ޕޮލިސް ކޮލެޖުގެ 28 ދަރިވަރަކު ހާލު ގޯސްވެގެން ހޮސްޕިޓަލުގައި ފަރުވާދެނީ

އައްޑޫގައި ހުންނަ ޕޮލިސް ކޮލެޖުގެ ދަރިވަރުންތަކެއް ހާލު ގޯސްވެ، ހޮސްޕިޓަލުގައި ފަރުވާ ދޭން ފަށައިފި އެވެ.

ފުލުހުންގެ މީޑިއާ އޮފިޝަލް މިރޭ ވިދާޅުވީ، ޕޮލިސް ކޮލެޖުގެ ގިނަ ދަރިވަރުންތަކެއް ބަލިވެގެން އައްޑޫ އިކުއެޓޯރިއަލް ހޮސްޕިޓަލުގައި އެޑްމިޓުކޮށް ފަރުވާ ދެމުން އަންނަ ކަމަށެވެ.

މިހާތަނަށް ބެލި ބެލުމުން ޝައްކު ކުރެވެނީ ކާނާ ވިހަވެގެން ކަމަށް އޮފިޝަލް ވިދާޅުވި އެވެ.

އެކަމާ ގުޅިގެން "މިހާރު" އިން ސުވާލުކުރުމުން ފުލުހުންގެ ތަރުޖަމާން އަދި އެސިސްޓެންޓް ކޮމިޝަނަރު އޮފް ޕޮލިސް އަހުމަދު ޝިފާން ވިދާޅުވީ، ބަލި ވެގެން 28 ދަރިވަރަކު ހޮސްޕިޓަލަށް ގެންގޮސްފައިވާ ކަމަށެވެ.

އޭގެ ތެރެއިން އެއް ކުއްޖެއްގެ ހާލަތު އެހެން ކުދިންނަށް ވުރެ ގޯސް ކަމަށް އޭނާ ވިދާޅުވި އެވެ.

މި ދަރިވަރުންނަކީ އަންނަ ހޮނިހިރު ދުވަހު ބޭސިކް ޓްރެއިނިން ފަށާ ބެޗުގެ ދަރިވަރުންތަކެކެވެ.

މި ކޭސްތަކާ ގުޅިގެން އައްޑޫ އީކުއިޓޯރިއަލް ހޮސްޕިޓަލުން ބުނީ އެ ދަރިވަރުންތަކަށް އެލާޖީ އެއް ވެގެން ފަރުވާ ދެމުން އަންނަ ކަމަށާއި ހުރިހާ ދަރިވަރުން ވެސް ސްޓޭބަލް ކަމަށެވެ. ނަމަވެސް، އެލާޖިކް ވީ ކޮން އެއްޗަކަށް ކަމެއް ނޭނގޭ ކަމަށް ހޮސްޕިޓަލުން ބުންޏެވެ.