ރާއްޖެއިން އިސްލާމްވި ކޮރެއާގެ މި ފޯވާޑްގެ ދިރިއުޅުން މުޅިން ބަދަލުވެފައި

ދެކުނު ކޮރެއާގެ ސަންގް މޯ، ރާއްޖެގެ ކުރީގެ ކްލަބް، ވިޔަންސާ އަށް 2007 ގެ ސީޒަނުގައި ކުޅެން އައީ ވިއެޓްނާމާއި މެލޭޝިއާގެ ކްލަބްތަކުން ފުރުސަތެއް ހޯދަން އޭނާގެ އެޖެންޓް ކުރި މަސައްކަތް ނާކާމިޔާބު ވުމުންނެވެ. ރާއްޖެ އަށް ވުރެ ފެންވަރު ރަނގަޅު އެ ދެ ގައުމުން ކުރެ ކޮންމެވެސް އެއް ގައުމަކުން ފުރުސަތު ހޯދުން އެއީ އޭރު އޭނާގެ އުންމީދެވެ. ރާއްޖެ އަށް ވުރެ ފުޓްބޯޅައިގެ އިންވެސްޓްމެންޓް އެ ދެ ގައުމުގައި ފުޅާ ވާނެކަން އެނގޭތީ އެ ފުރުސަތަށް އޭނާ ހުރީ ވަރަށް ބޮޑަށް އެދިއެދި އެވެ. އެ ދެ ގައުމުން އޭނާގެ އެޖެންޓް ވާހަކަ ދެއްކި ކްލަބްތަކުން އޭނާ ސޮއި ކުރުވަން ބޭނުމެއް ނުވި އެވެ.

ރާއްޖޭގެ ހުށަހެޅުމަށް ދީލާލަން އޭނާ ނިންމީ ވިއެޓްނާމާއި މެލޭޝިއާއިން ފުރުސަތު ނުލިބުމުގެ މާޔޫސްކަމުގައި ހުރެ އެވެ. އެކަމަކު ރާއްޖޭގެ އެ ފުރުސަތުން އޭނާގެ ދިރިއުޅުމަށް، "އަލުން އުފަންވުން ފަދަ" ބަދަލެއް އަތުވެދާނެ ކަމަށް ހިތަށް ގެންނަން ވެސް ސަންގް މޯ އަކަށް އޭރަކު ނޭނގެ އެވެ. އޭނާގެ ދިރިއުޅުމަށް އެވަރުގެ ބޮޑު ބަދަލެއް އަތުވެދާނެ ކަމަކަށް އޭނާ ހީ ވެސް ނުކުރެ އެވެ.

ކެތޮލިކް ކްރިސްޓިއަނެއްގެ ގޮތުގައި ހުރި އޭރު އުމުރުން 21 އަހަރުގެ ޒުވާން ކުޅުންތެރިޔާ އަށް އިސްލާމްކަމުގެ މަތިވެރި ނިއުމަތް ދެއްވަން މާތް ރަސްކަލާންގެ މެދުވެރި ކުރެއްވީ މި ރާއްޖެ އެވެ.

މިހާރު އުމުރުން 38 އަހަރުގެ ސަންގް ގަބޫލުކުރާ ގޮތުގައި އޭނާ ކުޅެން ބޭނުން ވި ކްލަބްތަކަށް ނުދެވި ރާއްޖެއާ ހަމައަށް އޭނާ ގެނައީ އިސްލާމްކަމުގެ މަތިވެރި ނިއުމަތް އޭނާ އަށް ދެއްވަން ތަގުދީރު ކުރައްވާފައި ވާތީ އެވެ.

"ގިނަ ކްލަބްތަކެއްގެ ޓްރެއަލްގައި އަހަރެން ބައިވެރިވިން. ދެކުނު ކޮރެއާގެ ޗިއޯންބުކް ހައިޔުންޑާއި [ކްލަބް] އާ ވާހަކަތައް ކުރިއަށް ގެންދެވުނު. އެކަމަކު ކޮންޓްރެކްޓެއް ނުލިބުނު. މެލޭޝިއާ އާއި ވިއެޓްނާމްގެ ކްލަބްތަކުގައި ޓްރެއަލް ހޭދަ ކުރިން. އެކަމަކު އެއިން ކްލަބަކުން ވެސް އަހަރެން ސޮއި ކުރުވާކަށް ބޭނުމެއް ނުވި،" އާޖެންޓީނާގައި ދިރިއުޅޭ ސަންގް ބުންޏެވެ.

