ފްލެޓް މައްސަލައިގެ ތެރެއަށް އެޗްއާރްސީއެމް ވަދެއްޖެ

ގެދޮރުވެރިޔާ ސްކީމްގެ ދަށުން ކުރީ ސަރުކާރުން ދޫކޮށްފައިވާ ފްލެޓްތަކުގެ މައްސަލަ ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ތަހުގީގު ކުރަން ފަށައިފި އެވެ.

ކުރީ ސަރުކާރުން ދޫކުރި 4000 ފްލެޓުގެ މައްސަލަ އަށް އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރުމަށް ފަހު 60 ޕަސެންޓު ފްލެޓުތައް ދޫކޮށްފައި ހުރީ ގޯސްކޮށް ކަމަށް އެ ކޮމިޝަނުން ނިންމި އެވެ.

ބައެއް ފަރާތްތަކުން އޭސީސީގެ ނިންމުމާ މެދު ހިތްހަމަ ނުޖެހި ކަންބޮޑުވުން ފާޅު ކުރަމުން ދަނިކޮށް އެޗްއާރްސީއެމް އިން މިއަދު ނެރުނު ބަޔާނެއްގައި ބުނީ އޭސީސީން ތަހުގީގު ކުރަމުންދާ މައްސަލާގައި ގިނަ ބައެއްގެ ހައްގުތައް ގެއްލިގެންދާ ކަމަށް ބުނާ މައްސަލައެއް އެ ކޮމިޝަނަށް ލިބިފައިވާ ކަމަށެވެ.

އެ މައްސަލަ ބަލާނީ އިންސާނީ ހައްގުތަކުގެ ނަޒަރުން ކަން ހިނގާފައިވާ ގޮތަށް ކަމަށް އެ ކޮމިޝަނުން ބުންޏެވެ.

އެކަމާ ގުޅޭ ގޮތުން މިހާތަނަށް ހައުސިން މިނިސްޓްރީ އާ ބައްދަލު ކޮށްފައިވާ ކަމަށާއި ފްލެޓު ލިސްޓު ބާތިލުކޮށް އަލުން އިއުލާން ކުރުމުގެ ވިސްނުމެއް އެ މިނިސްޓްރީން ނުގެންގުޅޭ ކަމަށް އެޗްއާރްސީއެމް އިން ބުންޏެވެ.

އޭސީސީގެ ނިންމުންތަކާ ބެހޭ ގޮތުން އެޓާނީ ޖެނަރަލް އޮފީހުގެ ލަފަޔަކަށް ހައުސިން މިނިސްޓްރީން އެދިފައިވާ ކަމަށް އެ މިނިސްޓްރީން މައުލޫމާތު ދިން ކަމަށްވެސް އެ ކޮމިޝަނުން ބުންޏެވެ.

ފްލެޓު މައްސަލައަކީ ގިނަ ބައެއްގެ ކަންބޮޑުވުން އޮތް ކަމަކަށް ވާތީ ވީހާ ވެސް އަވަހަށް ނިންމުމަށް މަސައްކަތް ކުރަމުންދާ ކަމަށް ވެސް އެ ކޮމިޝަނުން ބުންޏެވެ.