ބިރުބޮޑު، ދިވެހި ފުޓްބޯޅަ އަށް ނުރައްކަލުގެ ރަނގަބީލު!

ގައުމީ ފުޓްބޯޅަ ދަނޑުގައި މިދިޔަ ބުދަ ދުވަހު، ހިންގި ހަމަނުޖެހުންތަކުގެ ވީޑިއޯ ބެލި ގިނަ ބަޔަކަށް ސިފަ ކުރެވުނީ ބޮޑު ބިރުވެރި ކަމެއްގެ ގޮތުގަ އެވެ. އެކަމަކު ރާއްޖޭގެ ރަސްމީ މުބާރާތެއްގެ ގައުމީ ފުޓްބޯޅަ ދަނޑުގެ ތެރެއިން، ރޯމާ ދުވާލު ފެނުނު މި ބިރުވެރިކަމާ ކުޅުންތެރިންނާއި ކޯޗުން އަދި ރެފްރީންނާއި މެޗު އޮފިޝަލުން ވެސް ކުރިމަތިލާން ޖެހޭ މަންޒަރުތައް ހަމަ ކޮންމެ އަހަރަކުހެން ފެންނަމުންދާތާ ހައެއްކަ އަހަރުވެއްޖެ އެވެ.

ގަލޮޅު ދަނޑަކީ މީގެ އަހަރުތަކެއް ކުރިން އާއިލާއާ އެކު މެޗުތައް ބަލާލަން ދަނޑަށް ވަދެ ވަގުތު ހޭދަކޮށްލަން އެކަށޭނެ މާހައުލެއް އޮތް ތަނަކެވެ. ބަފައިން އެމީހުންގެ ކުޑަދަރިފުޅު އަތުގައި ހިފައިގެން ދަނޑަށް ވަންނަނީ އެކަމުން ހިތްހަމަޖެހުމާއި އުފާވެރިކަން އިހްސާސް ކުރެވޭތީ އެވެ. އެކަމަކު މިހާރު ގަލޮޅު ދަނޑުގައި އެ މާހައުލެއް ނެތެވެ. ދަރިފުޅު ގޮވައިގެން ދަނޑަށް ވަންނަން އެއްވެސް ބަފަޔަކު މިހާރު ބޭނުމެއް ނުވެ އެވެ. ބައެއް މީހުން ބުނާ ގޮތުގައި މެޗެއް ބަލަން ރާއްޖޭގެ މައި ފުޓްބޯޅަ ދަނޑަށް ވަނުން މިހާރު ވަނީ ނުރައްކާ ކަމަކަށެވެ.

ނުރައްކަލަށް ދަނޑު ހުށަހެޅިގެންދާ މަންޒަރުތައް މިހާރު ދަނީ ތަކުރާރު ވަމުންނެވެ. މިދިޔަ ސީޒަނުގެ ދެވަނަ ޑިވިޝަނުގައި ވެސް ބުރު ސްޕޯޓްސް އާއި ޓީނޭޖް ބައްދަލު ކުރި މެޗުގައި ވެސް ހަމަނުޖެހުންތަކެއް ހިންގި އެވެ. އެ މެޗުގައި ޓީނޭޖްގެ އޮފިޝަލަކު ރެފްރީ އާ ދިމާކޮށް ރެފްރީ ފަހާ ދުވުނެވެ.

އޭރު އެ ހަމަނުޖެހުމަށް ފުރުސަތު ފަހި ކުރި ކްލަބްތަކާއި އެ ކްލަބްތަކުގެ އޮފިޝަލުންތައް އަނެއްކާ ވެސް އަނެއް އަހަރު މުބާރާތުގައި ބައިވެރިވެ އެވެ. އެ ކްލަބްތަކާ ދެކޮޅަށް ހަމަނުޖެހުން ހިންގި މީހުންނާ ދެކޮޅަށް އެޅޭނެ ފިޔަވަޅެއް ނެތެވެ.

