ދަރިކަނބަލުންނަށް ބޮޑުވަޒީރުކަން ލިބުނުތާ އެއް ދުވަސް ފަހުން ތަކްސިންއަށް ރަސްގެފާނުގެ މާފު

ހިޔާނާތްތެރިވުމާއި މަގާމުގެ ނުފޫޒު ނަހަމަ ގޮތުގައި ބޭނުންކުރުމުގެ ކުށުގައި އަށް އަހަރުގެ ޖަލު ހުކުމެއް އިއްވާފައިވާ ތައިލެންޑުގެ ކުރީގެ ބޮޑުވަޒީރު ތަކްސިން ޝިނަވަޓްރާއަށް އެ ގައުމުގެ ރަސްގެފާނު މަހާ ވަޖިރަލޮންގްކޯން އިއްޔެ މާފު ދެއްވައިފި އެވެ.

ބިލިއަނަރެއް ކަމަށްވާ ތަކްސިން އަށް ރަސްގެފާނުގެ އުފަން ދުވަހުގެ ހާއްސަ މާފު ދެއްވީ ތަކްސިންގެ ދަރިކަނބަލުން ޕައޭޓޮންޓާން ބޮޑުވަޒީރު ކަމަށް އިންތިހާބުކުރިތާ އެއް ދުވަސް ފަހުންނެވެ.

އުމުރުން 75 އަހަރުގެ ތަކްސިން އަށް އަހަރަށް ޖަލަށް ލާން މީގެ އަހަރެއްހާ ދުވަސް ކުރިން ހުކުމްކުރީ، އަމިއްލަފުޅަށް އަރުވާލެވިގެން ގައުމުން ބޭރުގައި އުޅުއްވާތާ 15 އަހަރު ފަހުން އެނބުރި ވަޑައިގަތުމާ އެކު، އޭނާގެ ވެރިކަމުގެ ދުވަސްވަރާ ގުޅޭ ދައުވާތަކެއްގައި މީގެ އަހަރެއްހާ ދުވަސް ކުރިންނެވެ. އެކަމަކު ރަސްގެފާނަށް ލިބިވަޑައިގަންނަވާ ބާރުގެ ދަށުން ޖަލު ހުކުމް އެއް އަހަރަށް ކުރުކޮށްދެއްވައި އަދި ތަކްސިންގެ އުމުރާއި ބަލި ހާލަތަށް ރިއާޔަތްކޮށް ކަފާލާތުގެ ދަށުން ހުރީ މިނިވަންކޮށްފަ އެވެ.

ތަކްސިންއަށް މާފު ދެއްވި އިރު މި މަހުގެ 31 އަށް ހުކުމުގެ މުއްދަތު ވެސް ހަމަވާނެ އެވެ.