އެއާ އެމްބިއުލާންސް: ސިއްހީ ދާއިރާއަށް ބަދަލެއް!

ސިއްހީ ކުއްލި ހާލަތެއް ދިމާވެ، އިތުރު ފަރުވާ ބޭނުންވާނަމަ މި ފަހަކާ ޖެހެންދެން ބަލި މީހުން އުފުލުމުގައި ބަރޯސާވީ ބޭރުގެ ބަޔަކަށެވެ. ނަމަވެސް، ބޭރުގެ ސިފައިން ތިބެގެން ޑޯނިއާ އަދި ހެލިކޮޕްޓަރުގައި ބަލި މީހުން އެއް ތަނުން އަނެއް ތަނަށް އުފުލަމުން ދިޔަ ދިއުމަށް ނިމުމަކަށް ގެނެސް މި ސަރުކާރުން ވަނީ އެއާ އެމްބިއުލާންސް ތައާރަފްކޮށްފަ އެވެ.

ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވި ގޮތުގައި މިދިޔަ މާޗު 1 ގައި ދިވެހިން އަމިއްލައަށް އެއާ އެމްބިއުލާންސް އޮޕަރޭޓްކުރަން ފެށުމަކީ ވަރަށް ބޮޑު ކާމިޔާބީއެކެވެ. އޭގެ ސަބަބުން އެތައް ބަޔަކަށް ފަސޭހަވެގެން ގޮސްފައިވާކަން އޭނާ ފާހަގަކުރެއްވި އެވެ.

އެ ހިދުމަތް ފުރަތަމަ ފެށީ ރަންވޭއަށް ޖައްސާ ފުރޮޅުލީ ބޯޓުގަ އެވެ. އެކަމަކު، އޭގެ ދެ ހަފުތާ ފަހުން ސީ ޕްލޭންގައި އެއާ އެމްބިއުލާންސްގެ ހިދުމަތް ފަށައި، އެކަން ފުޅާކޮށްފައިވެ އެވެ. ސަރުކާރުން މިހާރު މަސައްކަތް ކުރަމުން އަންނަނީ އެއާ އެމްބިއުލާންސްގެ ފްލީޓަށް އިތުރު އެއާކްރާފްޓެއް ގެންނާށެވެ.

މި އަހަރު ނިމުމުގެ ކުރިން ހެލިކޮޕްޓަރުގައި ހިދުމަތް ފަށަން މަސައްކަތްކުރަމުން އަންނަ ކަމަށް މިނިސްޓްރީން ބުންޏެވެ.

ހެލްތު މިނިސްޓްރީން ބުނީ އެއާ އެމްބިއުލާންސްގައި ބަލި މީހުން އުފުލުމުގައި މެޑިކަލް ވަސީލަތްތަކައެކު ޑޮކްޓަރަކާއި ނަރުހެއް އަދި އިމަޖެންސީ މެޑިކަލް ޓެކްނީޝަނެއް ހަރަކާތްތެރިވާނެ ކަމަށެވެ.

އެއާ އެމްބިއުލާންސް ފެށި ފުރަތަމަ މަހު ދެ އެއާކްރާފްޓުގައި ޖުމްލަ 58 ދަތުރުކޮށްފައިވެ އެވެ. މިދިޔަ އޭޕްރީލް މަހު 64 ދަތުރު އަދި މި މަހުގެ މިދިޔަ ހުކުރު ދުވަހާ ހަމައަށް ޖުމްލަ 31 ދަތުރުކޮށްފައިވެ އެވެ. އެހާ ހަމައަށް އެއާ އެމްބިއުލާންސްގައި 152 ދަތުރުކޮށް، 196 ބަލި މީހުން އުފުލާފައިވެ އެވެ.

ހެލްތު މިނިސްޓްރީގައި މިިދިޔަ ބުރާސްފަތި ދުވަހު ބޭއްވި ނިއުސް ކޮންފަރެންސްގައި މިނިސްޓަރު ވިދާޅުވީ ރަށްރަށުގައި އައުޓްރީޗް ޕްރޮގްރާމްތައް ހިންގުން ފުޅާކުރުމުން އެ ތަންތަނުގައި ގާއިމްކުރަންވީ އަދި ޑިމާންޑު އޮތީ ކޮން ހިދުމަތްތަކެއްކަން އެނގިގެންދާނެ ކަމަށެވެ. އެކަން، އެމްބިއުލާންސްގެ ހިދުމަތްތަކާ ގުޅިގެންދާނެ ކަމަށް އޭނާ ވިދާޅުވި އެވެ.

އެ ތަންތަނުގައި ހިދުމަތްތައް ފުޅާކުރުމުން ރިފަރަލް ނުހަދާ އެ ތަނެއްގައި ފަރުވާ ދެވޭނެ ކަމަށާއި އޭރުން ބަޖެޓަށް ލުއިވެ، ކޮންމެހެން ފަރުވާ ކުރަންޖެހޭ ކަންކަމަށް ހަރަދު ކުރެވިގެންދާނެ ކަން މިނިސްޓަރު ފާހަގަކުރެއްވި އެވެ.

ރާއްޖޭގައި އެއާ އެމްބިއުލާންސްގެ ހިދުމަތް ފެށީ މޯލްޑިވިއަންގެ ދެ ބޯޓުގަ އެވެ. އެއާޕޯޓު އޮތް ރަށްރަށަށް ޖައްސަނީ ފުރޮޅުލީ ބޯޓެވެ. ސީ ޕްލޭންގައި އެއާ އެމްބިއުލާންސްގެ ހިދުމަތް ފެށުމުގެ ބޭނުމަކީ ވެސް، މިނިސްޓަރު ވިދާޅުވި ގޮތުގައި، ވީހާ ވެސް ގިނަ ރަށްރަށަށް އެ ހިދުމަތް ފޯރުކޮށްދިނުމެވެ.