މަގުމަތީގައި ސަލާން ޖަހާ އަދި ޑްރަގްގެ ވަބާގައި އުޅޭ 47 މީހުން ފަރުވާ އަށް ގެންގޮސްފި

މަގުމަތީގައި ސަލާން ޖަހައި އަދި މަސްތުވާތަކެތީގެ ވަބާގައި ޖެހިފައިވާ މީހުން ބަންދު ކޮށްގެން ފަރުވާ ދިނުމަށް ފެށި އޮޕަރޭޝަނުގައި މިހާތަނަށް 47 މީހުން ގެންގޮސްފައިވާ ކަމަށް ހޯމްލޭންޑް ސެކިއުރިޓީ މިނިސްޓްރީން ބުުނެފި އެވެ.

ވަންނާނެ ތަނެއް ނެތި މަގުމަތީގައި ސަލާން ޖަހަން އުޅޭ މަސްތުވާތަކެތީގެ ވަބާގައި ޖެހިފައިވާ މީހުން ފާހަގަކޮށް، އެ މީހުންނަށް ފަރުވާ ދިނުމުގެ ހާއްސަ ޕްރޮގްރާމް ފެށުމަށް މީހުން ގެންދަން ފެށީ މިދިޔަ މަހުގެ 22ގަ އެވެ.

ނޭޝަނަލް ޑްރަގް އެޖެންސީ (އެންޑީއޭ) ގެ ޗެއާޕާސަން ލުބުނާ މުހައްމަދު ޒާހިރު ހުސެއިން ވިދާޅުވީ އެ އޮޕަރޭޝަން ކުރިއަށް ގެންދިޔުމަށް ނިންމާފައިވަނީ މުއްދަތެއް ނެތް ގޮތަށް ކަމަށެވެ.

"މި އޮޕަރޭޝަންގެ ދަށުން، މަގުމަތީ ސަލާން ޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މީހުންނާއި މަސްތުވާތަކެތި ބޭނުންކުރާ މީހުން ބަންދުކޮށް އެ މީހުންނަށް ބޭނުންވާ ފަރުވާ ދޭނެ،" އޭނާ ވިދާޅުވި އެވެ.

ލުބުނާ ވިދާޅުވީ، އެންޑީއޭ އިން ފަރުވާދޭ ނިޒާމު ހަރުދަނާކުރާއިރު ރިލެޕްސް ޕްރިވެންޝަން އަދި ރީއިންޓެގްރޭޝަނާއި އާފްޓާކެއާގެ އިތުރުން ޑްރަގް ޕްރިވެންޝަން މަސައްކަތްތައް ކުރުމަށް ހާއްސަ ސަމާލުކަމެއް ދެއްވާނެ ކަމަށެވެ.

އެންޑީއޭ އިން ފަރުވާދެނީ ރެސިޑެންޝަލް އާއި ނޮން ރެސިޑެންޝަލް ފަރުވާ އެވެ. އޭގެ ތެރެއިން ރެސިޑެންޝަލް ފަރުވާގެ ތެރޭގައި ހިމެނެނީ ކ. ހިންމަފުށީގައި ހުންނަ ތެރަޕިއުޓިކް ކޮމިއުނިޓީ ރިހެބިލިޓޭޝަން ސެންޓަރާއި ރެސިޑެންޝަލް ޑީޓޮކްސް އާއި ސެމީ ރެސިޑެންޝަލް ފެސިލިޓީ އާއި ރިމާންޑް ސެންޓަރެކެވެ. އައްޑު އާއި ފުވައްމުލަކާއި ގދ. ތިނަދޫގައި ވެސް ޑީޓޮކްސް ފެސިލިޓީއެއް ހުރެ އެވެ.

މުޅި ރާއްޖޭގައި ޑްރަގް ފަރުވާ ދިނުމަށް ހަދާފައިވާ ތަންތަނުގެ ބެޑް ކެޕޭސިޓީއަކީ 350 އެވެ.