ފަރުވާގެ ދޮގު ލިޔުން ވިއްކައި މަނީ ލޯންޑާކުރި ކަމުގެ ތުހުމަތަށް އެންޑީއޭގެ ދެ މުވައްޒަފެއްގެ މައްސަލަ ތަހުގީގުކުރަނީ

މަސްތުވާތަކެތީގެ ފަރުވާއަށް ހުކުމްކުރާ މީހުންގެ ފަރުވާ ފުރިހަމަނުކޮށް, ފައިސާ ދިނުމުން ފަރުވާގެ ދޮގު ލިޔުން ވިއްކާ ކަމުގެ ކަމުގެ ތުހުމަތުގައި ނެޝަނަލް ޑްރަގް އެޖެންސީ (އެންޑީއޭ) ގެ ދެ މުވައްޒަފެއްގެ މައްސަލަ ފުލުހުން ތަހުގީގުކުރަން ފަށައިފި އެވެ.

ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ޕޮލިސް ކޮމިޝަނަރު އިސްމާއިލް ނަވީން ވިދާޅުވީ އެންޑީއޭގެ މައްސަލައެއް ތަހުގީގު ކުރަމުންދާ ކަމަށެވެ.

ފުލުހުން ތަހުގީގުކުރަނީ އެންޑީއޭއިން ދޭ ފަރުވާގެ ތެރެއިން ފަރުވާގެ އެސެސްމެޓް ރިވިއުކުރުމުގައި އެ އެޖެންސީގެ އިސް މުވައްޒަފުންނާއި އިތުރު ބަޔަކު ގުޅިގެން އެންޑީއޭގެ ލެބޯޓްރީން ހަދާ ޓެސްޓުތަކުގެ ނަތީޖާ އޮޅުވާލުމުގެ މައްސަލައެކެވެ.

"ފަރުވާ ފުރިހަމަކުރަން ޖެހޭ މީހުން ފަރުވާ ފުރިހަމަކުރަން ނުޖެހޭ ގޮތަށް ބަދަލުކޮށް އަދި ފަރުވާ ކުރަން ޖެހޭ މީހުންގެ މުއްދަތު ކުރުކޮށް މުޖުތަމައުއަށް ދޫކޮށްލައި ފަރުވާ ފުރިހަމަކުރަން ޖެހޭ މީހުންގެ އަތުން މަގާމުގެ ނުފޫޒު ބޭނުންކޮށްގެން ގިނަ އަދަދެއްގެ ފައިސާ ރިޝްވަތުގެ ގޮތުގައި ހޯދައި ގިނަ އަދަދެއްގެ ފައިސާ ލޯންޑާ ކުރި ކަމަށް ތުހުމަތު ކުރެވޭ މައްސަލައެއް،" ނަވީން ވިދާޅުވި އެވެ.

ފުލުހުންނަށް ލިބުނު މައުލޫމާތާ އެކު މިދިޔަ މަހުގެ ހަ ވަނަ ދުވަހު އެ މައްސަލައިގެ ތަހުގީގު ފަށާފައިވާ ކަމަށް ވެސް ނަވީން ވިދާޅުވި އެވެ.

އޭނާ ވިދާޅުވީ ފުލުހުން މިހާރު ވަނީ އެ މައްސަލައިގައި ތުހުމަތުކުރެވޭ ދެ މީހަކު ދިރިއުޅޭތަން ބަލައި މާލޭގައި އެންޑީއޭ ހިންގަމުންދާ ތަންތަން ބަލައި ފާސްކޮށްފައިވާ ކަމަށެވެ.

"އެ މައްސަލާގެ ތަހުގީގަށް ބޭނުންވާ ލިޔެކިޔުންތަކާއި އިލެކްޓްރޯނިކް ބައެއް ސާމާނު ފުލުހުންގެ ބެލުމުގެ ދަށަށް ވަނީ ގެނެސްފައި،" ނަވީން ވިދާޅުވި އެވެ.

އެ މައްސަލައިގެ ތަފްސީލު މިއަދުގެ ޕްރެސްގައި ހާމައެއް ނުކުރެ އެވެ. އަންނަ އާދިއްތަ ދުވަހު އެކަމަށް ހާއްސަކޮށް ނޫސްވެރިންގެ ބައްދަލުވުމެއް ބާއްވާނެ ކަމަށާއި އޭގައި އެންޑީއޭ މައްސަލައިގެ ތަފްސީލު ދޭނެ ކަމަށް ވެސް ނަވީން ވިދާޅުވި އެވެ.

މިދިޔަ ޑިސެމްބަރުގައި ހޯމް މިނިސްޓްރީން ބެއްވި ބައްދަލުވުމުގައި އެންޑީއޭގެ ސީއީއޯ އިމާދު ސޯލިހް ވިދާޅުވެފައި ވަނީ 2018 ވަނަ އަހަރުން ފެށިގެން ޑްރަގު ކޯޓުން ކޮމިއުނިޓީ ފަރުވާ އަށް ހުކުމް ކޮށްފައިވާ 700 މީހުންގެ ބެކްލޮގެއް އޮތް ކަމަށެވެ.

ހަތަރު މަސް ތެރޭގައި ކިޔުގައި ތިބި 700 މީހުންނަށް ފަރުވާދީ ނިންމައިލެވޭނެ ކަމަށް ކަމަށް އިމާދު އޭރު ވިދާޅުވި އެވެ.