އުރީދޫ އިން އައިފޯން 16 ގެ ޕްރީ އޯޑަރަށް މިރޭ ހުޅުވާލަނީ

އެފަލްއިން އެންމެ ފަހުން ނެރުނު އައިފޯން 16 ސީރީޒްގެ ފޯނުތައް އުރީދޫ މެދުވެރިކޮށް ގަންނަން ބޭނުންވާ ކަސްޓަމަރުންނަށް މިރޭ އެ ފުރުސަތު ހުޅުވާލާނެ ކަމަށް އުރީދޫ އިން ބުނެފި އެވެ.

އުރީދޫ އިން ބުނީ ޕްރީ އޯޑަރު ކުރުމުގެ ފުރުސަތު ހުޅުވާލާނީ މިރޭ 12 ޖަހާއިރު ކަމަށެވެ. އެ ކުންފުނިން އެކަމަށް ހާއްސަކޮށް އުރީދޫގެ ވެބްސައިޓުގައި ކައުންޓްޑައުނެއް ވެސް ފަށައިފަ އެވެ. އަދި ޕްރީ އޯޑަރު ނަގަން ފެށުމުން އެ ކުންފުނިން އައިފޯނަށް ހާއްސަކޮށް ހުރި އޮފާތަކުގެ ތަފްސީލު ހިއްސާކުރާނެ ކަމަށް އުރީދޫން ބުންޏެވެ.

މި މަހުގެ 9 ވަނަ ދުވަހު ލޯންޗުކުރި އާ އައިފޯން 16 އަކީ އާ އޭ18 ޗިޕް ހިމެނޭ ފޯނެކެވެ. މި ފަހަރު އެންމެ ބޮޑު އެއް އަޕްގްރޭޑްގެ ގޮތުގައި އެޕަލްއިން ފާހަގަ ކުރަނީ ކެމެރާ ކޮންޓްރޯލްގެ އާ ފީޗާއެއްގެ ގޮތުގައި ތައާރަފްކޮށްފައިވާ އެކްޝަން ބަޓަނެވެ. އަދި މި މޮޑެލްތަކަކީ ބެޓެރި ލައިފް ކުރީގެ މޮޑެލްތަކަށް ވުރެ ރަނގަޅު ފޯނުތަކެއްގެ ގޮތުގައި ވެސް އެޕަލްއިން ފާހަގަކުރެ އެވެ.

މި ފަހަރު އައިފޯން 16 އާއި އައިފޯން 16 ޕްލަސްގެ މޮޑެލްތައް ނެރެފައި ވަނީ ކަަޅާއި ހުދާއި ފިޔާތޮށި އަދި ޓީލް އަދި އަލްޓްރާމެރިން ކުލައިންނެވެ. އައިފޯން 16 ޕްރޯ އަދި ޕްރޯ މެކްސް ފޯނުތައް ނެރެފައި ވަނީ ކަޅާއި ޓައިޓޭނިއަމާއި ވައިޓް ޓައިޓޭނިއަމްގެ އިތުރުން ނެޗުރަލް ޓައިޓޭނިއަމް އަދި ޑެޒާޓް ޓައިޓޭނިއަމް ކުލައިންނެވެ.

އުރީދޫ އަކީ އަލަށް ނެރޭ އެކި ބްރޭންޑުތަކުގެ ފޯނުތައް ދިވެހިންނާ ހަމައަށް ގެނެސްދޭ ކުންފުންޏެކެވެ. އެ ކުންފުނިން މަސައްކަތް ކުރަމުން ދަނީ އެންމެ ފަހުގެ ޓެކްނޮލޮޖީތައް ދިވެހިންނާ ހަމައަށް ގެނެސް ދިނުމަށެވެ.