުރަމުން އަންނަ ކަމަށް ވެސް ޑީއެންއާރުން ވަނީ މި އަހަރުގެ ކުރީކޮޅު ބުނެފަ އެވެ.

އުމުރުން 10 އަހަރާއި 40 އަހަރާ ދެމެދުގެ މީހުންގެ ކާޑުގެ މުއްދަަތަކީ ފަސް އަހަރެވެ. އަދި 40 އަހަރުން މަތީގެ މީހުންގެ އައިޑީކާޑުގެ މުއްދަތަކީ 10 އަހަރެވެ.