"ދެން އަހަރެންގެ އެޖެންޓް ބުނި ރާއްޖެ އަށް ދާށޭ. ފުރުސަތު ލިބިފައޭ އޮތީ. އެހާހިސާބުން ރާއްޖެ ދާން ނިންމީ."

އެ ސީޒަނުގައި ވިޔަންސާ އަށް ކުޅެން ސަންގް ރާއްޖެ އައި އިރު އޭނާ ބަލާ އެއާޕޯޓަށް ގޮސް ހުރީ އޭރުގެ އެ ޓީމުގެ ކޯޗު ފަހުން އޮލިމްޕިކް ކޮމިޓީގެ ސެކްރެޓަރީ ޖެނަރަލްގެ މަގާމު އަދާ ކުރި އަހްމަދު މަރުޒޫގެވެ.

"މަރޭ އަހަރެން ރިސީވް ކުރީ... ދެން އަހަންނަށް ވިޔަންސާގެ ކޮންޓްރެކްޓް ދިނީ، ކްލަބްގެ ރައީސް ވިޝާމް އާއި އެސިސްޓެންޓް ކޯޗު ނިޝާމް އަދި އަހަރެންގެ އާއިލާއެއް ފަދަ ވިލިމާލޭގެ ކޮމިޔުނިޓީ އަށް ޝުކުރު،" ސަންގް ބުންޏެވެ.

އޭނާ ބުނިގޮތުގައި ވިޔަންސާ އަށް ސޮއި ކުރުމަށް ފަހު އެންމެ ބޮޑު އިސްކަމެއް ދިނީ އެ ކްލަބަށް ކާމިޔާބު ހޯދައި ދިނުމުގައި އޭނާ އަށް ވީ އެންމެ ބޮޑަކަށް މަސައްކަތް ކުރުމަށެވެ.

"ޕްރެކްޓިހުގައި ވެސް ބުރަކޮށް މަސައްކަތް ކުރަން އަހަރެން އިސްކަން ދިނިން. ފަސޭހަކޮށްނުލައި ހީވާގިވެގެން މަސައްކަތް ކުރީ،" ސަންގް ކިޔައިދިނެވެ.

"ރާއްޖޭގައި އެ ހޭދަ ކުރި މުއްދަތުގައި ލިބުނު އެންމެ އަގު ހުރި ހަދިޔާއަކީ އިސްލާމްކަން."

ކިޔެވީ ކޮތޮލިކް ސްކޫލުން، ދިޔައީ އިވެންޖެލިކަލް ޗާޗަށް

ސަންގް އާއި އޭނާގެ އާއިލާ އާޖެންޓީނާ އަށް ބަދަލުވީ އޭނާގެ އުމުރުން އަށް މަހުގަ އެވެ.

"އަނެއްހެން ބުނަންޏާ އަހަރެން އާޖެންޓީނާ އަށް ބަދަލުވީ މަންމަގެ އަތް މަތީގައި،" އޭނާ ބުންޏެވެ.

ދެކުނު އެމެރިކާއިން ކްރިސްޓިއަން ސްކޫލްތައް އެންމެ ގިނަ އެއް ގައުމަކީ އާޖެންޓީނާ އެވެ. އޭނާގެ މައިންބަފައިން އޭނާ ވެއްދީ ކެތޮލިކް ސްކޫލަކަށް ކަމަށް ސަންގް ބުންޏެވެ. އެ ދީނަށް ތަބާވާން އޭނާގެ ހޭނުވީ ސްކޫލް މަރުހަލާއިންނެވެ. އޭނާ އަޅުކަން ކުރަން ގެންދިޔައީ އިވެންޖަލިކަލް ޗާޗަށެވެ.

"އަހަރެން ބޮޑުވީ ކްރިސްޓިއަނެއްގެ ފަސްބައިގައި. އަހަރެން ކިޔަވަން ވެއްދީ ކެތޮލިކް ސްކޫލަކަށް. އަޅުކަން ކުރަން އަހަރެން ގެންދިޔައީ އިވެންޖެލިކަލް ފައްޅި އަށް،" އިސްލާމްވުމުގެ ކުރިން އޭނާގެ ދީނީ ފިކުރު ބިނާވެފައި ހުރި ގޮތް ކިޔައިދެމުން، ސަންގް ބުންޏެވެ.

