އާލިއާގެ ނަމަށް ކަޕޫރް އިތުރުކޮށްފި

ބޮލީވުޑްގެ ތަރި އާލިއާ ބަޓްގެ ނަމަށް ކަޕޫރް އިތުރުކޮށްފި އެވެ.

އާލިއާ މިކަން ހާމަކުރީ ނެޓްފްލިކްސް އިން މިހާރު ގެނެސްދިނުމަށް ތައްޔާރުވަމުން އަންނަ "ދަ ގްރޭޓް އިންޑިއަން ކަޕިލް ޝަރުމާ"ގެ ޝޯގެ ދެވަނަ ސީޒަންގެ އެޕިސޯޑެއްގަ އެވެ. އާ ސީޒަންގެ ޓީޒާއެއް މިހާރު ވަނީ އާންމުކޮށްފަ އެވެ.

އެ ޓީޒާއިން ފެންނަ ގޮތުގައި، އާލިއާ ބަޓް ކިޔާފައި އޭނާއާ މުހާތަބުކުރުމުން ވަނީ އޭނާގެ ނަމަކީ އާލިއާ ބަޓް ކަޕޫރް ކަމަށް ބުނެފަ އެވެ.

އާލިއާ އެހެން ބުނުމާ އެކު، ފޭނުންނަށް ވަނީ ހައިރާންކަމެއް ލިބިފަ އެވެ. އެއީ، ބޮލީވުޑްގެ ތަރި ރަންބީރް ކަޕޫރްއާ ކައިވެނިކުރި ފަހުން އޭނާގެ ނަމަށް ރަންބީރުގެ އާއިލީ ނަން އިތުރުކުރި ކަމަށް އާލިއާ އެއްވެސް އިިރަކު ބުނެފައި ނުވާތީ އެވެ. އަދި އެ ކައިވެންޏަށް ދެ އަހަރުވި އިރު، ސޯޝަލް މީޑިއާގައި ވެސް އެ ނަން އިތުރުކޮށްގެން އާލިއާ ބޭނުންނުކުރާތީ އެވެ.

އެ ދެމަފިރިންގެ ކުއްޖަކު ވެސް މިހާރު އޮވެ އެވެ.

"ދަ ގްރޭޓް އިންޑިއަން ކަޕިލް ޝަރުމާ"ގެ ޝޯގެ ދެވަނަ ސީޒަންގެ އެޕިސޯޑަކަށް އާލިއާ އަންނަނީ އޭނާގެ ކުރިއަށް އޮތް ފިލްމު "ޖިގްރާ"ގެ ޕްރޮމޯޝަނަށެވެ. އެ ފިލްމުގައި އާލިއާ އެކު ލީޑު ރޯލު ކުޅޭ ވެދަންގް ރައިނާ އާއި ކޯ-ޕްރޮޑިއުސަރު ކަރަން ޖޯހަރު ވެސް ކަޕިލް ޝޯއަށް މެހުމާނުންގެ ގޮތުގައި ދެ އެވެ.

އާލިއާ ޕްރޮޑިއުސްކުރާ ފުރަތަމަ ފިލްމު ވެސް ކަމަށްވާ "ޖިގްރާ" ޕްރިމާކުރަނީ އަންނަ މަހު 19 ގަ އެވެ.

ބޮލީވުޑްގެ ވަރަށް މަދު އަންހެން ތަރިއެއް ނޫނީ ކައިވެންޏަށް ފަހު ފިރިމީހާގެ އާއިލީ ނަން ނަމަށް އިތުރެއް ނުކުރެ އެވެ. ފިރިމީހާގެ އާއިލީ ނަން ބޭނުންކުރާ މަޝްހޫރު ތަރިންގެ ތެރޭގައި ޕްރިޔަންކާ ޗޯޕްރާ ޖޯނަސް އާއި ކަރީނާ ކަޕޫރް ހާން އަދި އައިޝްވާރިޔާ ރާއީ ބައްޗަން ހިމެނެ އެވެ.