ސީނިއާ ފުޓްބޯޅަ މުބާރާތްތަކުން ފެންނަ ފެށި މި މަންޒަރުތައް އެންމެ ފަހުން ނަކަލު ކުރީ އުމުރުން ހަގު ކުޅުންތެރިންނެވެ. މިދިޔަ އަހަރު އިންޓަ ސްކޫލް ފުޓްބޯޅަ މުބާރާތުގައި ވާދަކުރި ކ. ގުރައިދޫ ސްކޫލް ކުޅުނު މެޗެއްގައި ވެސް ބޮޑު ހަމަނުޖެހުމެއް ގަލޮޅު ދަނޑުގައި ހިންގި އެވެ. ސްކޫލް މުބާރާތުގެ 17 އަހަރުން ދަށުގެ ސެމީ ފައިނަލު މެޗުގައި ރެފްރީ އާ މެދު ހިތްހަމަނުޖެހި، މެޗު ނިމުނު ފަހުން ގުރައިދޫ ސްކޫލުގެ ކުޅުންތެރިންނާއި ޓީމު އޮފިޝަލުން އަދި ބެލެނިވެރިން ރެފްރީ އަށް ހަމަލާދީ މާރާމާރީ ހިންގި އެވެ.

ފުޓްބޯޅައިގެ މަގުބޫލުކަމާއި ސަޕޯޓަރުން ނަގާ ފޯރީގައި، ރާއްޖެ އަކީ މުޅި ދެކުނު އޭޝިއާގައި ވެސް ކުރިން ނަމޫނާ ގައުމެކެވެ. އެކަމަކު ދަނޑުތަކުން ފެންނަން ފެށި ބިރުވެރި މަންޒަރުތަކާ އެކު ރާއްޖޭ ފުޓްބޯޅައާ މެދު އެހެން ގޮތަކަށް ދެކޭ މީހުން އެބައުޅެ އެވެ.

ގައުމީ ފުޓްބޯޅަ ޓީމުގެ ކުރީގެ އެސިސްޓެންޓް ކޯޗު ސިމާއޯ ކޮސްޓާ ބުނީ ރާއްޖެއާ މެދު އޭނާ ދެކެނީ އޭނާގެ ދެވަނަ ގައުމުގެ ގޮތުގައި ކަމަށެވެ. ރާއްޖޭގެ ގައުމީ ފުޓްބޯޅަ ދަނޑުން ބުދަ ދުވަހު ފެނުނު މަންޒާރާ އެކު ރާއްޖޭގެ ފުޓްބޯޅައާ މެދު ހިތާމަކުރާ ކަމަށް ސިމާއޯ ބުންޏެވެ.

"އަހަރެންގެ ދެވަނަ ގައުމުގެ ފުޓްބޯޅަ މިހާރު ވެއްޓިފައިވާ ހުރިހާ ހާލަތަކާ މެދު އަހަރެން ވަރަށް ދެރަވޭ،" ޕޯޗުގަލް އަށް ނިސްބަތްވާ ސިމާއޯ ބުންޏެވެ.

ދަނޑުން ފެނުނު މި މަންޒަރުގެ ސަބަބުން ފުޓްބޯޅައިގެ ހިދުމަތްތެރި އެތައް ބަޔަކަށް ވެސް އަސަރުތަކެއް ކުރި އެވެ. ކްލަބް ވެލެންސިއާގެ އެއް ފައުންޑަރު އަދި ގިނަ ކުޅިވަރުތަކެއްގައި ގައުމީ ޓީމު ތަމްސީލު ކުރެއްވި ލެޖެންޑް އަދި ކުރީގެ ސްޕޯޓްސް ކޮމިޝަނާ ހީނާ އަހްމަދު ސަލީމް ވިދާޅުވީ މެޗުގެ 90 މިނެޓް ފުރިހަމަ ނުވަނީސް ދަނޑުން ނުކުންނަން މަޖުބޫރު ހާލަތަކަށް ދިއުމުން ދެރަވި ކަމަށެވެ.

"މެޗު ބަލާލުމުގެ ފުރުސަތު ލިބުނު. ހިތާމައަކީ 90 މިނެޓް ހަމަނުކޮށް ދަނޑުން ނުކުންނަން ޖެހުން،" ބުދަ ދުވަހުގެ މެޗުގައި ހިނގާދިޔަ ހަމަނުޖެހުންތަކާ ގުޅިގެން "މިހާރު" ގެ ސްޕޯޓްސް ޕޭޖަށް ކުރެއްވި ކޮމެންޓެއްގައި ކުރީގެ ކޯޗު ވިދާޅުވި އެވެ.

"ގައުމީ ލޯބި. ގައުމީ ދިދަ ފެންނާން ނެތުމުން ހިތާމަކުރަން."