ރާއްޖެ އައިސް އޭނާގެ ލޮލުގައި އަޅައިގަތީ މިސްކިތްތަކެވެ. ކައިރިކައިރީގައި މިސްކިތައް ހުރި އިރު ވެސް ހަމަ ކޮންމެ މިސްކިތްތަކަށް ދިވެހިން ކުރާ އިހްތިރާމް އޭނާ އަށް މާ ޝައުގުވެރި ކަމަކަށް ވި އެވެ. އޭނާ ބުނީ އެކަންކަމާ ބެހޭ ގޮތުން ޓީމުގެ އެކި ކުޅުންތެރިންނާ ވާހަކަ ދައްކަން ފެށި ކަމަށެވެ. މިސްކިތުގެ ވާހަކަ ދައްކަން ފެށުމުން އޭނާ އަށް މިސްކިތް ދައްކަން ޓީމުގެ ބައެއް އޮފިޝަލުންނާއި ބައެއް ކުޅުންތެރިން އޭނާ ގޮވައިގެން މިސްކިތަށް ވަދެ މިސްކިތްތައް ދައްކަ އެވެ. އިސްލާމް ދީނާ ބެހޭގޮތުން ގިނަ ވާހަކަތަކެއް ޓީމުގެ ބައެއް ކުޅުންތެރިންނާއި އޮފިޝަލުންނާ އޭރު ދައްކާ ކަމަށް ސަންގް ބުންޏެވެ.

"އަހަންނަށް ވިސްނިފައި އޮތީ އަހަރެން ގަބޫލުކޮށްގެން ހުރީ އީސާގެފާނުގެ ދީންކަން. މުސްލިމުން ގަބޫލު ކުރާ ފަދައިން އީސާގެފާނަކީ ރަސޫލެއްކަން ވެސް އަހަރެން ގަބޫލު ކުރަން. އެކަމުގައި އަހަރެންގެ އެއްވެސް މައްސަލައެއް ނެތް. އެކަމަކު އަހަންނަށް އޭރު ގަބޫލެއް ނުކުރެވޭ މުހައްމަދުގެފާނަކީ ރަސޫލެއް ކަމަކަށް. އެންމެ ފަހުގެ ރަސޫލާއާ މެދު އަހަރެންގެ ހިތުގައި ސުވާލު އުފެދިފައި އޮންނަނީ،" އިސްލާމް ދީނާ މެދު ޝައުގު އުފެދެން ފެށި ގޮތް ސަންގް ކިޔައިދިނެވެ.

"ދީނާ ބެހޭގޮތުން މައުލޫމާތު ދެވޭ ފެންވަރުގެ ވަރަށް ގިނަ މީހުންނާ އެކު އަހަރެން ވާހަކަ ދެއްކިން. ވާހަކަ ދެއްކީމަ އަހަންނަށް ކަންކަން ސާފު ވަނީ ވެސް ރަސޫލާއާ ބެހޭގޮތުން ސުވާލު އުފެދޭތީ އެ ވާހަކަ ވެސް ދައްކަން. ދެން ވަކި ހިސާބަކުން އަހަންނަށް ޔަގީން ކުރެވިއްޖެ އެއީ އެންމެ ފަހުގެ ރަސޫލާކަން. ގުރުއާނަކީ އެންމެ ފަހުގެ ވަހީ ބަސްފުޅުކަން ވެސް ގަބޫލު ކުރެވިއްޖެ."

އެންމެ ތުއްތު އިރުން ފެށިގެން އޭނާ އެ ދީނެއްގެ މައްޗަށް އޭނާގެ ވިސްނުން ބިނާ ކުރި ކެތޮލިކް އަގީދާ ދޫކޮށް މުސްލިކަށްވާން އޭނާ ނިންމި އެވެ.

އޭރު ރާއްޖޭގެ އިސްލާމީކަންތައްތަކާ ބެހޭ މަޖިލީހުގައި [މިހާރުގެ އިސްލާމިކް މިނިސްޓްރީ] ގެ ކަމާ ގުޅޭ ޑިޕާޓްމެންޓްގައި ހެކިންގެ ކުރިމަތީގައި އޭނާ އިސްލާމް ދީން ގަބޫލުކޮށް މުސްލިމަކަށް ވި އެވެ.

"އަހަރެން އިސްލާމް ވީ ހިތުގެ އަޑިން އެކަން ގަބޫލުކޮށްގެން،" އޭނާގެ އިހްސާސްތައް ސަންގް ބަންޑުންކޮށްލި އެވެ.

