ރިޔާސީ ކެމްޕެއިންގެ ދަތުރުތަކަށް އެމްޑީޕީން ދޭންޖެހޭ 5.6 މިލިއަން ނުދެއްކުމުން ކޯޓަށް ދާނެ ކަން އަންގައިފި!

މިދިޔަ އަހަރުގެ ރިޔާސީ އިންތިހާބުގެ ކެމްޕެއިނަށް އައިލެންޑް އޭވިއޭޝަން ސާވިސް (އައިއޭއެސް) މެދުވެރިކޮށް އެމްޑީޕީން ކުރި ދަތުރުތަކަށް ލިބެންޖެހޭ 5.6 މިލިއަން ހޯދުމަށް މިހާރު ދީފައިވާ މުއްދަތުގައި އެ ފައިސާ ނުދައްކައިފި ނަމަ އެ ޕާޓީގެ މައްޗަށް ދައުވާ ކުރާނެ ކަން އެ ކުންފުނިން އަންގައިފި އެވެ.

"މިހާރު" އަށް އެނގިފައިޥާ ގޮތުގައި މޯލްޑިވިއަން އެއާލައިން ހިންގާ އައިލެންޑް އޭވިއޭޝަން މެދުވެރިކޮށް މިދިޔަ އަހަރުގެ ސެޕްޓެމްބަރުމަހުން ފެށިގެން އޮކްޓޫބަރުމަހާ ހަމައަށް އެމްޑީޕީން ނެގި ޓިކެޓާއި ޗާޓަރު ދަތުރުތަކަށް 5.6 މިލިއަން ރުފިޔާ އަރައެވެ.

އައިލެންޑް އޭވިއޭޝަންގެ އިސްވެރިއަކު މިއަދު ވިދާޅުވީ، އެމްޑީޕީގެ ފަރާތުން ލިބެންޖެހޭ ފައިސާތަކެއް ހުރުމުން އެ "ކަލެކްޓް ކުރުމުގެ މަސައްކަތް" ކުރަމުން އަންނަ ކަމަށެވެ. ފައިސާ ހޯދަން އެކި ފަހަރު މަތިން އެ ޕާޓީ އަށް މީގެ ކުރިން ސިޓީ ފޮނުވާފައިވާ ކަމަށް އޮފިޝަލް ވިދާޅުވި އެވެ.

އެ ފައިސާ ދައްކަން އައިލެންޑް އޭވިއޭޝަނާއި އެމްޑީޕީން އޭރު އެއްބަސްވެފައި އޮތީ ހިދުމަތް ހޯދާ ތާރީހުން ފެށިގެން 48 ގަޑިއިރެވެ.

ފައިސާ ދައްކަން އެމްޑީޕީ އަށް އައިލެންޑް އޭވިއޭޝަނުން އެންމެ ފަހުން ދިން ސުންގަޑިއަކީ މި މަހުގެ 18 ވަނަ ދުވަހެވެ. އޭގެ ކުރިން ފައިސާ ނުދައްކައިފި ނަމަ ޝަރުއީ މަރުހަލާތައް ފަށާނެ ކަމަށް ވަނީ މިދިޔަ ބުރާސްފަތި ދުވަހު އެމްޑީޕީ އަށް އަންގައިފަ އެވެ.

މީގެ ކުރިން ޑީއާރުޕީން ވެރިކަންކުރި ޒަމާނުގައި ވެސް އެ ޕާޓީން ރިޔާސީ ކެމްޕެއިނަށް އައިލެންޑް އޭވިއޭޝަން މެދުވެރިކޮށް ކުރި ދަތުރުތަކަށް ފައިސާ ނުދައްކައިގެން ވެސް މިފަދަ މައްސަލަތަކެއް ކުރިމަތިވި އެވެ.