އެފްއޭއެމްގެ ކުރީގެ ރައީސް އަދި މެދުހެންވޭރު ދާއިރާގެ މެންބަރު އަލީ އާޒިމު ކުރިން، "މިހާރު" އަށް ދެއްވި އިންޓަވިއުއެއްގައި ވިދާޅުވީ، ފުޓްބޯޅައިން ފެންނަ މަންޒަރުތަކުގެ ސަބަބުން، ދަރިން ފުޓްބޯޅައިގެ ޝާމިލުކުރުވަން ވެސް ބެލެނިވެރިން މިހާރު ބޭނުން ނުވާ ކަމަށެވެ. އޭނާ ވިދާޅުވީ ޓީމަށް ކިޔާ ނަމުގެ ގޮތުން ވެސް އެ ނަންތަކާ ގުޅިފައިވާ އެކަޑަމީތަކަށް ދަރިން ގެންދަން ބޭނުން ނުވާ ބެލެނިވެރިން ވެސް އުޅޭ ކަމަށެވެ.

"ފުޓްބޯޅަ ފެންނަނީ ގޭންގް ކުޅިވަރެއްގެ ގޮތުގައި. މިހާރު ޕާސެޕްޝަނަކީ، ހަމަގައިމު ވެސް ދިވެހިން ދެކެނީ މީ މިހާރު ގޭންގް ހިންގާ ކުޅިވަރެއްގެ ގޮތުގައި. ބޭނުންނުވާނެ އެތަނަކަށް މަގޭ ދަރި ގެންގޮސް ފުޓްބޯޅަ ތެރެއަށް ވައްދާކަށް. އެކަޑަމީތައް ވެސް އެބައުޅޭ ކިޔާ ނަމުގެ ގޮތުން ވެސް ގެންދަން ބޭނުން ނޫން،" އާޒިމު ވިދާޅުވި އެވެ.

އެފަދަ ނަންނަމަށް ނިސްބަތްކޮށް ނަން ކިޔައިފައިވާ ކްލަބްތައް މުބާރާތްތަކުގައި ބައިވެރި ނުކުރުމަކީ ވެސް އެފްއޭއެމަށް އޮތް އިހްތިޔާރެއް ކަމަށް އާޒިމު ވިދާޅުވި އެވެ.

އޭނާ ވިދާޅުވީ މުޖުތަމައުގެ އޮންނަ އާންމު މިންގަނޑު ހިލާފު ވިޔަ ނުދިނުމަށް ކުރީގެ ކުޅިވަރާ ބެހޭ ވަޒީރު މަރްހޫމް އުމަރު ޒާހިރު މަސައްކަތް ކުރެއްވި ކަމަށެވެ. އެކަމަކު މިހާރު އެންމެ މަތިން ފެށިގެން ތިރިއާ ހަމައަށް ފެންނަނީ އެ އެ މިންގަނޑުތައް މުގުރިގެންދާ ގޮތަށް ކަންތައްތައް ވަމުންދާތަން ކަމަށް އާޒިމު ވިދާޅުވި އެވެ.

"މިސަލަކަށް؛ 'ކަތިވަޅި' ނަކަމަށް ކިޔާ ޓީމެއް އެ ނަން ކިޔައިގެން ދިޔައީމަ ވެސް ކުޅިވަރުގައި ބައިވެރިވާން ފުރުސަތު ދޭންވީތޯ،"

އޭނާ ވިދާޅުވީ މުޖުތަމައު ބަލައިގަންނަ ރީތި އެއްޗަކަށް ރާއްޖޭގެ ފުޓްބޯޅަ ހެދުމަކީ އެފްއޭއެމްގެ އެންމެ މުހިންމު ޒިންމާ ކަމަށެވެ.

"ރީތިކޮށް ފުޓްބޯޅަ ގެންދިއުމަށް، މުޖުތަމައު ގަބޫލުކުރާ ބަލައިގަންނަ އެއްޗަކަށް ފުޓްބޯޅަ ހެދުމަކީ ފުޓްބޯޅަ އެސޯސިއޭޝަންގެ އެންމެ މުހިންމު ކަންތައް. އެއީ ފީފާ އިން އެންމެ ބާރުއަޅާ އެއް ކަންތައް. އެކަމަކު ރާއްޖޭގައި މި ފެންނަނީ އެކަން އެހާ ރީތިކޮށް ގެންދާން ނުޅޭތަން،" ދިވެހި ފުޓްބޯޅައިގެ ހިދުމަތްތެރިޔާ ކުއީން އަހްމަދު ވަހީދުގެ ދަރިފުޅު އާޒިމް ވިދާޅުވި އެވެ.