އިސްލާމްވުމަށް ފަހު އޭނާގެ ނަން، އަސްލަމް ސަންގްގެ ނަމަށް ބަދަލު ކުރި އެވެ.

"އަސްލަމް ސަންގް - ސަލާމާތްތެރިކަން އަމާންކަން އަދި ކާމިޔާބު،" އޭނާ ބުންޏެވެ.

މުސްލިމެއްކަން އާއިލާ އަށް އަންގަން އޭނާ އަށް އުނދަގޫވި

އެކާވީސް އަހަރުވަންދެން، އެހެން ދީނެއް ގަބޫލުކޮށްގެން ހުރުމަށް ފަހު މުސްލިމަކަށް ވީކަން، އޭނާގެ އާއިލާ އަށް ކިޔައިދޭން އުނދަގޫވި ކަމަށް ސަންގް ބުންޏެވެ.

"އަހަރެންގެ އަންހެނުން އެ މުއާމަލާތް އާއިލާ އާ ކުރީ. އަހަންނަށް އެކަން ކުރަން ވީ ވަރަށް އުނދަގޫ ކަމަކަށް،" އޭރުގެ ހަނދާންތައް ސަންގް އާ ކުރި އެބެ.

މިއީ މުސްލިމެއްގެ ގޮތުގައި އޭނާ ހޭދަ ކުރާ 17 ވަނަ އަހަރެވެ. އޭނާ އަކީ އެހެން ދީނެއްގެ މީހަކަށް ވިޔަސް އޭނާ ބަލައިގަންނަށް އާއިލާ އަށް މިހާރު އުނދަގުލެއް ނެތް ކަމަށް ސަންގް ބުންޏެވެ.

"އާޖެންޓީނާ އަކީ އެކި ދަރިކޮޅުތަކާއި އެކި ދީންތައް އޮންނަ ގައުމެއް. އެކިއެކި ސަގާފަތްތައް އޮންނާތީ އާއިލާ އަށް އަހަރެން ބަލައިގަތުމުގައި ދަތިކަމަކަށް ނުވޭ،" ފޮތީ ވިއްކުމުގެ ވިޔަފާރިގައި ހަރަކާތްތެރިވާ ސަންގް ބުންޏެވެ.

ރާއްޖެ އަށް ހިދުމަތެއް ކޮށްދޭން ބޭނުން!

ރާއްޖޭން ލިބުނު އިސްލާމްކަމުގެ ނިއުމަތާ އެކު، ރާއްޖެ އާއި ދިވެހިންނާ މެދު ސަންގްގެ ހިތް އޮތީ ޝުކުރުން ފުރިފަ އެވެ.

"ރާއްޖެއަކީ އަހަރެންގެ ހިތުގައި ވަރަށް ހާއްސަ ކަމެއް އޮތް ތަނެއް. މިއަދު އަހަރެން މިހިރަ ހިސާބަށް މަގުދައްކައި ދިނީ ރާއްޖޭން،" ސަންގް ބުންޏެވެ.

އޭނާ ބުނީ ފުރުސަތު ލިބޭނަމަ، ރާއްޖެ އަށް ހިދުމަތެއް ކޮށްދޭން ބޭނުންވާ ކަމަށެވެ.

"ފުރުސަތު ލިބެންޏާ ސްޓްރެޓެޖިކް މަސައްކަތްތަކެއް އަހަންނަށް ކުރެވިދާނެ. ފުޓްބޯޅަ އާ އަހަންނާ ގުޅުން އެބައޮތް. ދުނިޔޭގެ ޗެމްޕިއަން އާޖެންޓީނާގެ ފުޓްބޯޅަ ކޮންސެޕްޓް ވަރަށް ގިނަ ގައުމުތަކަށް ކަމުދޭ. އަހަރެންނަށް އެބަ އޮތް އެ ރައިޓްސް، އެ ކޮންސެޕްޓް ފޯރުކޮށް ދިނުމުގެ. ދެކުނު ކޮރެއާގައި އޭގެ މަސައްކަތްތަކެއް އަހަރެމެން ވާނީ މިހާރު ފަށާފަ. އެ އެހީތެރިކަން ރާއްޖެއަށް ވެސް ފޯރުކޮށްދޭން ފުރުސަތު އޮތީޔާ އަހަރެންގެ ޝައުގު އެބަހުރި."